Kaffitími í Kringlusafni

H: Æ, hvað það var gott að komast í svona nudd. Þeir eru svo miklir fagmenn, vita allt hvaðeina hvernig skal bera sig að.
S: Já, ég fór í ægilega fínt nudd í Tyrklandi, vissi varla hvurt ég var að koma eða fara!
M: Tyrkneskt nudd, hvernig er það, er þá kannski gengið á manni?
AVS: Bróðir minn fór í kínverkst nudd um daginn, sá gerði sér nú lítið fyrir og gekk yfir rassinn á honum.
I: Það væri nú gæfulegt ef ég færi að ganga á bakinu á fólki.
D: Já, þeir ganga nú ansi langt í furðulegheitum þessir nuddarar.
AVS: Hann flýtti sér nú samt aftur til Kínverjans nokkrum dögum síðar, hann hefur greinilega verið svona hrifinn.
M: Þeir passa sig nú líklega á að brjóta ekki á manni bakið við þetta.
H (reynir að einskorða umræðuna við eigin reynslu): Svo nota þeir alls konar olíur sem manni hefði aldrei órað fyrir að væru til eða gerðu nokkurt gagn.
D: Þetta eru víst heilmikil vísindi.
I: Vinkonu minni leist nú ekkert á blikuna þegar hún fór til einhvers svona nuddara; þegar hann sullaði olíu yfir hana alla og kveikti svo bara í öllu saman!

AVS yfirgefur samræðurnar.