Vandræði í paradís

Það hefur komið í ljós að menn þurfa að skrá sig inn sem notendur að Blogginu um veginn til að geta skilið eftir athugasemdir undir nafni. Þar sem ég kann ekki að skrá notendur (og vil það ekki, ég vil að menn geti skilið eftir sínar athugasemdir án þess að þurfa að skrá sig inn í hvert skipti) vil ég biðja lesendur um að skrifa nafn sitt neðan við athugasemdir sínar. Fleira var það ekki á þessu ári, eigið gleðilegt nýtt.

Gamlárskvöld

Utan sprengingarnar sem hafa varað nú í nokkra daga líður mér ekki eins og það sé komið gamlárskvöld. Áramótin hafa hingað til alltaf verið mjög áþreifanleg fyrir mér sem tímamót, endir hins gamla og upphaf einhvers enn betra, eða það hefur mér í það minnsta fundist. Nú finnst mér dagurinn hafa verið svo óræður, svo sjálfum sér og öðrum dögum líkur, að ég er ekki enn kominn í neinn áramótafíling. En það kemur. Það er ekki annað hægt á miðnætti, þegar líkast er ragnarökum að sjá yfir borgina.

Jamm

Í dag gerðist ég svo frægur að afgreiða ekki aðeins Steingrím Jóhann Sigfússon (þá hefur VG-þrenningin öll notið minnar ljúfu þjónustu) heldur einnig Katrínupúnkturis. Þeirri síðarnefndu láðist mér að segja að skúffurnar fylgja ekki skrifborðinu. Ég vona að hún hafi vitað það …

Síðan er enn í skralli en við vonum að það lagist fljótlega. Við? Kannski er það aðeins ég sem vona það. Sjáið þið annars hvað gerðist? Núna minnkar textinn milli greinaskila! Böggböggböggböggbögg.

Uppfært:

Nei, nú skil ég ekkert hvað gerðist. Textinn er æði misjafn í stærð þykir mér.

Síðan í skralli

Síðan er öll í drasli eftir umskiptin og ég verð að játa mig sigraðan. Kerfið er svo einfalt að mér er fyrirmunað að læra á það. Ég get til dæmis ekki eytt þessum bjánalegu tenglum á þetta útlenda lið sem ég þekki ekkert, né heldur bætt inn mínum eigin, né neitt. Jahérna, en þetta hlýtur að koma.

Uppfært:

Mér gengur brösuglega að koma mér upp nýju útliti. Veit einhver hvort ég hafi yfirhöfuð heimild til að uploada nýju útlitsþema á heimasvæðið mitt? Það eru tvö sem ég er að gæla við, þetta og þetta.

Annað, er ekki hægt að velja allar þær færslur sem ég vil breyta á sama tíma, eins og í MT? Þarf ég m.ö.o. að manúalt breyta hverri færslu svo hún sýni rétt ártal, rétta klukku o.s.v.?

Jólagjafir o.fl.

Margt fékk ég ágætt í jólagjöf nú í ár. Raunar fékk ég flesta pakka, aldrei þessu vant. Þegar ég var lítill fékk ég iðulega flesta pakka, vandist svo af því upp úr gelgjunni og finnst það núna ekkert skemmtilegt að fá fleiri pakka en aðrir. Af því sem ég fékk mætti helst nefna ljóðabókina Hætti og mörk eftir Þórarin Eldjárn, hverja ég hef nú þegar lesið og get sagt að er stórfín, Argóarflís Sjóns, Stóru orðabókina, Hugsjónaeld (æfisaga Einars Olgeirssonar), Íslandsatlas Eddu, Um skáldskaparlistina eftir Aristóteles og 50 ml. flösku af skuggalegu, tólf ára gömlu dönsku viskí sem virðist ekki heita neitt. Allt góðar gjafir sem ég er þakklátur fyrir að hafa fengið.

Nú eru það matarboðin hægri vinstri sem gilda. Æ, hvað ég nenni því ekki.

Svo, að hinstu, þá er kannski rétt að taka fram að breytingar verða á Kaninkunni von bráðar og skipt verður um bloggkerfi. Lesendum þarf því ekki að bregða þótt síðan mín líti skyndilega svona út.

Aðfangadagur jóla anno 117 post Þórbergur

Eru jól? Mér finnst þau ekki eigi að koma fyrr en eftir viku. Hvernig væri að hafa aðfangadag alltaf á fyrsta almennilega snjódegi desember eða seinna? En það er lítið hægt að gera í því núna, svo ég óska öllum (þér líka) æðislegra jóla og góðs gengis við að fræsa út skötulyktina frá því kvöldinu áður!

KOЯN

Er ömurleg hljómsveit. Það sést best á stafsetningunni, ef tónlistin var þá ekki nógu fráhrindandi. Ætli rússar tali um Kojan? Nei, áreiðanlega eru þeir kúltíveraðri en svo. Sannur rússi léti ekki sjá sig talandi um lægri listir en Púskín og Dostójevskí, jafnvel þótt hann stæði milli bolsévískrar aftökusveitar og afturgöngu Ívans ógurlega, hver héldi á rifjárni. Hmm, já.

Jólatónleikar

Ég lét loksins verða af því og fór á jólatónleika í gærkvöldi. Tónleikarnir voru haldnir í Víðistaðakirkju og þar sungu MS-kórinn og unglingakór kirkjunnar. Báðir kórar stóðu sig frábærlega, vissulega þekki ég ýmsa og margvíslega úr MS-kórnum og þarf því að þykja hann betri (nei, það er ekki hægt að bera svona saman), en best fannst mér þegar þeir sungu saman lagið Jól eftir Jórunni Viðar, ömmu Einars Steins, sem er meira skyld mér en ég honum (merkileg þessi ættfræði), við undirleik Moniku Abendroth hörpusnillings og frábærs þverflautuleikara, sem ég skammast mín fyrir að muna ekki nafnið á.

Það er því ekki öll von úti fyrir Trölla, fyrst honum tókst að komast í jólaskapið í gær. Virkilega fallegir tónleikar og góð stemning. Með þökk til þeirra kórfélaga sem lesa, sérstaklega þó til hennar sem lét mig vita af tónleikunum.

Uppfært:
Það var líka gaman að fá að klappa í kirkjunni. Hélt það væri alveg bannað.

S.s.

Nei, ekki þeir, heldur skammstöfunin. Hvarvetna finnst mér ég rekast á ranga notkun skammstöfunarinnar s.s. sem stendur fyrir svo sem og er oft notuð á undan upptalningu. Hún stendur ekki fyrir sumsé eða samasem, þótt merkingarlegur munur sé ekki ávallt mikill m.t.t. samhengis. Ég veit ekki hvort einhver regla gildi um það, en mér þykir aukinheldur ósmekklegt að nota hana í merkingunni svo (gott) sem (dæmi: Ertu saddur? Svar: Já, ég er s.s. saddur (fokk, hryllingurinn!)). Þetta er þó ekki svo algengt að taki því að láta það fara í taugarnar á sér. Svo veit ég ekki um fagurfræðilegt mat annarra.

Leiðréttingar ávallt velkomnar nema rangar séu.