Fyrirspurnir krefjast leiðréttinga: Nei, ég felli ekki hug minn til sætu bakarísstelpunnar. Fallegt afgreiðslufólk er konsept sem út af fyrir sig gæti verið áhugavert að skoða á huglægan, frumspekilegan máta, en heimilar ekki mikið persónulegra návígi en „góðan daginn“, ellegar gætu menn orðið fyrir þvílíkum medúsuhrifum að þeir breytist í stein. Hvur veit nema þaðan komi mölin á bílastæðið við bakaríið.
Nú, ég hef ákveðið að gerast fjölþjóðlegri og héðan í frá heiti ég M’butu Allah Toshimo Stefánsson Zoëga. Eða héti ef ég væri ekki að grínast. Og hvað megið þið læra af því, börnin góð? Jú, að trúa ekki öllu því sem þið lesið. Á þessari síðu er ágætis vísbending um grín ef u kemur fyrir sem áherslusérhljóð í spurnarfornafni. Það er þó annarsvegar ekki alltaf og hinsvegar er það ekkert algilt þótt svo sé. Ekkert frekar en nokkuð annað. Höndliði annars slíkan ógnarsannleik?
Jæa, nú er það stífur lestur um siðskiptin. Ef væri ég sannur Íslendingur træði ég Jóni Arasyni hvar sem við væri komandi í kaflann um siðskiptin. En ég er ekki sannur Íslendingur. Og hvorki hef ég neinar sérstakar mætur á honum né þeim sem tóku af honum hausinn. Raunar finnst mér það dáldið langt gengið í gríninu hjá þeim. En margt hafa nú menn svosum gert fyrir minna.