Day: 14. september, 2004

Leyfi mér að svara Bibba: Vissulega er doktorsnafnbót lögvernduð. Þ.e.a.s. að þú mátt ekki kalla þig doktor nema þú hafir í raun og veru staðist doktorspróf. Ef spurt er um mannsnafn aftur á móti horfir málið allt öðruvísi við. Fyrst sadistar í Bandaríkjunum mega nefna börnin sín Xerox (e. ljósrit), hlýtur Doctor, eða jafnvel Dr, að vera leyfilegt mannsnafn einhvers staðar. Sé raunin sú gæti það vel orðið að raunveruleika að einhver Doctor öðlaðist doktorsnafnbót og yrði þar með titlaður dr. Doctor (eða jafnvel dr. Dr!).

Það skal engan undra, þótt slík staða komi upp í nánustu framtíð.

Mér sýnist þeir vera að yfirgefa svæðið. Sem er afar merkileg tímasetning því senn geri ég slíkt hið sama.

Fokkíng framkvæmdir! Svo er svalahandriðið horfið (!). Ætli verið sé að rífa húsið mitt og láðst hafi að láta mig vita? Hér leikur alltént allt á reiðiskjálfi, svo það útilokar viðgerðir. Enda hér umhorfs eins og suðurlandsskjálfti dauðans hafi riðið yfir.

Ef ég ætti fartölvu gæti ég farið eitthvað annað, en ég á ekkert slíkt. Aukinheldur ætla ég ekki að leyfa mér slíkan munað fyrr en ég kemst í musteri menntunarinnar: Háskóla Íslands.

Hér er ekki vinnufriður fyrir framkvæmdum! Áreiðanlega verður mér sagt að ég standi í vegi fyrir framförum, en ég lýsi mig hérmeð eilífan óvin framkvæmda (í mínu nágrenni).

Ég hef óskað eftir að fá að taka stöðupróf í ensku. Mun það til komið vegna eigin drambsemi, en ég tel mig þegar fullnuma í námsefni vetrarins og þ.a.l. ekki græða neitt á að mæta í kennslustundir. Þar að auki er vöntun bæði á kennslu og aga. Væri hinu síðarnefnda kippt í liðinn myndi hið fyrrnefnda stórbatna. En það er hægara sagt en gert.

Annars hefur kennarinn enga trú á að ég hafi þegar kunnáttu á námsefni vetrarins, þ.e. orðum á borð við electricity, monitor og baffled. Þrugl og vitleysa, ég þurfti meira að segja að leiðrétta framburð hennar á baffled! Það á ekki að henda kennara með masterspróf að nemendurnir leiðrétti hann. Það er fræðilegt sjálfsmorð.