Gneistinn

Við fórum til Árnýjar og Hjörvars í gær í mat og spil. Spilið sem varð fyrir valinu var Meistarinn sem við Eygló keyptum um daginn á fimmhundruð kall. Spilið var að mörgu leyti nokkuð skemmtilegt. Stærsti gallinn var hins vegar að það var mjög illa prófarkalesið. Bæði spurningar og reglur voru uppfullar af villum. Það þurfti því mjög reglulega að ákveða viðbætur við reglur á staðnum til að gera þær skýrari. En þetta var gaman.

Eygló sigraði mig, Árnýu og Hjörvar áðan í Trivial frá 1985. Ég var 6 ára þegar það kom út en Árný og Hjörvar 13 ára. Eygló var 2 ára. Þetta verður því að teljast nokkuð góður árangur.

Gary Gygax er dáinn. Væntanlega kannast ekki margir við nafnið. Ef það er hægt að segja að einhver hafi fundið upp hlutverkaleiki þá var það hann. Hann bjó til Dungeons & Dragons sem var fyrst gefið út 1974. Ótal hlutverkaleikir fylgdu í kjölfarið. Sjálfur var ég aldrei D&D maður. Ég var hrifnari af “fágaðri” hlutverkaleikjum sem ekki treystu á að pumpa upp persónuna.

En D&D hafði gríðarleg áhrif og sérstaklega mikil á tölvuleiki. Síðan sýnist mér að síðustu ár hafi borðspil og “spilastokkaspil” líka sótt meira í smiðju hlutverkaleikja.

Futuramaaðdáendur muna kannski eftir honum en hann var gestaleikari í þætti ásamt Al Gore, Stephen Hawking og Uhuru úr Star Trek.

Ætli fjölmiðlar á Íslandi átti sig á hve gríðarleg áhrif þessi maður hafði og fjalli um hann? Ég efast um það. Hlutverkaleikir eru “lágmenning”.

Við fórum í mat og spilamennsku til Árnýjar og Hjörvars. Dilbert spilið var prufukeyrt og það fær alveg tvo þumla upp. Góðar leiðbeiningar. Ekki leiðinlegt á milli þess sem maður gerir. Húmorinn alveg í takt við strípurnar. Sérstaklega gott fyrir þá sem fíla Dilbert og þá sem hafa unnið á skrifstofum.

Ég held að Spilavinir eigi þetta örugglega til þannig að þið getið farið þangað og keypt það ef þið eruð áhugasöm.

Í dag spiluðum við tvisvar við Sigga og Sigrúnu. Byrjuðum á badminton tíma sem var sá skemmtilegasti til þessa. Mér þótti verst að þurfa að hætta að hreyfa mig í lokinn. Mjög hressandi.

Við fórum og versluðum í Kringlunni. Skór handa mér í staðinn fyrir þá sem eru að gefa sig núna. Keyptum okkur líka samstæða boli til að geta verið svoleiðis par

Í kvöld var ég byrjaður að finna fyrir eftirköstum badmintonsins og var svolítið glaður þegar Siggi og Sigrún buðu okkur í mat og spilamennsku. Við spiluðum Bíóbrot og Munchkin. Verð að segja að Bíóbrot var ekki alveg að virka jafnvel og maður vonaði. Gefum því annan séns.

Siggi og Sigrún virtust hins vegar falla fyrir Munchkin (Impossible) og Eygló dró aftur sínar efasemdir og var glöð með það. Það er nú gott að geta fengið einhverja til að spila þetta spil sem mér finnst svo skemmtilegt að ég hef keypt það í þremur útgáfum.

Hvað er spil?

Í gær fengum við Brján og Helgu í spilamennsku. Við byrjuðum á að taka tvær umferðir í Simpsons Cluedo. Í seinni leiknum breyttist taktíkin hjá fólki töluvert. Við tókum líka Astrópíu. Mér fannst það virka líka vel í stærri hóp en stóð kannski fulllengi. Það er kannski tengt því að allir voru að læra.

Við skruppum í gær í Spilavini sem er nýleg spilabúð á Langholtsvegi. Spilavinir er með fínt úrval af spilum. Sum spennandi, önnur ekki eins og gengur og gerist. Það sem mér fannst helst vanta var nördaspil. Það er væntanlega einhver stærsti markaðurinn og þau missa af miklu með því að láta hann vera. En kíkið þangað ef þið hafið áhuga á spilum.

Það var orðið of langt síðan við höfðum spilað við Frey og Auði þannig að við skruppum þangað. Byrjuðum á því að spila spil sem þau eiga sem byggir á frönsku byltingunni. Hálfgert fræðsluspil í raun. Það var mjög skemmtilegt. Auður vann báða leikina en Freyr var að skutlast með Steinunni systur sína á meðan.

Við tókum síðan nýju Trivial spurningarnar. Munið þið eftir fyrstu Triviulunum? Þá voru 6000 spurningar. Í þessum spurningapakka eru 600 og þar af helmingur fyrir börn. Ég efast um að við getum notað þessar spurningar aftur í bráð þar sem við vorum allavega komin á þriðju umferð. Get ekki sagt að ég mæli með að fólk kaupi þennan pakka (en er þó þakklátur Hafdísi og Mumma fyrir að hafa gefið okkur þetta). Ég sigraði að lokum eftir að hafa náð grunsamlegri forystu á meðan húsráðendur fóru fram.

Lokaspilið var Ticket to Ride. Freyr og Auður höfðu aldrei spilað þetta áður og hrifust af því. Þetta er líka vel hannað spil. Helsti kostur þess er að umferðirnar ganga fljótt yfir og maður er því alltaf að gera eitthvað.

Þegar okkur þótti klukkan og margt og við of þreytt til að spila meira fórum við að spjalla um hitt og þetta í töluverðan tíma. Mér brá þegar ég sá að klukkan var orðinn 2:45. Maður á ekki að halda vöku fyrir barnafólki svona frameftir. En við verðum að endurtaka þetta við tækifæri.

Astrópíuspilið fékk ég frá Eygló og við tókum prufuatrennu í kvöld.

Fyrsta sem maður tekur eftir er fjöldi leikmanna. 2-6 spilarar. Það er gott. Í fyrsta lagi er gott að hafa spil sem tveir geta tekið í og einnig að heildarfjöldinn er nokkuð hár. Þar að auki stendur spilarafjöldi ekki á tvennum þannig að þrír og fimm geta spilað. Alltaf óþægilegt þegar verið að velja spil.

Kannski ég hefði átt að segja að kassinn sjálfur sé það fyrsta sem maður tekur eftir en hann er voðalega stór, í raun óþarflega stór. Spilaborðið hefði mátt brjóta einu sinni oftar saman sem hefði sparað mikið pláss. Þar að auki er kassinn sjálfur illa hannaður. Hólfin sem eru ætluð undir spjöld eru virka ekkert sérstaklega vel og þau geta auðveldlega dottið undir.

Leiðbeiningarnar eru ekkert afskaplega skýrar. Fleiri skýringamyndir hefðu hjálpað mikið. Annars þá eru reglurnar frekar einfaldar en ég geri þó ráð fyrir að ég græði á því að þekkja aðeins til klassískra hlutverkjaleikja.

Í grunninn þá ertu að leika hlutverk einnar aðalpersónunnar úr myndinni. Þú getur verið Hildur (eins og ég var), Flóki (Eygló), Playmolas, Pési, Beta eða Kjartan. Hver persóna hefur ákveðna eiginleika en þó er ekki mikill munur á þeim. Þessar hetjur berjast svo við skrýmsli og nota til þess ýmsa hluti og/eða galdra sem þær geta fengið með ýmsu móti í spilinu. Markmiðið er að ná í nisti og fara með aftur á upphafsreit. Heimferðin er fljótlegri en þá bætist við annar þáttur í leikinn þar sem spilarar geta barist við hvern annan.

Ég fór aðeins framúr mér því upphaf leiksins er töluvert öðruvísi en þar verða spilarar að svara spurningum til að komast áfram. Þetta eru “nördaspurningar” en þó ekkert óhóflega þungar. Þú svarar kannski ekki fjórum af fjórum nema vera nörd en fólk sem er meðvitað um dægurmenningu ætti að geta komist áfram nokkuð fljótt. Þessar spurningar eru líka notaðar á öðrum stöðum á leiknum, til dæmis þegar maður er að reyna að nálgast nistið.

Ég á erfitt með að gefa stjörnur og slíkt en ég get gefið þumal upp. Þegar ég hef spilað nokkrum sinnum í viðbót þá megið þið spyrja mig hvernig þetta virkar með fleiri spilurum, hvernig spilið endist og fleira þess háttar.