Gneistinn

Þeir sem halda að Hannesarmálið snúist einungis um dóminn sem hann fékk ættu að kíkja á úttekt Helgu Kress. Þar koma fram dæmi þar sem Hannes virðist hafa haft texta frá öðrum fræðimönnum fyrir framan og umorðað bara örlítið án þess að geta heimilda. Þetta virðist ekki geta verið óviljaverk nema textinn hafi greipst inn í minni Hannesar.

Ég neita alfarið að hér sé verið að ofsækja manninn. Að mínu mati er Páll Skúlason helsti vandræðagripurinn í þessu máli öllu saman af því að hann gerði ekkert þegar hann var rektor. Ég held að það sem valdi mestum urgi sé hve langan tíma þetta hafi allt saman tekið. Það hefði komið sér best fyrir Hannes að ljúka þessu fljótt af.

Ég get engan veginn tekið undir þau orð félaga Arngríms í kommentum í annarri færslu að ævisaga sé aldrei fræðirit. Sjálfsævisaga er ekki fræðirit. Ævisaga byggð á viðtölum er ekki fræðirit. En margar ævisögur eru einmitt fræðirit og mig grunar að það hafi verið upphaflegur tilgangur Hannesar. Mig minnir að hann hafi haldið fyrirlestur um efnið á einhverju þinginu í Háskólanum sem gefur það sterklega til kynna. Það væri náttúrulega sérstaklega áhugavert að vita hvort að hann hafi fengið einhver rannsóknarstig út á þessi. Eða þá styrki.

En hins vegar skiptir það ekki öllu máli hvort um fræðirit sé að ræða. Háskólakennarar hafa skyldum að gegna gagnvart sínum skóla. Háskólinn verður að bregðast við með einhverjum hætti. Ég held að það væri rétt að senda málið til siðanefndar og það hefði átt að gera fyrir löngu síðan.  Ég veit ekki hvað kemur til greina. Brottvikning hefur verið nefnd en Gísli Gunnars segir hana ekki geta átt við. Stöðulækkun hugsanlega. Mig grunar að áminning ein og sér þætti of væg refsing.

Ég var að fara yfir námsferil minn og meðaleinkunn mín er 8,5 í meistaranáminu. Það er þægileg tala. Reyndar eru bara 23 einingar inn í tölunni og þær eru á bilinu 8-9,5. Einkunnir fyrir námskeiðin sem ég tók úti koma bara inn sem staðið en byggt á allt öðru einkunnakerfi. Sama gildir um námskeiðið hjá hákarlinum í vor. Síðan skilst mér að ég muni bara fá staðið fyrir meistararitgerðina. Ef svo er þá verður þetta lokaeinkunnin. Alveg ásættanlegt.

Ég bíð reyndar ennþá eftir einkunnum að utan. Ég sendi síðustu ritgerðina út milli jóla og nýárs með pósti þannig að ég er ekki bjartsýnn á að þetta komi alveg strax.

Annars er það að frétta af námsmálum hjá mér að ég er að plægja í gegnum kenningar og rannsóknir annarra sem hafa skrifað á þessu sviði. Stundum krassa ég “ekki satt” á spássíur bókanna. Það er meira skemmtilegt heldur en þegar fólk er sammála mér. Ég á eftir að taka tvö viðtöl. Ég er að bíða eftir svari varðandi annað en ég ætla að fara að eltast við hitt rétt bráðum. Gaman gaman.

Ég er loks byrjaður að skrifa. Yellowman er umfjöllunarefni mitt, eða reyndar upptökurnar af rödd hans og endalok þeirra. Viðeigandi.

Jæja, fyrsta ritgerðin svo gott sem tilbúin. Vantar reyndar örlítið upp á lengdina en hún er í raun í skilanlegu ástandi. Sjálfur er ég smá steiktur. Vona að hinar tvær gangi aðeins hraðar.

Ég er nærri búinn með ritgerð sem ég hef verið að fresta síðan í byrjun september. Ég verð voðalega feginn þegar þetta er alveg búið. Verst hvað þetta er lítið spennandi efni.

Hvers vegna í ósköpunum er Félagsvísindadeild ekki sér í nýja skipulaginu? Hvaða vit er í því að búa til svona ógnarstórt “svið” með okkur, hagfræðingum, viðskiptafræðingum og lögfræðingunum? Ég skil þetta ekki.

Ég er að flytja út. Viðtölin mín og önnur gögn voru rétt áðan ferjuð út í bíl í íþróttatöskunni minni ásamt fjölmörgum tómum flöskum. Ég var líka með bandíkylfuna mína til að ógna stjórnmálafræðinemum sem voru með háreisti hérna niðri. Það eina sem ég á eftir að taka út er talvan, pennar, fokkjúfingurinn, gaypride skrautið og lesefni dagsins.

Ég kveð þessa aðstöðu hérna í Odda sem ég fékk í janúar ef ég man rétt. Núna yfirgef ég hornborðið góða sem ég hafði náð að taka yfir þegar Hjálmar flutti út. En það eru allar líkur á að ég snúi aftur.

Sit í Odda. Get skellt tónlist á því ég þarf ekki að hlusta á viðmælendur mína tala á 42% af upprunalegum hraða. Allt slíkt er búið í bili.

Það er undarlegur hljómburður í þessu húsi. Ég var hérna inn á mínu rými og mér heyrðist Terry vera að tala hérna rétt fyrir utan á þriðju hæðinni. Ég kíkti út og enginn var þar. Ég fór aftur inn og heyrði aftur í Terry. Ég kíkti út en þar var enginn.

Í þriðja skiptið fór ég og kíkti hvort hann væri hérna inn á ganginum sem leiðir að fundarherberginu en þar var hann ei. Á leiðinni til baka þá kíkti ég niður og sá Terry spjalla við Dáithí á fyrstu hæðinni.

Ég rétt kastaði á hann kveðju enda var ég ekki beint að leita að honum til að spjalla heldur var ég bara að reyna að finna hvaðan röddin kæmi. Ég heyrði nefnilega betur í honum heldur en í fólki sem er að spjalla hérna handan við skilrúmið. Þetta hús er semsagt ekki hannað fyrir fólk sem vill fá að frið til að læra.

Ég skrapp áðan niður og ákvað prufa kjötloku með hakki. Sósan var svo skelfilega vond að ég þurfti að kaupa mér Prins Póló til að drepa bragðið.

Afgreiðslukonan reyndi í þetta skipti ekki að henda eigum mínum. Í síðustu viku hellti hún er flösku af Toppi sem ég var með þarna á meðan ég var að grilla samloku. Í fyrradag þá reyndi hún það aftur en spurði mig reyndar fyrst. Hún var síðan komin dálítið í burtu þegar hún spurði mig “átt þú þetta kannski líka?” og veifaði lokinu af plastdallinum sem ég kom með matinn minn í. Ég fékk lokið aftur.

En írskan er búin, próf eftir tvær vikur og stutt ritgerð aðeins seinna og þá hef ég væntanlega lokið síðasta kúrsinum sem ég mun taka í Háskóla Íslands. Ég er að hefja fimmta árið í HÍ. Það var ekki á upprunalega planinu.

Ég var rétt í þessu að velja mér herbergi í Cork. Í gær fékk ég nefnilega tvo kosti. Það sem ég valdi er lengra frá skólanum (sem gæti reyndar bara verið plús, mér þótti fínt að labba í skólann á hverjum degi í Århus) en hins vegar er það einstaklingsherbergi. Ég held að ég sé of gamall til að fara deila herbergi með bara einhverjum.

Leigan þarna fyrir þrjá mánuði virðist vera örlítið hærri en vinkona mín þarf að borga fyrir hvern mánuð í Berkeley. Ég á semsagt væntanlega ekki eftir að verða stórskuldugur eftir þetta. Það er á næstu dögum sem að allt verður komið á hreint.

Vonandi.

Fimm einingar í viðbót í hús. Riddarasögur var samt ekki efnið sem ég var spenntastur fyrir.