Gneistinn

Ég missti af mestu af þessu REI dóti af því ég var úti á meðan því stóð. Mér þótti því ógurlega fyndið að sjá brot því besta úr því dóti í fréttaannálnum.

Í gær fengum við Brján og Helgu í spilamennsku. Við byrjuðum á að taka tvær umferðir í Simpsons Cluedo. Í seinni leiknum breyttist taktíkin hjá fólki töluvert. Við tókum líka Astrópíu. Mér fannst það virka líka vel í stærri hóp en stóð kannski fulllengi. Það er kannski tengt því að allir voru að læra.

Við skruppum í gær í Spilavini sem er nýleg spilabúð á Langholtsvegi. Spilavinir er með fínt úrval af spilum. Sum spennandi, önnur ekki eins og gengur og gerist. Það sem mér fannst helst vanta var nördaspil. Það er væntanlega einhver stærsti markaðurinn og þau missa af miklu með því að láta hann vera. En kíkið þangað ef þið hafið áhuga á spilum.

Það var orðið of langt síðan við höfðum spilað við Frey og Auði þannig að við skruppum þangað. Byrjuðum á því að spila spil sem þau eiga sem byggir á frönsku byltingunni. Hálfgert fræðsluspil í raun. Það var mjög skemmtilegt. Auður vann báða leikina en Freyr var að skutlast með Steinunni systur sína á meðan.

Við tókum síðan nýju Trivial spurningarnar. Munið þið eftir fyrstu Triviulunum? Þá voru 6000 spurningar. Í þessum spurningapakka eru 600 og þar af helmingur fyrir börn. Ég efast um að við getum notað þessar spurningar aftur í bráð þar sem við vorum allavega komin á þriðju umferð. Get ekki sagt að ég mæli með að fólk kaupi þennan pakka (en er þó þakklátur Hafdísi og Mumma fyrir að hafa gefið okkur þetta). Ég sigraði að lokum eftir að hafa náð grunsamlegri forystu á meðan húsráðendur fóru fram.

Lokaspilið var Ticket to Ride. Freyr og Auður höfðu aldrei spilað þetta áður og hrifust af því. Þetta er líka vel hannað spil. Helsti kostur þess er að umferðirnar ganga fljótt yfir og maður er því alltaf að gera eitthvað.

Þegar okkur þótti klukkan og margt og við of þreytt til að spila meira fórum við að spjalla um hitt og þetta í töluverðan tíma. Mér brá þegar ég sá að klukkan var orðinn 2:45. Maður á ekki að halda vöku fyrir barnafólki svona frameftir. En við verðum að endurtaka þetta við tækifæri.

Já, ég er að bíða.

Við fórum á The Golden Compass áðan. Að mínu mati frekar slök aðlögun. Öll framvindan var of auðveld einhvern veginn. Manni fannst persónur of oft vera að reyna að æla úr sér eins mörgum plottatriðum eins fljótt og þær mögulega gátu. Breytingar frá bókinni voru yfirleitt ekki til góðs. Lengri mynd hefði verið betri. Maður veltir jafnvel fyrir sér hvort að nú á tímum hvort að framhaldsmyndaflokkur hefði ekki verið betri lausn en kvikmynd.

Annars þá var allavega fyrsta bókin, og fyrsta myndin, alls ekki andkristileg að mínu mati. Það er hins vegar töluverður áróður gegn kirkjuvaldi. Það er allt annar hlutur en kirkjunnar menn eiga það oft til að rugla þessu saman.

Astrópíuspilið fékk ég frá Eygló og við tókum prufuatrennu í kvöld.

Fyrsta sem maður tekur eftir er fjöldi leikmanna. 2-6 spilarar. Það er gott. Í fyrsta lagi er gott að hafa spil sem tveir geta tekið í og einnig að heildarfjöldinn er nokkuð hár. Þar að auki stendur spilarafjöldi ekki á tvennum þannig að þrír og fimm geta spilað. Alltaf óþægilegt þegar verið að velja spil.

Kannski ég hefði átt að segja að kassinn sjálfur sé það fyrsta sem maður tekur eftir en hann er voðalega stór, í raun óþarflega stór. Spilaborðið hefði mátt brjóta einu sinni oftar saman sem hefði sparað mikið pláss. Þar að auki er kassinn sjálfur illa hannaður. Hólfin sem eru ætluð undir spjöld eru virka ekkert sérstaklega vel og þau geta auðveldlega dottið undir.

Leiðbeiningarnar eru ekkert afskaplega skýrar. Fleiri skýringamyndir hefðu hjálpað mikið. Annars þá eru reglurnar frekar einfaldar en ég geri þó ráð fyrir að ég græði á því að þekkja aðeins til klassískra hlutverkjaleikja.

Í grunninn þá ertu að leika hlutverk einnar aðalpersónunnar úr myndinni. Þú getur verið Hildur (eins og ég var), Flóki (Eygló), Playmolas, Pési, Beta eða Kjartan. Hver persóna hefur ákveðna eiginleika en þó er ekki mikill munur á þeim. Þessar hetjur berjast svo við skrýmsli og nota til þess ýmsa hluti og/eða galdra sem þær geta fengið með ýmsu móti í spilinu. Markmiðið er að ná í nisti og fara með aftur á upphafsreit. Heimferðin er fljótlegri en þá bætist við annar þáttur í leikinn þar sem spilarar geta barist við hvern annan.

Ég fór aðeins framúr mér því upphaf leiksins er töluvert öðruvísi en þar verða spilarar að svara spurningum til að komast áfram. Þetta eru “nördaspurningar” en þó ekkert óhóflega þungar. Þú svarar kannski ekki fjórum af fjórum nema vera nörd en fólk sem er meðvitað um dægurmenningu ætti að geta komist áfram nokkuð fljótt. Þessar spurningar eru líka notaðar á öðrum stöðum á leiknum, til dæmis þegar maður er að reyna að nálgast nistið.

Ég á erfitt með að gefa stjörnur og slíkt en ég get gefið þumal upp. Þegar ég hef spilað nokkrum sinnum í viðbót þá megið þið spyrja mig hvernig þetta virkar með fleiri spilurum, hvernig spilið endist og fleira þess háttar.

Ég fékk góðar og skemmtilegar jólagjafir.

Frá Eygló minni fékk ég náttslopp sem ég var loksins að ná af henni rétt áðan, Astrópíuspilið, Nýdanskrarsafnið Allt, disk með ljóðaupplestri Óskars Árna, maísstönglahaldara og nammi. Síðan fékk ég bókina um Þórberg frá tengdó ásamt nammi. Anna og Martin gáfu mér jóla Simpsons sokka. Frá Hafdísi og Mumma fengum við Trivial spurningapakka. Frá Svenna og Hrönn fengum við frekar spes sleifarhaldara, blómavasa og kartöflubursta. Fengum jólakertakalla frá Rósu og Jónbirni. Við fengum konfekt frá Danna.

Ég hafði mikið velt fyrir mér hve svipaðir pakkarnir frá Eggert og Dagbjörtu voru. Ég giskaði á Masterskall frá Eggert og ég var ekki langt frá því. Það var bókavarðardúkka. Frá Dagbjörtu var það hins vegar Freud sjálfur í dúkkuformi. Það mun væntanlega hjálpa mér í freudískri greiningu á þjóðfræðiefni í framtíðinni. Kíkið á myndina í færslunni hér að neðan til að sjá mynd af leikföngunum mínum.

Ég gaf Eygló Simpsons Cluedo, Heima með Sigur Rós (en reyndar gaf tengdó það líka í möndlugjöf) og sérstaka viðhafnarútgáfu af The Joshua Tree með aukadiskum og stöffi. Ég giska að aðrir sem ég gaf gjafir séu búnir að opna líka en ég ætla samt ekki að telja það allt upp.

Í dag þurfum við að fara að ákveða hvernig spilamennsku á jólunum verður háttað. Hvern langar að leika?

Stundum þarf maður að ganga í öll hlutverkin.

Ég hef nú lengi stefnt á að búa til svona mynd eins og Matti gerir gjarnan. Ég held að þetta sé fyrsta alvöru tilraunin samt.

Þá er búið að horfa á Muppet Family Christmas og þá geta jólin komið.

Í fyrra setti ég inn jólakveðju á bloggið mitt sem mér fannst nokkuð vel heppnuð og ég held að ég birti hana bara aftur þó ég uppfæri reyndar myndina.

Ég óska fjölskyldu minni, vinum, kunningjum, skólafélögum, fyrrverandi vinnufélögum, lesendum og öðrum velunnurum fyrr og síðar gleðilegra jóla.

Ég vona innilega að jólin verði ykkur góð og að þið getið slappað af með ykkar nánustu. Ég vona að þið hittið fólk sem þið hittið ekki nógu oft.

Ég óska ykkur þess að þið fáið þessa notalegu indælu tilfinningu sem ég fæ um jólin. Ég vona að þið borðið vel og mikið af góðum mat.

Ég vona að þið sofið út við öll tækifæri. Ég vona að þið fáið góðar gjafir (en ef þið fáið ekki nógu góðar gjafir frá mér þá skulið þið ekki hika við að reyna að fá þeim skipt).

Ég óska ykkur líka gleðilegs árs og þakka það sem er að líða. Ég vona að við eigum góðar stundir saman á næsta ári og næstu árin.

Í stuttu máli þá óska ég þess að þið látið ykkur líða vel um jólin og reyndar bara alltaf.

Gleðileg jól!

Óli