109969278718537884

Það er ótrúlega svekkjandi að uppgötva að áhyggjur af ýmsum málum hafi verið til einskis, jafnvel þó maður sé frelsinu feginn, þ.e. að þurfa ekki að hafa áhyggjur af því lengur.

Ég fékk símhringingu frá skipulagsmanni Gettu betur og var ég boðaður í viðtal og prófun á kunnáttu, eftir að hafa þreytt forpróf í dag. Raunar efast ég um að ég komist nokkuð lengra en ég er þegar kominn, en það er aldrei að vita. Mér finnst alveg eins líklegt að ég komist inn og við sigrum keppnina eins og að ég komist ekkert lengra. Það kemur þó í ljós á sunnudagskvöldið.

Kvöldið mitt endaði á veitingastaðnum Rossopomodoro. Hallast ég að því að „pomo“ standi fyrir póstmódernisma, enda staðurinn eftir því. Maturinn var góður en vínið var hálflélegt. Ágætisdagur, en í fyrramálið hefst vinna fyrir brauði næsta mánaðar; mánaðar hinna mestu útgjalda.

109966719893859494

Ég rakst á þessa mynd hjá Farfuglinum og gat vart varist brosi. En þessu er ég sammála, enda ekki erfitt að kenna auglýsingaherferðum stórfyrirtækjanna um þá óbeit sem ég hef á jólunum. Jólin væru æðisleg ef maður væri ekki orðinn þreyttur á þeim nokkrum mánuðum áður en þau byrja!

Fyrirlestur minn „Njálsbrenna“ flutti ég í dag frammi fyrir 25 manna æstum skríl, sem fór sér í öllu durgslega. Eftir að ég hafði lokið máli mínu brutust út mikil fagnaðarlæti og allir hylltu mig, örlátan en hógværan spekinginn, sem nýkrýndan konung sinn (ath. örlítið skreytt).

Sá frómi heimspekingur og guðfræðingur, Clarence Edwin Glad, sem í ofanálag er latínukennari undirritaðs (sjá bók um samband okkar: „Der Meister und der Lehrling“ eftir Ludwig „der Schweitzer“ Strauß), hefur gefið út bókina „Átökin um textann“, sem fjallar um mótunarsögu Nýja testamentisins á fyrstu þremur öldunum e.k. Tjáði téður Clarence mér það í dag að hann hefði verið afar ánægður með að ég vissi til bókar hans og spurði mig, hvort ég ætlaði mér að kaupa hana. Mér finnst hann ekkert of góður til að verðlauna mig fyrir þekkingu mína með því að hreinlega gefa mér bókina.

Úff! Senn hefst ég handa við etymólógíuna. Eða m.ö.o. sagt: Senn missi ég vitið!