Gneistinn

Nýr fréttavefur: Smugan

Á Facebook eru 2000 manns búnir að skrá sig sem aðdáendur Helga Hóseassonar. Mér finnst það ákaflega góður árangur.

Einhver var að leita að íslensku klámi með hjálp orðabókar.

Ég á voðalega bágt með mig á Facebook. Ég á erfitt með að hafna þeim sem vilja vera vinir mínir þó ég þekki þá ekkert. Mér finnst erfitt að útiloka fólk. Áðan henti ég þó “vini” sem var sífellt að senda mér heimskuleg boð. Ég man ekki eftir að hafa hitt þennan “vin” í raunveruleikanum og engin samskipti við hann haft. Ég samþykkti hann einungis vegna þess að við áttum töluvert af sameiginlegum vinum. En ég fékk nóg. Kannski að ég grisji meir í vinahópnum í framtíðinni.

En ef þið viljið heyra um netsamfélög þar sem raunveruleg vinátta þrífst þá er fyrirlesturinn minn Dauðinn og sýndarveruleikinn í stofu 101 í Odda á eftir. Þetta byrjar klukkan 11 og ég byrja líklega um 11:15-20 (best að mæta bara 11).

Eggert klukkaði mig og ég tek því að sjálfssögðu.

1. Fjögur störf sem ég hef unnið um ævina:
- Bókavörður hjá Þjóðarbókhlöðunni og Borgarbókasafni
- Starfsmaður í Efnaverksmiðjunni Sjöfn
- Uppvaskari á Kringlukránni
- Perusölumaður í Glóey

2. Fjórar íslenskar bíómyndir sem ég held upp á:
- Sódóma Reykjavík
- Englar alheimsins
- Astrópía
Ég held að ég geti ekki nefnt fleiri.

3. Fjórir staðir sem ég hef búið á:
- Akureyri (1979-2001)
- Reykjavík (2001- )
- Cork (sept-des 2007)
- Borgarnes (sumar 1997)

4. Fjórir staðir sem ég hef heimsótt í fríum:
- London
- Edinborg
- Færeyjar
- Borlänge
5. Fjórir sjónvarpsþættir sem mér líkar:
- Boston Legal
- Dexter
- Veronica Mars (sælla minninga)
- How I met Your Mother
6. Fjórar síður sem ég skoða daglega:
- BloggGáttin
- Vantrúarspjallið
- VefMogginn
- Vefpóstinn minn

7. Fernt sem ég held upp á matarkyns:
- Mexíkanskur kjúklingaréttur
- Lasagne (mitt)
- Pizza (mín)
- Kebab (sænskt eða n-írskt)
8. Fjórar bækur sem ég hef oft lesið:
- American Gods eftir Neil Gaiman
- The Fandom of the Operator eftir Robert Rankin
- Dirk Gently bækur Douglas Adams
- Mort eftir Terry Pratchett
9. Fjórir staðir sem ég myndi helst vilja vera á núna:
- Heima
- Cork
Get eiginlega ekki nefnt fleiri staði.

10. Fjórir bloggarar sem ég klukka:
- Eygló Traustadóttir
- Hafdís Inga
- Hjörvar Pétursson
- Dagbjört Guðmundsdóttir

Ég ætla að leggja alla mína peninga í Eve ISK og WoW gull.

Þar sem ég fékk nýlega leiðinlega flensu kíkti ég á blogg um slæmt flensuafbrigði. Þaðan var vísað á frétt Daily Mail þar sem talað er um flensu í Ástralíu þar sem hundruð hafi látist. Nú er Daily Mail ekki besta blað í heimi svo vægt sé til orða tekið. Ég kíkti því á athugasemdirnar sem fylgdu blaðinu. Þar var fjöldinn allur af Áströlum að tjá sig um að þeir hefðu aldrei heyrt um þessa morðflensu sem átti að hafa gengið þar. Ég held að ég geti því verið rólegur.

En svona ættu fréttaathugasemdir að virka. Nú eru einstaka Moggabloggarar sem í raun og veru stunda að bæta við eða hrekja fréttir en maður tekur varla eftir þeim fyrir þeim sem annað hvort endursegja fréttirnar eða koma með heimskulegar upphrópanir. Þetta fréttabloggskerfi er ekki að virka hjá þeim af því að þeir leyfa fólki sem er fyrst og fremst að reyna að vekja athygli á sjálfu sér að nota þetta óhindrað. Hugsanlega mætti kalla þetta ritskoðun en fyrst og fremst er þetta gæðastjórnun. En Mogginn væri reyndar líklegastur til að birta bara blogg frá þeim sem hafa skoðanir sem henta honum þannig að líklega væri slíkt kerfi dauðadæmt frá upphafi.

Það er endalaust vesen hérna með heimanetið okkar eftir að nýji ráterinn kom. Allt var í góðu lagi áður en núna sjá tölvurnar bara ekki hver aðra. Ég er nokkuð viss um að augljósi sökudólgurinn, Norton, sé saklaus en þá veit ég bara ekki hvað gera skal. Ég finn engar stillingar í ráternum sem ég get séð að hafi áhrif á það hvort tölvurnar sjái hvor aðra. Ég get pingað ráterinn en ekki hinar tölvurnar og ég get pingað tölvurnar úr ráternum. Tölvurnar þrjár eru með XP en síðan er líka sjónvarpsflakkarinn tengdur inn á þráðlausa netið.

Einhverjar hugmyndir?

Aðsóknin að heimasíðu Þjóðbrókar hrundi síðasta sólarhring. Mig grunar þó að þetta sé ekki ennþá komið í lag en allavega er ólíklegt að vefurinn hökti aftur út af þessu veseni.

Það hefur verið 13 gígabæta umferð um myndasíðu Þjóðbrókar það sem af er mánaðarins. Það er frekar gruggugt. Ég skoðaði málið aðeins og bannaði síðan eina ip tölu og alla botta. Einhver var að koma þarna inn á hverjum degi og skoða hverja einustu mynd. Ég vona að þetta sé bara einhver heimsk tölva en ekki einhver sem er að reyna að eyðileggja. En þetta er semsagt skýringin á því að villuskiluboð hafa komið öðru hvoru hérna á vefnum.