Varúð!

Stafsetningarfyrirkomulag þessarar síðu tekur breytingum frá og með þessari færslu. Orðið allt mun héðan af stafsett alt, og sömuleiðis öll þau orð er innihalda allt, s.s. allsstaðar (alstaðar), alltaf (alt af), lék á alls oddi (als oddi), alltént (altént) o.s.frv.

Eldri stafsetningarbreytingar hafa verið á orðunum jæja (jæa), ævi (æfi), biskup (byskup), skrítið (skrýtið) og skrímsli (skrýmsli). Síðastnefnda breytingin gengur frá og með þessari setningu til baka.

Hafið þakkir fyrir þolinmæðina.

Æfisagnaritarinn ég

Ég fletti afa mínum upp á netinu. Það eina sem um hann er skrifað er þetta:

„Eftirtaldir hafa gegnt embætti formanns frá stofnun félagsins [Félag verslunar- og skrifstofufólks Akureyri og nágrenni]:

Arngrímur Bjarnason 1939
… “

Þvílík neðanmálsgrein í mannkynssögunni! Helst langar mig til að skrifa æfiágrip hans á netið. Það verður ekki ítarlegt, ef miðað er við helstu heimildir, sem eru amma mín (f. 1926) og systur hans tvær eftirlifandi (f. 1911 og 1916), vegna þess hvursu erfitt yrði að halda þeim lengi ofan í diktafóni. En þetta verð ég að gera, ég sé það nú.