Gneistinn

Undanfarið þá hafa verið í gangi auglýsingar frá einhverjum, hugsanlega Húsasmiðjunni, þar sem Hjálmar Hjálmarson er að láta barnavörn í tengla (innstungur) og fjöltengi.  Allt í lagi með það en Hjálmar er að láta svona vörn í frekar flotta týpu af tengli, greinilega nýlega.  Flestir nýjir tenglar eru með mjög góða vörn gegn börnum.  Það er mjög auðvelt að sjá það með því að kíkja inn í tenglana.  Ef það er plast í götunum þá er að öllum líkindum vörn í þeim.

Það er hægt að prufa þetta með að pota með til dæmis penna (plast!) í þetta.  Ef penninn stoppar bara á plastinu þá er þetta góð vörn.  Svoleiðis vörn þarf að ýta með tveimur pinnum í einu, einsog þegar kló er sett í samband.  Það er mjög ólíklegt að börn geti potað í svoleiðis.  En ef þið eruð með gamla tengla og lítil börn þá mæli ég með svona barnavörn.

Viðgerð gærdagsins virðist hafa tekist. Þá veit ég að ég get tekið í sundur og sett saman þvottavél. Gleði mín er almenn. Hefði hugsanlega getað farið styttri leið ef ég vitað hvað ég var að gera en maður á ekki að kvarta yfir slíku.

Ég eyddi núna þremur klukkutímum í að rífa í sundur þvottavél og að setja hana aftur saman. Fyrriparturinn var frekar auðveldur. Hver er sá hlutur sem oftast festast í þvottavélum? Flestir ættu að vita þetta. Ég fjarlægði aðskotahlutinn og setti vélina aftur saman. Ég vona að það hafi tekist. Það var erfitt. Núna er ég að rúlla einni vél til að sjá hvort að þetta sé í lagi. Ekkert lekur einsog er en hver veit hvernig fer þegar vélin fer að vinda. Ég er þreyttur núna.

Það vantaði líklega bara vatn á rafgeyminn. Það er búið að vera endalaust vesen með að starta bílnum síðustu daga. Ég hélt að það væri útaf jukkinu sem safnast hefur fyrir á pólunum og þreif þá vel og vandlega, lét síðan koppafeiti á en það dugði ekki. Í gær þá var Eygló að spjalla við mömmu sína sem minntist á að það gæti verið að það vantaði vatn á rafgeyminn. Ég varð svoltið pirraður við sjálfan mig að fatta þetta ekki fyrr. Í morgun bætti ég vatni á geyminn og Eygló segir mér að eftir það hafi allt verið betra.

Það er undarlegt að vera allt í einu í þeirri stöðu að vera með vandræðabíl. Ég hef verið á þessum undragrip í rúm þrjú ár og dagsdaglega er hann draumur.

Á eftir fer ég að spjalla við fyrrverandi yfirmann minn um hvernig skal ganga frá rafmagninu heima. Annað hvort þarf ég að brjóta úr veggjunum eða einfaldlega lauma smá plasti á vírana.

Sjónvarpið okkar var að deyja, það var orðið leiðinlegt í sumar en lagaðist aftur. Fyrir svona viku tók ég eftir að það var aftur byrjað að klikka aðeins þó það hafi ekki verið áberandi. Síðan ætlaði ég að kveikja á því áðan og þá kom rauða ljósið en engin mynd og ekkert hljóð. Ég kveikti og slökkti nokkrum sinnum en hætti því þegar ég fann smá brunalykt. Veit einhver hvað það þýðir?

Sjónvarpið er orðið 10 ára, kostaði heilmikið á sínum tíma en er líklega alveg búið að vera núna. Margar góðar stundir með því. Líklega kaupum við nýtt sjónvarp á næstunni, förum úr 27″ í 28″.

Ég hef á tilfinningunni að húsverðir í Þjóðarbókhlöðunni og hjá Háskólanum þurfi að fara á námskeið um flúrperur. Það er allavega ekki eðlilegt að perurnar flökti svona hræðilega. Maður skiptir ekki um flúrperur þegar þær drepast heldur þegar þær byrja að flökta. Mig grunar að svona léleg umsjón með flúrperum hafi orðið til þess að þær hafa fengið svona slæmt orð á sig. Muna að skipta um startara í allavega annað hvert skipti ef ekki hvert skipti.

Ef það er stuttur líftími á perum á heimilinu þá er kannski ráð að kaupa sér 240 volta perur frekar en 230 volta. Vandamálið er nefnilega að þó það eigi að vera 230 volta rafmagn á Íslandi þá er það mjög flöktandi og þá er betra að vera í efri kantinum.

Ójá.

Ég var í Lögbergi í dag og sá þar auglýsingu frá Röskvu þar sem var eitthvað verið að tala um millistykki. Ég var ekki að fatta þetta og þurfti að rýna svoltið í myndina til að fatta að þetta var fjöltengi. Ægilega þoli ég ekki svona heimsku. Millistykki er eitthvað sem þú notar yfirleitt bara þegar þú ert að fara til útlanda eða ert með útlenda kló hér á landi.

Þar sem það hafa verið svona glimrandi viðbrögð við halógenljósafærslunni þá mun ég halda þessum flokk áfram. Í dag verður fjallað um grundvallaratriði sem
þvælist mikið fyrir fólki, að kalla hlutunum réttu nafni.

• Þetta sem kveikir og slekkur ljósin er rofi, til eru samrofar, krónurofar, þrýstirofar og svo framvegis en við förum ekki nánar út í það að sinni.
• Ef rofi er á snúru þá kallast sá rofi snúrurofi.
• Útúr rafmagnstækjum liggur snúra (ekki vír) og á endanum á henni er kló.
• Þú lætur kló í samband við tengil (orðið innstunga er líka rétt), tenglar eru fastir í vegg eða á vegg.
• Fjöltengi er látið þar sem þú vilt hafa mörg tæki í sambandi en hefur bara einn tengil, líklega ertu með fjöltengi hjá tölvunni þinni.
• Framlengingarsnúra er þegar þú vil geta látið tæki í samband lengra frá tengli en snúran á tækinu leyfir, á endanum á framlengingarsnúru er hulsa, munurinn á framlengingarsnúru og fjöltengi er að það er bara hægt að láta eitt tæki í samband í framlengingarsnúru.
• Munurinn á kapal og snúru er sá að það er harður vír í kaplinum en mjúkur í snúrunni.
• Það sem þú skrúfar peru í heitir perustæði eða fatning.
• Vír er það sem er inn í köplum og snúrum (mörgu fleiru reyndar, veggjum og rafmagnstækjum).

Þetta gæti litið út einsog ég sé tala niður til fólks en treystið mér þessi orð eru ekkert endilega í orðaforða fólks.  Ef þið hafið spurningar um heiti á rafmagnsdóteríi þá skulið þið endilega spyrja, einnig ef þið hafið tillögur um efni sem get tekið fyrir í framtíðinni.

Eitt sem ég lærði af því að vinna í rafvöruverslun er að það er ekki gott að kaupa sér halógenljós. Í fyrsta lagi þá er hitinn af þessu oft leiðinlegur. Í öðru lagi getur verið hundleiðinlegt að redda sér perum í þetta, verður að vera með vöttin, voltin (yfirleitt 12v en með undantekningum), stærðina og jafnvel fleira alveg á hreinu. Í þriðja lagi getur spennibreytirinn farið, það kostar alltaf pening og getur skapað endalaust vesen.

Ef um er að ræða innfelld halógenljós sem eru algeng í innréttinum þá er reynsla mín sú að flest þessara ljósa eru algjört drasl. Síðan er hundleiðinlegt að fá sér ný þegar ljósin eyðileggjast (sem mun mjög líklega gerast).

Það verður helst að skipta um peru um leið og hún fer ef margar perur eru á einum spennubreyti því annars getur það gerst að spennirinn fari vegna þess að hann þarf að gefa út ákveðið lágmark af vöttum. Ef þú kaupir of sterka peru getur spennirinn farið, ef þú kaupir of veika peru getur spennirinn farið.

Það er vesen að láta dimmer á halógenljós, það þarf að vera sérstakur dýrari dimmer, jafnvel er séns að ekki sé hægt að láta dimmer á ljósið.

Halógenperur eru yfirleitt dýrari en sem nemur orkusparnaðinum.

230 volta halógenperur eru skárstar af þessum perum, þar er enginn spennubreytir en þær eru vissulega heitar. Þær eru líka dýrari en venjulegar.

Litlir halógenlampar eru allt í lagi, séraklega þar sem þeir hafa mjög einfaldar perur og yfirleitt vel merktir með hámarksvattatölu, spennubreytarnir geta verið leiðinlegir í þeim einsog öðrum og hitinn getur verið leiðinlegur.

Jamm, þetta er mín fyrsta ábending um rafmagnsmál, kannski ég hafi þær fleiri.