Þórður bróðir: Er það ekki bara Barnaland.is?
Tilvitnun dagsins
Þórður bróðir: Er það ekki bara Barnaland.is?
Úff! Hryllingurinn stendur mér eins skýrt fyrir hugskotssjónum og ef hér væru fimm trúðar útaðaðir í blóði og ælu að syngja Vengaboyslög. Sjáið þið ekki Kiljan fyrir ykkur, raunamæddan á koffortinu í slitnum Tweed-jakka með vasa fulla af brostnum draumum og Gretu Garbo stumrandi yfir honum: Þetta verður allt í lagi Halldór minn. Þú slærð í gegn á endanum!
Óekki, segir Halldór. Líf mitt á sér eingan frama hér í Amríkunni. Ég er haldinn heim á leið, til lands íss og elda, að pára sögur um kotroskna bændaskítsdurga sem kúaðir lifðu og forsmáðir í skugga dönsku krúnunnar. Ef ég aðeins hefði sorðið leikkventátuna þá arna hefðu hlutirnir máski æxlast öðru vísi.
Ókei, segir Greta. Ég er farin að leika í Wild Orchids eða einhverri annarri samtímakvikmynd. Charlie hefur ofan af fyrir þér á meðan.
Ólafur Darri gengur inn á sviðið í hlutverki Chaplins og dettur á rassinn. Halldór hlær hjartanlega og tjaldið fellur.
Svo spurði mamma mig áðan hvort mig vantaði nokkuð úr apótekinu. Það var þó hugmynd. Ótrúlegt hvað maður getur haft litla rænu á að bjarga sér um svona smáhluti fyrr en einhver minnist á það. En nú sit ég semsagt vel birgður af Strepsils og Norskum brjóstdropum. Það voru hrein mistök að gleyma að biðja apótekaralakkrís í leiðinni. En það eru mistök sem ég og enginn annar þarf að lifa með.
Ég skal leyfa hverjum sem vill fjármagna að nota hugmynd mína um að framleiða Life ends at 40 lyklakippur. Hana, þar fór fjórðungur lesenda.
Niðursneiddur ostur er hámark letinnar. Það vantar bara að hægt sé að kaupa tilbúnar smjörhimnur sem hægt væri að leggja beint ofan á brauð. Það væri eitthvað fyrir sjónvarpsmarkaðinn. Þeir myndu sýna myndir af fólki að skera brauð í tætlur og smjör úti um allt, undir fyrirsögninni „aðrar vörur“, og segja: Ertu ekki orðinn leiður á gömlu, tímafreku aðferðinni við að smyrja brauð? Keyptu þér SmjörhimnurTM og láttu okkur smyrja fyrir þig!
Hlýtur þetta ekki að vera á leiðinni? Ég spái sprengingu á neysluvörumarkaði.
Ekki það að ég hafi orðið var við neitt slíkt. Neinei, ekki að ræða það.
Я Арнгримур. Eins og þið vitið það ekki nú þegar!