Að mér sækja hugmyndir úr öllum áttum. Nú hef ég þríþætt skema til að fylgja eftir. Það verður flókið, kostnaðarsamt og tímafrekt, en ef allt gengur eftir mun ég mögulega eiga eitthvað eftir til að kallast stoltur af.
Vona að þetta sé ekki eintómar skýjaborgir. En nú er það námið, sú daðrandi frilla.
Ég er kominn með það! Það er lag og það er í dúr (merkilegt nokk). Það átti að vera lokakaflinn í þessum þríleik en svo passar það ekki við lok annars kafla. Það þýðir að ég þarf að endursemja annan kafla, sem er allt í lagi vegna þess að hann sökkar. Einnig hefur komið upp úr dúrnum að heildarverkið verður ekki allt rómansa. Sem er fínt vegna þess annarsvegar að hún er of afmörkuð, hinsvegar vegna þess ég er ekkert sérlega merkilegur gítarleikari. Það skapar samt viss vandamál þegar kemur að því að tengja alla hlutana saman. Ég er raunar ekki allsendis viss um hvort ég vilji hafa það þríleik. Fyrsti hlutinn er dapur, annar hlutinn er eins og áður segir í skralli og þriðji hlutinn er nær fullkomin hamingja. Eiginlega er alltof flókið fyrir mig að vinna úr þessu. En kannski verður á endanum til regla úr nógu miklum kaos.