Category: Námið

Íslendingasaga dagsins

Gunnars saga Keldugnúpsfífls:

„Grís hét maður í Hörgsdal. Hann átti og tvo sonu. Hét annar Hrafn en annar Þorsteinn. Þeir voru stórir menn og sterkir, ágjarnir og illir viðureignar.

[…]

Var Helgi skartsmaður mikill, hæfilátur og hversdagsgæfur. Bróðir hans var honum óskaplíkur. Hann lagðist í eldaskála […] Varð hann mjög óþokkasæll af alþýðu fyrir þetta sitt tiltæki. Var hann nú kallaður af þessu um allar sveitir Keldugnúpsfífl.

Enn kemur fyrir í sögunni þræll að nafni Kolur. Það má skemmta sér yfir því.

Sjúklegt veður á mánudegi

Cure-stemningin ríður húsum hér á Öldugötunni svo allir nærliggjandi vegfarendur bíta í rykið og hníga í duftið:

However far away, I will always love you.
However long I stay, I will always love you.
Whatever words I say, I will always love you.

Why are you so far away? she said,
Why won’t you ever know that i’m in love with you?
That i’m in love with you?

You, soft and only
You, lost and lonely
You, strange as angels
Dancing in the deepest oceans
Twisting in the water
You’re just like a dream…
Just like a dream…

Hvað er málið með þetta veður? Djöfulsins snilld! Samt ekki, ég er fastur inni. Þetta nám, þettanámnámnámnámþetta.

Show me how you do it,
And I promise you,
I promise that I’ll run away with you.
I’ll run away with you …

Mér finnst eitthvað svo einkennilega heillandi við að ganga yfir túnið framhjá Landakotskirkju á hverjum morgni, sér í lagi í glampandi sól eins og hefur verið í dag. Glampandi sól og geislandi veðri. Geitungarnir gera sér forboðnu berin á Reynitrjánum að góðu og vér upprennandi fræðungar sitjum hérna eins og kúkur að kljást við textavensl Íslendinga- og riddarasagna. Í góða veðrinu. Morknum eins og skinnur þær er við skoðum. Stalst raunar í tilefni dagsins út á svalir að fá mér bjór meðal röndóttu skrímslanna í trjánum í garðinum mínum. Þá kemst ég kannski í enn meiri tengsl við viðfangsefni dagsins, ástina og Íslendingasögur.

Orðið ást í öllum orðmyndum kemur 25 sinnum fyrir í Íslendingasögum [Uppfært: Bíddu, ég lokaði óvart glugganum, leitaði aftur, og þá komu 34 leitarniðurstöður til viðbótar! Í þetta sinn hefur Laxdæla vinninginn.]. Þar af langoftast í Hallfreðar sögu vandræðaskálds (eftir Möðruvallabók). Sem segir okkur að miðað við fyrsta leitarorð er Hallfreðar saga undir langmestum áhrifum frá riddarasögum. En þetta er nú bara miðað við fyrsta leitarorð svo við skulum ekki fara að æpa neitt uppfyrir okkur í hrifningu.

Monday you can fall apart, Tuesday, Wednesday break my heart. Thursday doesn’t even start, it’s Friday, I’m in Love!

Þetta veður er eiginlega einum og fallegt, og dagurinn eiginlega einum of dásamlegur (í hlutlægum skilningi). Mikill eiptími í aðferðum í dag þar sem fólk með miklar spekúlasjónir um rannsóknarmöguleika á fótbolta annars vegar og fóbolta hins vegar fóru mikinn. Eiginlega langaði mig til að hengja mig í hleðslutækinu mínu af óþoli. Þvínæst Árnagarðast ögn með bekkjarsystur með þónokkurri hluttekningu á verkefnavali kennara vorra sem óskeikulir eru með öllu í vísindalegum mikilfengleik sínum. Þvínæst setið lengur meðal eipara hávísindalegra hugsjóna delerandi stórkostlegum pælingum um doktorsritgerðarefni versus BA-ritgerðarefni. Á nótunum: Væri hægt að brúka síðarnefnda ritgerð sem kafla í fyrrnefnda. Hélt ég yrði ekki eldri.

Sun is up, so happy I could scream! Clouds drift by and everything’s like a dream.

Sjitt hvað ég meika ekki að hanga hérna inni … þarf sólgleraugu til að sjá á skjáinn. Gleraugu textavensla til að skilja verkefnið. Hahaha, þetta er svo asnalegt myndmál!

Fjandinn

Ég er enn ekki sofnaður. Það veit ekki á gott, mér hefði verið rækileg þörf á að sofa úr mér fýluna. Þess gefst víst ekki kostur núna, það er málfræðitími klukkan tíu, svo vinna á safninu frá hádegi til sjö. Eftir það þarf ég víst að ná mér upp í lestrinum.

Vona að mér fari svo loksins að gefast almennilegur tími til að klára þessa helvítis bók mína.

Lo and behold, thine master's shadow, for there shalt thou forever dwell

Ef það hvarflaði að einhverju ykkar að ég væri ekki mestur allra snillinga er stigið hafa spor sín þung á jörðu þessari þjakaðir af ómælandi dýpt eigin speki og byrði allrar jarðneskar vitneskju, þá skal ég taka af öll tvímæli um það með lítilli sögu sem varðar síðustu færslu aðeins lítillega. Sögu af því er ég fór út yfir endimörk eigin skynsemi.

Ég las vitlausa grein fyrir morgundaginn. Það verður alls ekki fjallað um Nietzsche, ekki neitt. Sjá, þar fer meistarinn eini sanni! Sjálfur kondór alls skilnings og skynjunar, hvað sem það er, og sjá hve spakur hann er!

– og sjá, hvað klukkan er orðin …

Ágætis byrjun

Maður hlýtur að spyrja sig, þegar félagar í sama kúrsi og maður sjálfur reyna að fá mann til að sólunda heilu kvöldi á kaffihúsi, hvort þeir hafi ekki fengið viðfangsefni tímans daginn eftir sent í pósti?

Í það minnsta fór mitt kvöld eftir vinnu í að lesa Nietzsche-greinina yfir í rólegheitunum. Á morgun geri ég svo ráð fyrir að vera á Hlöðunni fyrri part dags að klára restina af því sem sett hefur verið fyrir.

Það er aftur orðið gaman að læra. Eins gott líka, það er svo margt annað sem ég er orðinn þreyttur á.

Fyrsti dagur eftir frí

Kom aftur í bæinn í gær. Verð að játa að ég var ekkert sérlega feginn að sjá þessa steinkumbalda aftur. Enda þótt ég sé nú orðinn það blankur að ég veit ekki hvernig fer með skólabækurnar … Ferðasagan öll kemur svo von bráðar. Hún verður nokkuð löng.

Vaknaði á réttum tíma og fékk mér tvo kaffibolla og jafnmargar sígarettur í morgunmat. Skólinn er sumsé byrjaður. Fór í minn fyrsta tíma í dag í aðferðum og vinnubrögðum, annað ekki. Ætti að fara létt með þann áfanga. Finnst skemmtilegt þegar kennarinn talar um hvað hægt sé að gjera á njetinu þrátt fyrir
marga annmarka.

Fór þareftir og hitti leiðbeinanda minn í sjálfsnámi í ítölsku hjá Tungumálamiðstöð Háskólans. Líst ekki alveg eins vel á það, gæti verið að ég sleppi því ef það tekur of mikinn tíma, sem mér sýnist á öllu að það muni gera.

Hitti svo ýmsa vini og kunningja í skólanum, þá Bjössa, Þorkel, Sverri og Jón Örn. Ásgeiri hef ég svo um það að kenna að ég mætti óblautur og ógangþreyttur í skólann. Skömm sé honum að því, svo og veðurstofunni fyrir að ljúga að mér í n. skipti.

Svo er fyrsti vinnudagurinn minn í Sólheimasafni á morgun. Ætli vinnan verði ekki líf mitt og yndi í vetur sem endranær.

Af dögum liðnum, líðandi, komandi

Fallegur morgunn á fyrsta degi Bókabílsins eftir sumarfrí, og jafnframt síðasta starfsdegi mínum þar. Allra síðasti dagurinn minn á safninu á morgun. Umsókn mín um áframhaldandi starf í vetur liggur inni, en óvíst er hvar mér verður komið fyrir. Er eiginlega ekki reiðubúinn að hætta í Kringlunni, en það er víst lítið sem ég gæti gert ef ég verð sendur eitthvert annað.
En það var fínt að fá að vera á bílnum í dag, gaf mér tóm til að setjast niður milli tarna á elliheimilum, í blómaangan, sólskini og gosbrunnaniði, með sígarettu og hugsanir mínar einar. Margt sem hægt er að leiða til lykta í huganum þegar maður loks fær frið frá áreiti hversdagslífsins. Oft er rólegt á bílnum. Þess vegna kann ég því vel að vera þar.

Kannski sérstaklega í dag, því annars er allt búið að vera brjálað að gera þessa síðustu daga. Við höfum verið að skipuleggja upplestur Nykurs á Menningarnótt, nánast allt komið á hreint þar.

Svo höfum við Alli verið að skipuleggja tveggja vikna hringferð um landið, á enn eftir að verða mér úti um ýmislegt! Einu reddaði ég í dag, léttu og hæfilega stuttu lesefni til að hafa með mér. Tók mér á safninu Hvar frómur flækist, fjórar ferðasögur Einars Kárasonar. Auk þess hef ég með ljóðasafn Ísaks Harðarsonar, Ský fyrir ský. Það ætti að duga. Ferðin sjálf ætti svo að duga mér til vinnu að fyrsta hluta bókarinnar minnar, auk þess að sjálfsögðu að sjá landið, skemmta mér og þar fram eftir götunum.

Umsókn mín um námslán kemst ekki til afgreiðslu fyrr en eftir að ég er farinn, svo ég þarf að fara í talsverðar útréttingar í sambandi við þau úti á landi. Sem ég vona að verði minna vesen en öll tilefni standa til. Ég þarf nefnilega framfærslulán strax í september, ef ég á að geta keypt mér skólabækur. Auk þessa alls er svo margt annað fleira sem ég þarf að klára áður ég fer á sunnudagsmorgninum. Margt fleira sem ég man ekki allt hvað er, fokkfokkfokkfokk …

Og aldrei get ég munað eftir að kaupa kaffivél! Farinn að sjóða mér Kenýakaffi í espressokönnu. Niðurstaðan eitthvað í ætt við það sem Bjarti hefði þótt duga í að tjarga hrúta upp úr. Gæti allt eins étið það upp úr pakkanum!

Guð!

05.40.11 • Forsaga íslenskrar tungu • (5e) • Vor

Gotneskir textar og meginatriði gotneskrar málfræði með samanburði við norrænu; rúnalestur; valin viðfangsefni úr frumnorrænni málsögu.

Guð hve mig langar! En ég má ekki. Má ekki! Hvers eigum vér nýnemar eiginlega að gjalda?! Að ógleymdu:

05.40.24 • Goðafræði Snorra-Eddu • (5e) • Vor

Efni námskeiðsins er goðafræði í Eddu Snorra Sturlusonar. Verður einkum fengist við Snorra-Eddu frá heimildafræðilegu sjónarmiði, þ.e.a.s. gildi ritsins sem heimildar um norrænar goðsagnir og hinn heiðna arf og helstu vandamál þar að lútandi. T.d. verður hugað að hlutverki munnmæla og kvæða um goðin í ritinu og meðal helstu samanburðartexta eru ýmis eddu- og dróttkvæði sem fjalla um goðfræðileg efni. Spurt verður um varðveislu þess háttar efnis eftir kristnitöku og fram á daga Snorra, hugsanleg kristin áhrif (s.s. frá kristnum fræðsluritum miðalda), en þar að auki verða athuguð áhrif sjálfs höfundarins á efnið og tilgang Snorra með ritinu. Markmiðið er að kynna fyrir stúdentum grundvallarvandamál og aðferðir í rannsókn Snorra-Eddu sem heimildarrits um norræna heiðni og goðsagnir og mikilvægi hennar og sérstöðu á því sviði og fyrir forníslenska bókmenntasögu.

Ég tek andköf!

Morgunverður og H-skóli

ÁrnagarðurVaknaði eftir um þriggja tíma svefn til að keyra móður mína í vinnuna (vakti frameftir við að klára Draumalandið, eftir um sex vikna hlé vegna anna). Þá var ekki amalegt að koma við í hverfisbakaríinu og kaupa rúnstykki af bélvaða flagðinu því arna, sætu bakarísstúlkunni, sem táldregið mun hafa margan góðan drenginn. Þvínæst var keypt grænmeti, ostur og skinka. Með þessu drekk ég kaffi. Morgunverðurinn verður varla betri.

Ástæða þess að ég er á bílnum í dag er sú að ég nenni ekki að taka strætó upp í Háskóla. Það eru víst ekki allir tilbúnir að ákveða framtíð sína strax tveimur dögum eftir útskrift, en ég var búinn að ákveða það fyrir minnst þremur árum, jafnvel lengra síðan, ég bara man það ekki. Ekki búinn að vera utanskóla í heila tvo daga, onei. Ég held ég haldi mig við þetta fyrirkomulag í vetur:

05.40.00 • Aðferðir og vinnubrögð • (2,5e) • Haust • [ECTS: 5] • 2f
05.40.01 • Inngangur að málfræði • (5e) • Haust • [ECTS: 10] • 3f
05.40.21 • Bókmenntafræði • (5e) • Haust • [ECTS: 10] • 3f
05.40.03 • Íslensk hljóðfræði og hljóðkerfisfræði • (2,5e) • Haust • [ECTS: 5] • 2f
05.40.20 • Íslensk bókmenntasaga • (5e) • Vor • [ECTS: 10] • 3f
05.40.06 • Íslensk setningafræði og merkingarfræði • (2,5e) • Vor • [ECTS: 5] • 4f
05.40.24 • Goðafræði Snorra-Eddu • (5e) • Vor • [ECTS: 10] • 4f
05.50.18 • Íslendingasögur • (2,5e) • Vor • [ECTS: 5] • 2f
05.40.04 • Íslensk beygingar- og orðmyndunarfræði • (2,5e) • Vor • [ECTS: 5] • 2f

Undirstrikaðir kúrsar standa utan skyldunnar. Eins og glöggir lesendur taka eftir tek ég 15 einingar á haustönn en 17,5 á vorönn. Ákvað að prófa kerfið áður en ég geri eins og mér var ráðlagt, að hámarka einingafjölda per önn. Svo finnst mér dálítið leiðinlegt að hafa ekki rúm fyrir málsöguna strax á haustönn, eða íslenskt mál að fornu. Fannst réttast að taka grunnáfangana í málfræði áður en ég færi í virkilega djúsí stöffið. Þá verður næsti vetur bara þeim mun skemmtilegri!
Eitthvað segir mér svo að bókmenntafræðin verði fremur þungur kúrs, en mér er sagt að þyngsti kúrsinn innan sjálfrar bókmenntafræðinnar sé Straumar og stefnur í bókmenntafræði, og hann er ég skyldugur til að taka. Tek hann bara næsta vetur. Ó, Jesúspétur (hvers vegna er þetta ekki leyfilegt mannanafn, spyr ég), hve þetta er spennandi!