Gneistinn

Bókamarkaðurinn var mjög fínn, ég hefði getað eytt miklu meiri pening þarna en náði að hemja mig. Fyrsta bókin sem var ákveðið að kaupa var Sál Aldanna sem fjallar um íslensk bókasöfn í gegnum tíðina, hún kostaði bara 400 og því mjög góð kaup. Ég keypti dáltið af bókum sem eiga að hjálpa mér í baráttunni við trúarnöttarana, um þær verður fjallað seinna.

Ég keypti mér örþunna bók sem heitir Að skilja heimspeki Descartes á 200 kall, ef hún virkar þá er spurning hvort heimspeki Descartes sé þess virði að skilja hana.

Ég keypti eina eintakið af ljóðabók Sverris Páls Þú og heima sem var á fáránlega lágu verði.

Ég keypti síðan bókina Í leit að konungi eftir Bloggara Dauðans, einnig á afar lágu verði.

Síðan keyptum við bókina Blót í norrænum sið.

Þetta var semsagt mjög góð ferð…

Ég svaf í þrjá tíma í nótt, fór í skólann, kom heim, fór að skrifa, skrifaði til klukkan 18:00, fór í sturtu, fékk fólk í heimsókn, kláraði að skrifa, skilaði ritgerðinni, kíkti í DV, fékk áfall, spjallaði, jafnaði mig, fór á tónleika, kom heim og enda af einhverjum ástæðum í því að skrifa færslu um þetta allt.

Ég skrifaði semsagt um 2300 orð á innan við sólarhring og náði líka að fínpússa ritgerðina. Árangur. Mig grunar hins vegar að sá tími sem ég eyddi til að dunda mér þessa viku hafi ekki verið sóað heldur verið nauðsynlegur þáttur í að byggja upp ritgerðina.

Ég gleymdi líka að minnast á að ég skrifaði grein sem spyr Hvers vegna geta vísindin ekki mælt guð?.

Við fórum í hópferð í Stúdentakjallarann að sjá Eivöru syngja og spila. Einsog vanalega mættum við Eygló fyrst og náðum að taka, við enduðum síðan 8 (9 með pabba Nils) með 5 sæti. Það var nefnilega svoltið mikið af fólki þarna, troðfullt reyndar. Ég tók nokkrar myndir af Eivöru og sýndi fólkinu í kringum mig sem var ekki nógu hávaxið til að sjá hana.

Hljóðkerfið var ekki alveg að þola Eivöru á köflum en skemmdi ekki upplifunina. Hún tók mörg lög sem ég hafði ekki heyrt hana taka áður og flest voru þau stórkostleg.

Ég er alveg miður mín, afskaplega miður mín yfir því að hafa haft hann út í þetta. Hefðum bara átt að segja flatt nei af því hann var hikandi í stað þess að bæta þessu “ef” inn í en ég bjóst ekki við þessu. Innilegar samúðarkveðjur. Ég öfunda samt hann eiginlega af potinu frá guði, vona að hann hafi húmor fyrir því…allavega einhvern daginn.

Greinin er allavega frábær þó umbúðirnar hefðu getað verið virðulegri.

Þegar ný höfundarréttarlög voru sett í Danmörku nýlega þá sagði yfirmaður millisafnalána að lögin væru svo ströng að þau gerðu bókasöfnum ómögulegt að sinna hlutverki sínu og lýsti því yfir að hann myndi ekki fara eftir þeim. Miðað við það sem ég hef lesið um þessi lög þá er þetta hárétt hjá honum, þróun höfundarréttar síðustu 50 ár er alveg fáránleg.

Bókasafnsfræðingar eru töffarar.

Í febrúar 1983 var gerð könnun um útlán bóka í Bæjarbókasafninu í Keflavík, þar kom í ljós að af 190 eintökum af bókum Halldórs Laxness sem voru til voru einungis 9 útlán, af bókum Jennu og Hreiðars voru til 97 eintök en ekkert var lánað af þeim. Þetta eru einkar áhugaverðar tölur í ljósi þess að á þessum tíma fengu höfundar borgað fyrir fjölda eintaka sem voru til á söfnum en ekki fjölda útlána, greinilegt að þetta var afar ósanngjarnt kerfi.

Það er hræðileg örlög að vera að drepast úr stressi yfir Gettu betur, hvað þá að þegar maður er allt í einu farinn að halda með MR! Ég er miður mín. Áður fyrr var það hefð að halda með öllum gegn MR (nema náttúrulega Versló). Ef MR fór úrslit með Versló þá fór ég í fýlu.

Og þeir höfðu þetta, fróðleikspunktar mínir um bókasafnsfræði komu greinilega ekki að neinu gagni enda er líklegt að Stefán þori ekki inn á þá braut eftir ISBN klúðrið. Ég var afskaplega feginn þegar MH sagði að Russel Crowe væri frá Ástralíu, hjúkkettíhjúkk.

PS ef MR-ingar vilja fá punkta hjá Stefáni þá ættu þeir að sleppa Gaudeamus.

Mig langar að nýta litlu lélegu myndavélina mína til að láta inn einfaldar og skemmtilegar myndir úr daglega lífinu, ef ég nenni. Vandamálin er hins vegar nokkur. Fyrst skal telja formvandamálið, þegar myndirnar koma úr vélinni eru þær á bmp formi en ég vill hafa þær á jpg formi. Ég myndi síðan helst vilja taka og minnka myndirnar því þær verða alltaf fallegri svoleiðis. Síðan er málið að koma þeim á netið. Það ætti að vera einfalt af því Háskólasvæðið er drif hjá mér en þegar ég læt myndir beint þangað verð ég að breyta stillingum á myndum til að fólk geti séð þær og það geri ég ftp-forriti (það hlýtur að vera til betri aðferð) þannig að einfaldara væri að senda myndirnar beint með ftp. Síðan þarf maður að útbúa html handvirkt til að skella þeim í færsluna. Þetta mætti vera einfaldara, einhverjar hugmyndir?

Ég hef haldið þessa dagbók í tvö ár, aldrei hef ég tekið mér langt frí, líklega hafa aldrei liðið nema kannski þrír dagar milli færslna og það hefur ekki gerst oft. Hef ég eitthvað að segja á þessum miklu tímamótum? Jú, kannski. Þetta hefur yfirleitt verið afskaplega gaman og það er þess vegna sem ég nenni þessu.

Höfundarréttur einsog hann er í dag á sér uppruna í breskum lögum frá 1710. Þau lög eru einkar áhugaverð af því í þessum lögum var skýrt kveðið á um að til þess að höfundarréttur gilti um bækur þá þyrfti að skila inn eintökum á sjö bókasöfn.