Gneistinn

Ég ætlaði að kaupa steikingarfeiti í dag fyrir laufabrauðsgerðina á sunnudag. Kemur þá í ljós að ekkert var til frá Kristjánsbakarí. Ég veit ekki alveg hvað ég ætti að nota í staðinn. Er einhver með ráð?

Ég voni að ég fitni ekki af þessum kökuafgöngum.

Þetta var voðalega gaman. Ég byrjaði að undirbúa kleinubakstur upp úr níu í morgun. Binni kom síðan upp úr tíu og sá um að steikja. Mér sýndist vera almenn gleði með kleinurnar á Austurvelli. Allir á því að þetta væri nú alveg ekta, ekki svona eins og maður kaupir í bakarí sem inniheldur bara hveiti og loft. Ég var semsagt ánægður með þetta.

Og á næsta ári notum við víst rafkerfi.

p.s. ég elska Moggabloggara.

Laufabrauðið er búið og gert. Gaman alltaf að fá fólk í heimsókn.

Minnisatriði. Ein uppskrift gerir um 55 kökur. Cirka.

Dagurinn var skemmtilegur.  Fyrsti tíminn í þjóðfræði skilningavitanna.  Ég mætti snemma og hjálpaði Bendix að gera sig klára.  Margar áhugaverðar pælingar.  Norræna Húsið í hádeginu.  Þangað hef ég reyndar ekki komið síðan ég fór þangað á sekkjapíputónleika fyrir rúmu ári.  Hlakka til næsta tíma.

Þegar ég kom heim gerði pönnukökur og er því afar saddur.  Ég efast um að kvöldmatur verði snæddur fyrren sein í kvöld.

Það er laufabrauðsdagur, reyndar er fjörið búið en gaman var það. Ég byrjaði að búa til deig og fletja út um klukkan níu í morgun. Um tíuleytið kom Dagbjört og hjálpaði mér fyrst að fletja út en fór síðan í útskurð. Eggert bættist síðan við og fólk kom þá kolli af kolli. Halli, Rósa, Eva, Jóhanna, Marie og Danni. Ég hélt áfram að fletja út einn og hin voru að skera út en síðan kom Eggert að hjálpa mér. Ég steikti síðan bæði laufabrauð og afganga. Marie var í fyrsta skipti í þessu en hin höfðu öll verið áður í laufabrauðsgerð. Ég útskýrði fyrir henni að laufabrauð væru í raun tilkomin vegna kúgunar Dana.

Þetta gekk allt mjög vel, deigið var betra en áður og ég náði líka að fletja það vel út þannig að ég held að ég hafi fengið um tvöfalt fleiri kökur úr því en í fyrra. Hugsanlega eru kökurnar hátt í hundrað (ég bætti við hálfum skammti í viðbót til að fólk gæti haldið áfram að skera út).

Stemmingin var voðalega indæl og ég held að laufabrauðsdagar séu í raun nálægt því að vera í meira uppáhaldi hjá mér heldur en aðfangadagar.

Myndin sem fylgir færslunni er af köku sem er skorin út af Dagbjörtu, hún á að líkjast mér. Eggert fékk líka eigin köku en mér finnst mín flottari.

Við Eygló erum að stefna að því að gera laufbrauð þann 2. desember næstkomandi.  Þetta er að sjálfssögðu hópathöfn og eru því vinir og kunningjar velkomnir (hvort sem það eru forvitnir Reykvíkingar, brottfluttir Norðlendingar eða þjóðfræðingar í leit að rannsóknarefni).  Látið mig vita.

Note to self: Næst þegar þú gerir kleinur þá skaltu muna að þú er með uppskrift frá ömmu þinni fyrir framan þig og amma þín var kannski með aðrar hugmyndir en þú um hóflega skammta.

Laufabrauð var gert. Fjölda flótti var hjá skólafólki, greinilegt að það er of seint að hafa þetta inn í desember. En þetta gekk vel annars. Ég er aumur í öxlum, handleggjum, höndum og fingrum. Ekki í baki sem er væntanlega því að þakka að hér höfum við eldhúsbekk til að fletja út á. Stefna mín í ár er að borða ekkert laufabrauð þangað til á Þorláksmessu. Ég náði áðan að éta yfir mig af afgöngum sem verður vonandi heftandi fyrir laufabrauðsát næstu vikur.

Það er ljóst að mín laufabrauð eru langbest. Ekki mér að þakka svosem. Uppskriftin er merkt Önnu Guðjóns í *Gulu matreiðslubókinni hennar mömmu*.

Nótur fyrir næsta ár:

Tveir skammtar gera svona 70 kökur.
Fínt að hafa 4 dl á mjólk og 2 dl af vatni í skammti.
Best að gera fletja bara út eina köku í einu.

Ég kommenta síðan hjá sjálfum mér ef mér dettur fleira í hug.

Í gær fór í Hagkaup og einsog í fyrr áttu þeir til djúpsteikingarfeiti frá Kristjánsbakarí, frábært. Á sunnudaginn eftir viku ætla ég að búa til laufabrauð, ég gerði það í fyrsta skipti í fyrra og fékk þá helling af fólki hingað til að skera út, vona að fá jafn marga núna.