Gneistinn

Hér er uppástunga á viðtali við stjórnarmeðlimi Strætó.

Sp: Notar þú Strætó?
Stjórnarlimur: Nei.
Sp: Hvers vegna ekki?
Stj: Af því að ferðatíðnin og leiðakerfið henta mér ekki (ég geri ráð fyrir að þeir hafi efni á miðum).
Sp: Af hverju ekki þá auka ferðatíðnina og bæta við leiðum?

Annars legg ég til að enginn fái að sitja í stjórn Strætó nema að sá hinn sami noti Strætó allavega fjórum sinnum í viku. Það er fráleitt að þetta fólk þekki ekki þjónustuna sem það er að stjórnast í.

Vandamál Strætó er það að stjórnendur fyrirtækisins virðast ekkert vita hvernig eigi að lokka að farþega. Í hvert sinn sem þeir hræra í leiðakerfinu missa þeir farþega á sama tíma og stöðugt kerfi myndi hægt og rólega vinna fleiri farþega. En ég segi að þeir virðist ekki vita þetta. Það gæti vel verið að þeir viti þetta en séu bara að reyna að jarða fyrirtækið.

Ef við reiknum inn kostnað við gatnakerfið í Reykjavík, bensínkostnað (og hækkandi verð til framtíðar), bílatryggingar, bílakaup og bílaviðhald þá grunar mig að við yrðum fljót að komast að þeirri niðurstöðu að neðanjarðarlestir séu málið, sérstaklega ef við prufum að horfa til hundrað ára. Fyrstu 10-30 árin allavega þyrfti náttúrulega að skipuleggja þetta þannig að Strætó væri mikilvæg stoð fyrir lestarkerfið.

En að sjálfssögðu er ekki vilji hjá borgaryfirvöldum að horfa langt fram í tímann. Þegar Framsókn og Sjálfsstæðisflokkur myrtu nýja strætókerfið þá var það af því að til skamms tíma var það ekki að skila “hagnaði” en ekki var hugsað til þess að uppbygging almenningssamgangna væri fjárfesting til framtíðar. Það er líka ekki öllum þeim sem styrkja þessa flokka í hag að gott strætókerfi sé til staðar. Það er ekki olíufélögunum í hag, það er ekki tryggingafélögunum í hag, það er ekki bílasölum í hag. Það er hægt að bæta mörgum aðilum á þennan lista. Það er aðallega almenningur sem græðir á góðu strætókerfi en hann skiptir engu máli.

Það væri gott ef við gætum farið tíu ár aftur í tímann og fengið að vita að bensínverð myndi tvöfaldast á áratug og leyft fólki að taka upplýsta ákvörðun um hvernig uppbyggingu almenningssamgagna yrði háttað. Værum við kannski komin með neðanjarðarlest úr Mossfellsbæ yfir í Seltjarnarnes og aðra línu frá Hafnarfirði í miðborgina? Væri verið að vinna að tengja Breiðholtið við þessar línur?

Þetta eru bara smá draumórar sem maður leyfir sér og það sem skiptir máli í dag er að spyrja hvar við verðum og hvar við viljum vera eftir tíu ár, tuttugu ár og fimmtíu ár.

Strætó var ekki of seinn í morgun, hann var 4-5 mínútum of snemma. Við fengum að bíða þarna 8 manns eftir næsta vagni. Ég sendi kvörtun á heimasíðunni, tvisvar raunar því síðast þegar ég kvartaði (yfir leiðabreytingum) þá var mér ekki svarað.

Takið bara Strætó!

Í Strætó á leið úr vinnu í dag byrjaði náungi rétt fyrir aftan mig að tala hátt og snjallt um seríu fjögur af House sem ég hef ekki ennþá séð. Í stað þess að stökkva á fætur og hrista manninn til eins og hefði verið eðlilegt að gera í þessum kringumstæðum hélt ég fyrir eyrun. Ég sá engan horfa á mig en mig grunar að ýmsir hafi talið mig skrýtinn. Í kvöld horfði ég síðan á dálítið af fjórðu seríu af House á meðan ég skrifaði uppkast að grein föstudagsins.

Fór í Strætó í morgun. Hitti Helgu Þóreyju eins og svo oft áður. Við vorum í leið 4 og bara á næstu stoppistöð eftir að ég kom inn. Einhver stúlka hafði ýtt á stopp takkann og beið við miðdyrnar. Þegar vagninn nemur staðar opnast framdyrnar og ungum manni er hleypt inn. Allt í einu byrjar bílstjórinn að öskra aftur fyrir sig “Halló! Halló! Heyrirðu ekki? Halló?”. Öll vorum við frekar ringluð og einhver spyr hann hvað sé málið. Þá segir hann að miðhurðin sé frosin og stúlkan þurfi að fara út að framan. Kallinn var frekar æstur. Stúlkan fer út. Farþegarnir horfðu mjög undrandi á hvern annan. Hvers vegna í ósköpunum var náunginn að öskra “Halló” í sífelldu í stað þess að segja strax að hurðin væri frosin? Mjög skrýtið. Þetta var sami vagnstjóri og var í gær og líklega sá sami og stakk mig af á miðvikudag með því að vera einni og hálfri mínútu of snemma.

Í dag skrapp ég á málþing um netið og bókmenntir. Að öðrum ólöstuðum bar Ásgeir höfuð og herðar yfir aðra sem þarna komu fram. Hann var með nokkrar áhugaverðar hugmyndir. Ég hitti óvænt náunga sem mig langaði að spjalla við varðandi ritgerðina mína þarna og ræddi aðeins við hann. Heppileg tilviljun.

Þegar ég kom út á stoppistöð við gamla FS var klukkan 18:30. Næsti vagn átti að koma sjö mínútum seinna. Ég beið, og beið og beið. Vagninn kom loksins ríflega fimmtán mínútum of seint. Ég og gamli maðurinn vorum orðnir svolítið leiðir á biðinni. Það var reyndar sérstaklega skrýtið að það keyrðu einir fjórir vagnir á frívakt framhjá okkur.

Ég skil að áætlanir riðlast, sérstaklega á föstudögum. En það sem ég skil ekki er af hverju er ekki bætt við vögnum til þess að vega á móti þessum ruglingi. Væri ekki hægt að bæta við vögnum og ná að leiðrétta áætlanir þannig? Þeir voru nokkrir lausir núna allavega.

Ég skil ekki hvers vegna kortin voru tekin út af Ráðgjafanum á Strætó.is. Veit ekki hvaða taktík það er að gera síðuna verri en hún var. Það var svo gott að geta séð svona vel hvernig leiðirnar lágu. Þetta var sérstaklega óþægilegt þegar ég skrapp út á Skaga því þá var ég að taka leið sem ég þekkti ekkert. Það endaði í raun þannig að keyrði út í Grafarvog og tók vagninn þar í staðinn fyrir að reyna að fatta og treysta á leiðirnar sem fara þangað.

Ég var annars núna áðan að kíkja á hvaða leiðir væru færar niður í Borgartún. Af einhverjum ástæðum vildi Ráðgjafinn helst láta mig skipta um vagn á leiðinni þó að þetta ég gæti farið þetta á nákvæmlega sama tíma í einum vagni. Fatta ekki hvaða rök lágu þar á bak við. Reyndar er annað undarlegra. Mér er sagt að fara út klukkan 8:29 til að ná í vagn sem kemur 8:17 og endar niðrí Mjódd 8:36. Venjulega fara vagnar þessa leið á fjórum mínútum.

En að öðru. Þegar Gwen er ólétt þá er rétt að spyrja hvort að það sé orðið opinbert að menn sé aftur farnir að blogga ekki? Ég bara spyr.

Ég er á bílnum í dag, er að fara að taka síðasta viðtal sumarsins. Ég nýtti hann líka í snatt. Fór og hitti Jakob og ræddi við hann um viðskipti og væntanlegar utanfarir. Næst náði ég í kortið sem ég vann á Bíódaga. Að lokum fór ég og verslaði mér buxur og fleira í Kringlunni.

Það er kannski rétt að taka fram að nýja Strætókerfið er augljóslega verra en það sem var síðasta vetur. Feginn er ég að búa ekki í Árbæ eða Efra-Breiðholti, það fólk hefur farið mun verr út úr þessu en ég. Sjálfur styð ég að fá bara kerfið aftur eins og þetta var síðasta vetur, ekki þjónustuskerðingu sem þeir reyna að dulbúa sem umbætur.

Nú spyr ég eins og einfeldningur: Er Pétri Gunnarssyni alvara með þessu kommenti eða er hann bara að reyna að ergja fólk?

með strætó fer enginn nema hann neyðist til þess- vegna ökuréttindamissis, heilsuleysis og/eða örbirgðar.

Ef honum er alvara með þessu þá er hann augljóslega að slá met í vitleysisgangi.

Ég nota Strætó eins mikið og ég get. Ég er ekki heilsulaus, ég er með körekortið mitt í veskinu og heimilið er merkilega vel statt. Það er til bíll á heimilinu sem Eygló notar til að komast í vinnuna. Þegar Eygló er ekki að nota bílinn þá kýs ég yfirleitt að nota Strætó hvort eð er af því að mér þykir það þægilegra.

Vissulega er staðan mjög slæm í sumar og kerfið afskaplega lélegt en ég kemst samt upp með að nota Strætó og geri það til að komast minnar leiðar.

Það sem meira er þá er þetta nokkuð algengt í mínum vinahóp. Fólk kýs að nota Strætó frekar en að standa bílastressi. Þetta er ekki bara af umhverfisástæðum heldur einfaldlega af því að þetta er frelsandi. Það er líka mjög gjarnan þannig að maður hittir skemmtilegt fólk í Strætó. Í þessari viku hitti ég til dæmis Ármann og slúðraði með honum um Árósaliðið.

Annars þá dugar mjög vel að hafa bara tónlist í eyrunum og slaka á. Þú þarft ekki að ergja þig á umferðinn, ljósunum eða neinu. Bara slappar af.