Opið bloggbréf til Þráins Bertelssonar
Ji hvað allir voru æstir þarna í fyrradag. Hinir mætustu menn hingað og þangað kepptust við að útmála skoðanir sínar á málunum (undirritaður ekki undanskilinn). En sumum þótti mér nú heldurbetur mælast hugsunarlausar en öðrum. Sérstaklega þótti mér sem Þráinn Bertelsson hefði mátt stilla hug sinn ögn betur en hann tók að úthrópa sig á tölvuöld.
(og gírar þá mælandi sig niður um persónu)
Merkilegt Þráinn, að núna, nákvæmlega tveimur sólarhringum síðar, hafa 44 skilið eftir skilaboð við þessa færslu þína, og ekki einn einasti þeirra sýnist mér hafa skammað þig fyrir þá glórulausu fordóma sem þú sýnir í garð geðsjúkra:
“Það er kominn tími til að Alþingi skipi sérstaka rannsóknarnefnd sem rannsakar hin geðveikislegu viðbrögð við mótmælaaðgerðum trukkabílstjóra. [...] Ég mótmæli því að hafa lengur yfir mér hernaðardýrkandi dómsmálaráðherra með geðvillta ofbeldisseggi í sinni þjónustu. Aðrir en geðvillingar beita varnarlaust fólk ekki ofbeldi.” (áherslubreytingar mínar)
Mér blöskrar að lesa þetta Þráinn.
Mér. Hreinlega. Blöskrar.
Ég tek sem gefið að þessi orð hafir þú sjálfur skrifað í eigin stundargeðshræringu – að þú hafir ekki meint þetta í alvörunni. En ummælin eru engu að síður til minnkunar þeim sem mælti.
Svo það sé á tæru: Geðsjúkt fólk er upp til hópa mestu friðsemdargrey sem fæst gera flugu mein. Og lokasetning færslu þinnar er svo himinhrópandi röng að maður veit ekki einusinni hvort skal hlæja eða gráta: Það þarf enga geðsýki (geðvillu?!) til að beita varnarlaust fólk ofbeldi. Bara vænan kokteil af siðblindu, hroka, mannfyrirlitningu, skeytingarleysi og sjálfbirgingshætti, hrært útí stjórnlausa reiði eftir smekk. Eða þessvegna bara fullkomlega yfirvegaðan, einlægan ásetning.
Fullt af fólki beitir varnarlausa meðborgara sína ofbeldi. Sumt í vímuæði, sumt vegna skorts á alminlegu uppeldi, sumt af því að það er bara í vinnunni. Í langfæstum tilvikum hafa geðsjúkdómar nokkuð með málið að gera. Ef þú vilt væna lögregluna um illmennsku, gerræði, heigulshátt, jú-neim-itt, þá skaltu bara gera það, takkfyrir. Ekki draga inn í myndina hugsunarlausa fordóma gegn hópi fólks sem má alveg við því að losna undan þeim, takk fyrir.
Að lokum: Það getur komið fyrir hvern sem er að láta útúr sér einhverja vitleysu í augnabliks æsingi og hugsunarleysi. En það er ekki þar með sagt að það eigi ekki að skammast sín fyrir það (spurðu bara Láru Ómarsdóttur).
Æ skammastuðín Þráinn.
Sveiðér bara.
Því miður get ég ekki orðið við ósk þinni, Hrannar, þótt ég feginn vildi. Ég nota orðið geðvillingur í þrengslu merkingu þess orðs, en geðvilla er heilkenni sem um 2% manna líða af. Sumum gengur vel í lífinu og tekst að hemja eða fela fyrirlitningu sína á borgaralegum gildum. Sumir eru prestar, bankamenn – en sérlega margir lenda í fangelsum af því að þeim tekst ekki að hemja ofbeldishneigð sína. Sumir smygla sér inn í lögregluna í von um að geta þar fengið útrás fyrir það ofbeldi sem þeir þrá. Þetta gildir ekki aðeins á Íslandi heldur alls staðar á byggðu bóli.
Mótmælendur við Rauðavatn ógnaðu ekki valdastofnunum ríkisins, þinghúsi, ráðuneytum, útvarpi eða öðrum lykilstöðvum. Þetta voru heimskuleg mótmæli barin niður á ennþá heimskulegri og ólýðræðislegri hátt.
Mér finnst leiðinlegt að vera sveiað fyrir skoðanir mínar.
Óska þér alls hins besta.
Þráinn Bertelsson
25 apríl 08 at 16:02
Þráinn, ég legg til að þú lesir aftur það sem Hjörvar skrifaði. Já, hann heitir Hjörvar, ekki Hrannar. Það er hreinlega eins og þú hafir ekki meðtekið neitt af því sem hann bendir þér á. Það að þú segist nota orðið geðvillingur í þrengstu merkingu þess orðs ýtir einmitt undir það sem hann er að benda þér á. Blessaður skoðaðu þetta aftur og sjáðu hvort þú getir ekki endurskoðað orð þín um geðsjúka.
Magnús
25 apríl 08 at 20:04
Velkominn Þórarinn! Komdu fagnandi!
Ekki ætla ég mér þá dul að skammast út í nokkurn mann fyrir að hafa skoðanir. Onei onei. En tökum snöggvast fyrir eftirfarandi:
“Aðrir en geðvillingar beita varnarlaust fólk ekki ofbeldi.”
Nú verð ég að játa uppá mig að kannski er “geðvilla” einhver furðulegur krankleiki sem ég veit ekkert um: Orsök allra okkar skefjalausu illverka, allt þetta runnið undan rifjum 2% mannkyns. Ég finn að minnsta kosti ekkert um þetta í orðabók. Er eitthvað að finna á wikipediu?
Nei enga svona vitleysu.
Þetta var í raun það eina sem fór það mikið í taugarnar á mér í reiðilestri þínum að mér þótti orðum á það eyðandi, út af fyrir sig (og bara til að fyrirbyggja misskilning – þarna var sitthvað sem ég gat sosum tekið undir, þannig lagað). Af því að þetta er ekki skoðun. Þetta er fullyrðing. Og hún svo röng að ef það væri ekki svona grátlegt þá væri það aðhlátursefni.
Fólki er fullfrjálst að slengja fram fullyrðingum, og það meiraðsegja röngum fullyrðingum. En sá sem það gerir má þá búast við að vera bent á að hann fari villur vega.
Þú skilur hvað ég er að fara – er það ekki, Þrumarinn?
(Einnig þakka ég Mongúsi fyrir ágætt innlegg.)
Hjörvar
25 apríl 08 at 22:34