Í Strætó á leið úr vinnu í dag byrjaði náungi rétt fyrir aftan mig að tala hátt og snjallt um seríu fjögur af House sem ég hef ekki ennþá séð. Í stað þess að stökkva á fætur og hrista manninn til eins og hefði verið eðlilegt að gera í þessum kringumstæðum hélt ég fyrir eyrun. Ég sá engan horfa á mig en mig grunar að ýmsir hafi talið mig skrýtinn. Í kvöld horfði ég síðan á dálítið af fjórðu seríu af House á meðan ég skrifaði uppkast að grein föstudagsins.

Fór í Strætó í morgun. Hitti Helgu Þóreyju eins og svo oft áður. Við vorum í leið 4 og bara á næstu stoppistöð eftir að ég kom inn. Einhver stúlka hafði ýtt á stopp takkann og beið við miðdyrnar. Þegar vagninn nemur staðar opnast framdyrnar og ungum manni er hleypt inn. Allt í einu byrjar bílstjórinn að öskra aftur fyrir sig “Halló! Halló! Heyrirðu ekki? Halló?”. Öll vorum við frekar ringluð og einhver spyr hann hvað sé málið. Þá segir hann að miðhurðin sé frosin og stúlkan þurfi að fara út að framan. Kallinn var frekar æstur. Stúlkan fer út. Farþegarnir horfðu mjög undrandi á hvern annan. Hvers vegna í ósköpunum var náunginn að öskra “Halló” í sífelldu í stað þess að segja strax að hurðin væri frosin? Mjög skrýtið. Þetta var sami vagnstjóri og var í gær og líklega sá sami og stakk mig af á miðvikudag með því að vera einni og hálfri mínútu of snemma.

Í dag skrapp ég á málþing um netið og bókmenntir. Að öðrum ólöstuðum bar Ásgeir höfuð og herðar yfir aðra sem þarna komu fram. Hann var með nokkrar áhugaverðar hugmyndir. Ég hitti óvænt náunga sem mig langaði að spjalla við varðandi ritgerðina mína þarna og ræddi aðeins við hann. Heppileg tilviljun.

Þegar ég kom út á stoppistöð við gamla FS var klukkan 18:30. Næsti vagn átti að koma sjö mínútum seinna. Ég beið, og beið og beið. Vagninn kom loksins ríflega fimmtán mínútum of seint. Ég og gamli maðurinn vorum orðnir svolítið leiðir á biðinni. Það var reyndar sérstaklega skrýtið að það keyrðu einir fjórir vagnir á frívakt framhjá okkur.

Ég skil að áætlanir riðlast, sérstaklega á föstudögum. En það sem ég skil ekki er af hverju er ekki bætt við vögnum til þess að vega á móti þessum ruglingi. Væri ekki hægt að bæta við vögnum og ná að leiðrétta áætlanir þannig? Þeir voru nokkrir lausir núna allavega.

Nú spyr ég eins og einfeldningur: Er Pétri Gunnarssyni alvara með þessu kommenti eða er hann bara að reyna að ergja fólk?

með strætó fer enginn nema hann neyðist til þess- vegna ökuréttindamissis, heilsuleysis og/eða örbirgðar.

Ef honum er alvara með þessu þá er hann augljóslega að slá met í vitleysisgangi.

Ég nota Strætó eins mikið og ég get. Ég er ekki heilsulaus, ég er með körekortið mitt í veskinu og heimilið er merkilega vel statt. Það er til bíll á heimilinu sem Eygló notar til að komast í vinnuna. Þegar Eygló er ekki að nota bílinn þá kýs ég yfirleitt að nota Strætó hvort eð er af því að mér þykir það þægilegra.

Vissulega er staðan mjög slæm í sumar og kerfið afskaplega lélegt en ég kemst samt upp með að nota Strætó og geri það til að komast minnar leiðar.

Það sem meira er þá er þetta nokkuð algengt í mínum vinahóp. Fólk kýs að nota Strætó frekar en að standa bílastressi. Þetta er ekki bara af umhverfisástæðum heldur einfaldlega af því að þetta er frelsandi. Það er líka mjög gjarnan þannig að maður hittir skemmtilegt fólk í Strætó. Í þessari viku hitti ég til dæmis Ármann og slúðraði með honum um Árósaliðið.

Annars þá dugar mjög vel að hafa bara tónlist í eyrunum og slaka á. Þú þarft ekki að ergja þig á umferðinn, ljósunum eða neinu. Bara slappar af.

Á mánudaginn sat ég í Strætó á móti unglingsstúlku sem kaus að hvíla fætur sínar á sætinu við hliðina á mér. Ég tók eftir að það var búið að krassa eitthvað á skóna hennar. Ég las það og sá að á öðrum var hún greinilega að lýsa yfir aðdáun sína á ákveðinni hljómsveit. Á hinum stóð hins vegar “ég elska þig Óli”. Ég brosti að þessu. Er annars dónalegt að lesa skó ókunnugra?

Í morgun reyktu tveir náungar í Strætóskýlinu mínu. Pirrandi helvíti. Þegar ég kvartaði yfir þessu í fyrra til Strætó þá fékk ég þau svör að það hefði verið reynt að setja bannmerki í Strætóskýlin en þau hefðu bara verið rifin niður. Ég held að þeir ættu bara að prenta þetta á kortin sín í haust. Annars þá svöruðu þeir allavega kvörtun minni í fyrra, þeir hafa ekki ennþá svarað kvörtun minni um breytt leiðarkerfi.

Það er undarlegt að Gunnar Birgisson af öllum mönnum sé að gera Strætó gjaldfrjálsan. Reyndar er þarf hann á jákvæðri umfjöllun að halda þessa daganna.

Ég hef ekki skrifað um Strætó lengi. Ég hef núna nokkrum sinnum þurft að ganga heim úr Mjóddinni af því að S4 er farinn þegar S3 kemur þangað. Það er reyndar ekkert óhóflegt að ganga þessa vegalengd en þegar maður er þreyttur eftir daginn og með mikið af drasli með sér þá er þetta frekar ömurlegt. S3 er svo troðinn á annatímum að hann er mikið lengur á leiðinni en hann á að vera. Vagnstjórarnir þurfa síðan að gefa svo voðalega í þegar þeir eru svona seinir. Þetta veldur því að farþegarnir þurfa að hafa sig alla við til að halda jafnvægi. Þetta fer augljóslega verst með þá sem standa og gamalt fólk.