Eggert Sólberg

Ég hef hingað til varað við því þegar ég tala um fótbolta hér og held því áfram. Þessi færsla er semsagt um fótbolta.  

Aston Villa hjartanu mínu líður ekki vel þessa dagana og hefur eiginlega ekki gert það frá því í september. Ég bara get ekki verið sáttur þegar lið eins og Reading, Tottenham, Portsmouth og Blackburn eru fyrir ofan liðið mitt í töflunni. Á miðvikudaginn tapaði liðið fyrir einhverju lélegu og nánast óþekktu Lundúnaliði og næstu tveir leikir eru við Liverpool liðin á Villa Park. Þeir ættu nú reyndar að vinnast.

Það eru jákvæðir punktar sem fylgja því að halda með Aston Villa. Á meðan ég horfi á fullorðna karlmenn gráta yfir því að liðið þeirra detti út úr Meistaradeildinni bendi ég á að með því að halda með Villa er hægt að koma í veg fyrir það. Villa er einfaldlega ekki með í keppninni og við sem styðjum liðið grátum ekkert fall á meðan.