Að pakka

Hvers vegna er það þegar maður pakkar að maður finnur sig í hvívetna knúinn til að fylla ferðatöskuna af meira og meira drasli með hverri stund sem líður, út allan daginn. Þarf ég svona mikið af dóti? Það er ekki eins og ég sé að flytja úr landi.

Annars eru það yfirleitt mestu nauðsynjarnar sem enda seinast í töskunni, nefnilega tannburstinn, rakvélin og sjampóið. Er annars ekki svolítið erfitt að flokka nauðsynjar á þennan hátt? Nærbuxur eru til að mynda ómissandi, en þær má raunar alltaf kaupa. Öðru máli gegnir um annan og dýrari fatnað. Þá á ég ekki við mikilvægi þeirra, heldur öðru fremur aðgengi. Bróðir minn lenti til dæmis í þónokkrum erfiðleikum með að finna sér stuttbuxur á Ítalíu og ekki batnaði leitin þótt þörfin væri gríðarleg.

En fyrir utan ferðageislaspilara, einn disk, myndavél og tvær bækur tek ég aðeins með mér nauðsynjar. Ólíkt þeim sem drösla heilu hljóðfærunum og steríógræjum með sér. Ekki skil ég þá sem því nenna, en það er ágætt að þeir geri það. Við strákarnir tökum hins vegar einföldu leiðina og höfum með okkur i-Pod og ferðaútvarp. Það sparar okkur bæði tíma og vesen.

112306346040651038

Saga gærkvöldsins er ekki birtingarhæf á þessum síðum, en hún gæti heitið „Raðir afar óheppilegra atvika“. Hún gæti líka heitið „Ys og þys og hálfvitaskapur út af engu“, „Margt gerist í asanum“ eða „Kaldhæðni örlaganna“. Raunar ætti hún að heita öllum þessum titlum. Nú vill kannski einhver heyra söguna en ég geri sjálfum mér ekki þann óleik að birta hana hér og lesa hana aftur í DV eða Blaðinu. Ég birti hana kannski þegar hún er orðin gömul og fyndin, en ekki ný og hræðileg.

Fréttirnar síðastliðna daga hafa ekki aukið á gleði mína fremur en venjulega. Ungur maður var myrtur með öxi af fjórum piltum í Liverpool, vegna þess eins að kærastan hans var hvít en hann ekki.
Kynþáttatengdir glæpir hafa aukist um allt að 600% í kjölfar hryðjuverkann í London, ef marka má Morgunblaðið.
Kona í Þýskalandi myrti öll börnin sín níu skömmu eftir að þau fæddust á árunum 1988 til 2004 og gróf líkin í garðinum sínum.
Bush vill láta kenna börnum að þróun lífvera hafi orðið fyrir tilstuðlan guðs.

Þetta síðasta er raunar bannað samkvæmt stjórnarskrá Bandaríkjanna. En síðan hvenær hafa menn látið stjórnarskrár stöðva sig.

Jæa. Þetta var ansi ómarkvisst og klént hjá mér. Reyni að skrifa eitthvað sniðugt áður en ég flýg af landi brott.