Day: 17. desember, 2004

Andri bróðir er hjartahlý manneskja sem ber alla kosti hátt yfir Björn Bjarna. Rétt í þessu kom greyið inn með himinháan pappírsjólasvein sem hann hafði þrælast við að búa til svo vikum skipti og bað mig um að pakka honum inn fyrir sig svo hann gæti gefið mömmu hann í jólagjöf. Það gekk ekki vel að pakka ferlíkinu inn, en það hafðist að lokum. Þegar hann hafði svo lokið við að skrifa á kortið færðist lymskulegt glott yfir andlitið á honum. Svo földum við hann uppi í skáp. Þetta á auðvitað að koma á óvart.

Þarna er strákur sem finnst gaman að gefa af og með sér. Ólíkt Birni Bjarna sem getur ekki einu sinni deilt landinu með öðrum, sérstaklega ekki yfir jólin. Hvernig væri að íslendingar losuðu sig frekar við hann, í eitt skipti fyrir öll?

Önnur grein um skandalinn og mannréttindaglæpinn gegn úkraínumanninum. Þetta er svo viðurstyggilegt að ég fæ klígju af tilhugsuninni. Það má kalla þetta mörgum nöfnum, þar með talið nasismi og kynbótastefna, og mér þætti hreint ekki of langt gengið að úthrópa Björn Bjarnason nasista eða kynþáttahatara hér á þessu bloggi, þó ég geri það ekki.

Nei, ég hef ekki mikið álit á erkifíflinu honum Birni eða ídolinu hans, Adolf Hitler.

Fyrir nokkru var ég beðinn um að spila í brúðkaupi og játti ég því. Lagavalið hefði þó mátt liggja fyrir aðeins fyrr. Það er ekki lítið á mann lagt að eiga að læra lög sem hlýða engum náttúrulögmálum þegar kemur að rytma. Eða lög sem ég hef engin tök á að verða mér úti um til áhlustunar. Kannski er þetta bara ástæðulaus fullkomnunarárátta af minni hálfu. En sum lög eru hreinlega bara ekki samin fyrir gítar.

Þeir sem láta sig það varða skulu skoða þetta myndband. Ég veit ekki hvort það er ósvikið en það nægir a.m.k. til að vekja fólk til umhugsunar. Rosalegt ef satt reynist.

Senn nálgast jólin. Orðið á götunni er að meira að segja sagnfræðingar deili um hvort kom á undan, auglýsingin eða jólin, en menn hafa fljótlega gleymt sér í neysluhyggjubrjálæðinu, svo jafnvel elstu heimildir stangast á. Leiddar hafa verið líkur að því að Jesús hafi í raun verið fyrsta fyrirtækisímyndin, eins og Michael Jordan var fyrir íþróttafatnað, og að sala á helgimyndum hafi rokið upp úr öllu valdi á hans dögum, valdandi gríðarlegri hækkun á vísitölu neysluverðs, hárri verðbólgu og mikilli misskiptingu fjármagns. Þannig hafi menn strax verið búnir að undirbúa markaðssetningu jólanna áður en þau urðu til. Umboðsaðili jólanna hefur frá upphafi verið kirkjan, en nú á dögum eru þau seld á niðurgreiddu verði í hinum ólíkustu verslunum, gerandi það þægilegra, fljótlegra og billegra fyrir fjöldann að njóta þeirra. Unnið er nú að framleiðslu Ora kompakt jóla í niðursuðudós og er talið að þau taki markaðinn með stormi síðhausts árið 2009 með slagorðinu: Fljótlegra, betra, ódýrara! Það er enda það sem jólin snúast um.