Gneistinn

Mér þykir þessi hugmynd hjá Svandísi um að endurskoða umboð lítilla flokka í sveitastjórnum fráleit og ólýðræðisleg. Ég ætla að vona að þetta sé eitthvað mistúlkað. Þetta er sérstaklega út í hött þegar við miðum við að VG er nú ekkert alltaf með fleiri en einn fulltrúa. Kannski að borgarfulltrúinn þyrfti að vera í meira sambandi við flokksfélaga sína út á landi.

Ég verð að játa að ég fatta ekki alveg hvernig þessi virkjun á eftir að hjálpa fjölskyldum í Reykjavík. Getur einhver skýrt það?

Mér skilst að ég eigi að vera ánægður í dag af því að nú er kominn nýr meirihluti í staðinn fyrir þann sem ég taldi á sínum tíma óstarfhæfann. Engu skiptir þó þessi sé ekkert sérstaklega traustur.

Það að mynda nýjan meirihluta þegar sá gamli er kominn í rúst er jafn slæmt og að sprengja meirihluta með því að bjóða gull og græna skóga. Það er ekki heldur skárra en að stinga þann sem fékk loforð um gull og græna skóga í bakið bara af því að hann hélt að hann ætti að fá gull og græna skóga (kjáninn sá að halda að orð skyldu standa). Það er líka ógeðslega óheiðarlegt að tala um að endurreisa eldri meirihluta þegar sá fyrri er greinilega fallinn. Alveg jafn slæmt og bakstungurnar.

Ég á erfitt með að setja samasemmerki á rétta staði og er því greinilega sekur um tvískinnung.

Ég veit ekki hvað ég las mörg blogg í gær þar sem fólk var að hneykslast á Marsibil fyrir að kjósa að fara eftir eigin sannfæringu þegar hún hefði getað fengið áhrif og völd. Ég er líklega jafn langt frá því að skilja þetta fólk og það fólk var langt frá því að skilja Marsibil. Það spurði hvort fólk væri ekki í pólitík til að fá áhrif og völd. Ég spyr hvort að fólki eigi að vera alveg sama hvernig það kemst í þessa stöðu. Ef þú þarft að svíkja sjálfan þig og þær siðareglur sem þú stendur fyrir og sannfæringu þína til að komast í áhrifastöðu þá áttu ekkert með það að gera að komast í þá stöðu. En reyndar verður þetta til þess að siðlaust fólk á auðveldara með að komast á toppinn. Eins og loftmiklir kúkar sem fljóta á yfirborðinu.

Eina von kjósenda er að reyna að velja fólkið sem fer eftir sannfæringu sinni og siðareglum. Ef við kjósendur gera það þá eigum við væntanlega eftir að sjá Marsibil aftur og meira af henni.

Ef mér þætti sambandið við Eygló ekki alveg nógu gott þá sé ég ekki fyrir mér að hún væri glöð með þá lausn að við fengjum aðra konu inn í sambandið. Á sama hátt skil ég ekki alveg af hverju fólk er að ætlast til þess að Ólafur F. hefði átt að vera ánægður með að fá Óskar upp í rúmið.

Það er langt síðan að ég hef séð Ólaf F. svona hressan. Væntanlega er gott fyrir hann að sleppa.

Samstarfskona mín minntist á að Hanna Birna hafi litið út fyrir að vera hálf óörugg í gær og sífellt að gjóa augunum að Óskari. Ég sagði að það væri alveg eðlilegt, þeir sem eru í borgarastjórastólnum þurfa sífellt að gæta sín á að fá ekki rýting í bakið frá samstarfsfólkinu.

Það er kjarni þess em Hanna Birna segir um Óskar.

Stjórnmálamenn þurfa að læra að það dugar ekki að vera með orðaleiki til að segja ekki satt.

Ætli það teljist framför fyrir Sjálfstæðisflokkinn að losna við Ólaf og lenda þess í stað undir hælnum á Framsókn? Óskar hlýtur að geta gert það sem hann vill út kjörtímabilið því ekki má Valhöll við því að klúðra enn einum meirihlutanum. Ég efast hins vegar um að þessi völd eigi eftir að koma Framsókn til góða í kosningunum þó Óskar geti hugsanlega grætt eitthvað á því. Skammtímahagsmunir framyfir langtíma.

En eins og ég segi, ef þetta væri ekki svona grátlega heimskulegt og sorglegt fyrir borgarbúa þá væri þetta fyndið.