Day: 10. október, 2004

Fjórða valdið brauðfæðir fólkið á ótta, eins og þess er von og vísa. Á skömmum tíma hafa prentmiðlarnir hrætt fólk með sögum af rússneskum hermönnum, handrukkurum, hópamyndun unglinga, geitungum og mannýgum hundum í Seljahverfinu. Næst verða það brjálaðir pósthússtarfsmenn og útlendingar sem hafa af okkur vinnuna; hvorttveggja verandi urban legend.

Sams konar urban legend eru tíundubekkingar sem komast ekki inn í framhaldsskóla vegna langvarandi áhrifa kennaraverkfalls. Slíkir tíundubekkingar eru ekki til. Normaldreifing einkunna sér til þess.

Það er fjarlæg framtíð að hægt verði setjast niður og slappa af með Moggann. Alltént á meðan fjölmiðlar lýsa ómerkilegustu hlutum eins og einhverjum dulrænum tortímanda sem engar reiður sé á að henda; einhverjum déskotans þorpara sem drepur litla smáborgara eins og sjálfan þig vegna þess að honum finnst það svo gaman. Þú gætir verið næstur! Það getur kostað þig höfuðið að láta blekkjast af fagurri ásjónu kettlingsins og sá hlær best sem síðast hlær! Smjör drepur! Löggan er andskotinn, eða til hvers hafa þeir kylfur? TIL AÐ KLAPPA ÞÉR MEÐ?!

Ekki furða að fólk sé almennt svona taugaveiklað. Ef sett verða lög um fjölmiðla má alveg skoða þennan pakka.

Ég er að spá í að útbúa viðarristu til að hengja á herbergisdyrnar mínar til að veita herberginu virðingarfullan blæ. Á ristunni gæti t.a.m. staðið: BIBLIOTHECA E ARCHIVI AQVILAMI VIDALIN STEFANOFILII (er þetta rétt skrifað?).

Einnig stendur til að gera algjöra yfirbót á herbergismálum, þá sérstaklega hvað varðar magn hluta á gólfi og fjölda bókaskápa. Já, mitt Zimmer skal vera gott Zimmer; sannkölluð Mekka bókmenntanörda.

Ekki get ég séð á myndinni, að köttur þessi hafi verið étinn. Nema einhver hafi tjaslað honum saman og þvegið eftir að hundarnir tveir skiluðu honum af sér.

Þetta er alveg magnað. Eins óhugnanlegt og það er, að heill rússneskur floti geti komist óséður að landi, hlýtur þetta að sýna fram á vanhæfni varnarliðsins. Bandaríkjunum er líka slétt sama þó rússarnir séu hérna. Það er tiltölulega auðvelt fyrir Bandaríkin að sprengja okkur af kortinu ef rússar hertaka okkur; sem þeir gera ekki. Svo verður að aðgæta að Ísland er ekki lengur þessi „skotpallur til Bandaríkjanna“ og hefur ekki verið það síðan í kalda stríðinu.

Nei, ég vil að þetta déskotans varnarlið hypji sig. Ekkert gott hlýst af veru þeirra hér.