Day: 18. maí, 2005

Ég skrapp í Krónuna Norðurbrún til að berja Bjössa augum í úniformi. Áður hafði ég þá ímynd af starfsfólki Krónunnar að það væri asnalegt, en ekki lengur. Nú get ég vottað að enginn tekur sig betur út í Krónugalla en Bjössi.

Svo fékk ég bréf frá Póstinum, en hatturinn minn er lentur upp á Stórhöfða. Alveg makalaust reyndar að Pósturinn sendir mér bréfið eftir að tollafgreiðslan hefur lokað. Í bréfinu stóð þar að auki að ég þyrfti að heimila leit í pakkanum að kvittun fyrir vörunni. Í umslaginu með bréfinu fylgdi einmitt kvittunin sem Póstinn vantar. Ekki skil ég svona vinnubrögð.

Þá er skólinn formlega búinn. Meðaleinkunnin (eða einkannin, eins og svo margir virðast segja núorðið, sem er fáránlegt) er nógu há til að ég geti sótt um að verða óreglulegur nemandi, m.ö.o. að mætingin skiptir ekki máli.

Rússneska verður kennd næsta vetur, svo við kommar og fasistar fögnum ákaft. Til marks um hversu mikill fasisti ég raunverulega er ætla ég að kaupa þessa bók eftir andlegan leiðtoga minn. Enda erum við það sem við lesum, eins og Vésteinn Valgarðsson, byltingarsmiður, bendir réttilega á í þessari bloggfærslu sinni.