Loksins meira Eurovision. Næstu fimm lög til umfjöllunar. Fyrsta landið sem við lítum á er…
Albanía: Þetta er þrælskemmtilegt lag. Góð stemming í því og viðlagið mjög flott. Verulega flott Eurovisionstemming í gangi. Ég vona að þeir skemmi þetta ekki með því að syngja á ensku í keppninni. Verður samt að viðurkennast að lagið á kannski ekki mikla möguleika nema meðal næstu nágranna Albaníu. Mér finnst lagið samt skemmtilegra en íslenska lagið. Næsta land er…
úkraína: Ég verð að viðurkenna að mér finnst svona tónlist leiðinleg. Mér skilst að þetta rappform sé vinsælt víða um heim um þessar mundir og sé gjarnan notað þegar koma þarf þjóðfélagsádeilu eða mótmælum á framfæri eins og raunin mun vera með þetta lag. Ég held að það hafi samt ekkert erindi út fyrir úkraínu. Spurning samt hvað unglingarnir gera í símakosningunni fyrst þetta er svona rapp? Verra en íslenska lagið. Þá skulum við kíkja á…
Bretland: Þetta er ágætlega frambærilegt popplag en því miður alveg nákvæmlega eins og hundrað önnur popplög sem maður hefur heyrt undanfarið, nema með smá fiðluleik með sem á að höfða til Austur-Evrópubúa. Ég meina: „Touch my fire, can you feel the heat?“ Þetta er nú enginn heimsklassa skáldskapur. Líklega svipað og íslenska lagið en mér finnst þetta leiðinlegra. Og þá kemur næst…
Tyrkland: Mér finnst leiðinlegt hvað tyrkneska lagið er leiðinlegt í ár því þeir hafa oft verið mín uppáhaldsþjóð. T.d. er „Dinle“ með Sabnem Pacer uppáhalds Eurovisionlagið mitt. Þetta er hins vegar slakt og aðalstefið stolið úr ummræddu lagi „Dinle“. Mun verra en íslenska lagið. Kíkjum þá í lokin á…
Sviss: Svissarar koma verulega á óvart í ár því hingað til hafa þeir yfirleitt verið frekar ömurlegir. Nema náttúrulega þegar Celine Dijon söng fyrir þá. Nú senda þeir lag sem er mjög sterkt, melódískt, kraftmikið og grípandi. „Cool wibes, why don’t you kill me?“ Grundvallarspurningu varpað þarna fram í heimsklassa textagerð. Þetta er líklega sigurstranglegasta lagið sem ég hef heyrt hingað til ásamt Þýskalandi og Hollandi (kannski Grikklandi líka). Talsvert betra en íslenska lagið.
Þá læt ég þessu lokið í bili en enn á ég eftir að fjalla um: Spán, Slóveníu, Júgóslavíu, Rússland, Rúmeníu, Pólland, Noreg og Mónakó. Merkilegt hvað það eru mörg lönd farin að taka þátt í þessari keppni. Ég held að ég þurfi tvær færslur í viðbót um þetta og svo byrja ég náttúrulega aftur þegar kynningarþættirnir verða í sjónavarpinu. Ókey, bæ…