Eygló Traustadóttir verkamaður

Var að finna gamla launaseðla. Þar er ég titluð Eygló Traustadóttir verkamaður.

Sumarið 1998 vann ég í fyrsta skipti í frystihúsi. Ég fékk að koma með mömmu í vinnuna eftir hádegi. Við vorum nokkrir krakkar þarna, man allavega eftir Oddnýju og Halla Dan. Man ekki nákvæmlega hvað við vorum að gera en minnir að við höfum staðið við endann á færiböndunum og hent fiski í kör. Fyrir þetta fékk ég 312, 71 kr. á tímann + bónus sem var þá á bilinu 118, 71 – 160,18 kr. á tímann.

Já, einu sinni var ég verkamaður.

Bekkjarfundir

Þegar ég var í 4.-5. bekk héldum við bekkjarfundi. Við Hrönn vorum iðulega fundarritarar, sóttumst eftir því. Ég vona að enginn verði sár þó ég birti eina fundargerð hérna.

Efni bekkjarfundar í desember: Jólin og bekkjarfundirnir
Fundarstjóri: Garðar Marvin
Fundarritarar: Eygló og Hrönn
Nokkrir foreldrar voru gestir fundarins.

Sigurjón: Ég vil hafa góðan mat og gjafir
Sigrún: Þó að það séu gestir skulið þið ekki vera feimin. Mér finnst að öllum eigi að líða vel á jólunum.
Elena: Allir eiga að vera í góðu skapi og góðir við hvern annan á jólunum.
Reynir: Ég vil hafa góðan mat, alla í góðu skapi og engin rifrildi.
Hrönn: Ég vil að öllum líði vel og allir séu í góðu skapi.
Reynir: Ég vil hafa jólin með mörgum stórum pökkum og góðum mat.
Elena: Ég vil skreyta húsið.
Þorsteinn: Ég vil góðan mat og pakka.
Hrönn: Ég vil að allir séu hamingjusamir á jólunum.
Sigurjón: Ég vil stóra og þunga pakka.
Oddný: Ég vil hafa fallegt jólatré og alla hamingjusama.
Elías: Skreyta vel og borða rjúpur.
Sigrún: Nú skulið þið koma hérna upp og segja hvernig jólin væru ef þið mættuð ráða.
Oddný: Ég vildi að hungursneið myndi hætta og að allir í heiminum yrðu hamingjusamir.
Reynir: Ég vil skreyta frelsisstyttuna.
Elena: Ég vil hafa smákökur og fallegt jólatré.
Anna Kristín: Ég myndi vilja að öllum í heiminum myndi líða vel.
Heiða: Ég vil að öllum líði vel og allir fái mat á jólunum.
Eygló: Ég vil að allir séu hamingjusamir á jólunum.
Elías: Ég vil skreyta frelsisstyttuna.
Arnar: Ég vil að öllum líði vel á jólunum.
Lena: Allir eiga að vera góðir við hvern annan á jólunum.
Elena: Ég vil gefa fátækum peninga á jólunum.
Eygló: Jólin eru haldin vegna fæðingar Jesú.
Alfreð: Mér þætti gaman að einhver úr gestahópnum myndi tala.
Anna Kristín: Við höldum bekkjarfundi á öðrum hverjum föstudegi.
Elena: Stundum höfum við spilatíma.
Anna Pála: Ég ætla að þakka ykkur fyrir að bjóða okkur á þennan bekkjarfund. Mér finnst mjög sniðugt a hafa bekkjarfundi og varðandi jólin þá held ég að flest sé komið fram hjá ykkur.
Reynir: Ég vil hafa bekkjarfundi áfram.
Elena: Ég vil halda áfram með bekkjarfundina.
Sigurjón: Mér finnst gaman á bekkjarfundum.
Heiða: Ég er sammála Sigurjóni.
Oddný: Ég vil hafa bekkjarfundina áfram, þeir eru skemmtilegir.
Hrefna: Mér finnst gaman á bekkjarfundum og ég vil hafa jólin eins og þau eru.
Elías: Ég er sammála Hrefnu.
Helga: Ég vil halda bekkjarfundum áfram.
Hildur: Ég hef ekkert að segja.
Garðar: Mér fannst þetta velheppnaður bekkjarfundur, fundi er slitið.

Næsta sumar verður bekkjarmót hjá okkur. Það væri gaman að safna saman svona „vitleysu“ til að skoða þá og gera eitthvað með. Fann hjá mér ýmislegt skemmtilegt tengt bekknum s.s. ljóðabækur og þorrablótssöngbækur. Ég á líka gömlu góðu tónmenntamöppuna. Svo væri náttúrlega snilld ef einhverjir eiga ennþá gömlu „vinabækurnar“. Hvernig er það annars, er búið að stofna nefnd?

These were the days…

Sunnudagur 12. maí 1991
Kæra dagbók
Í dag vaknaði ég hjá ömmu minni. Klukkan 8 fór ég inn til ömmu, síðan fékk ég mér kók og pönnukökur. Fórum síðan í langan labbitúr upp í kletta og niður á götu. Löbbuðum til langömmu. Þegar við komum að Shell-sjoppunni hittum við afa á fína bílnum. Fórum með afa á pósthús, síðan heim. Eftir hádegi fór ég að leika mér. Síðan kom rigning. Þá fór ég inn. Áður en rigningin kom jörðuðum við þröst. Síðan fórum við heim í Rauðhóla með langömmu og Ástu Hönnu. Við fengum pönnuköku og fleira. Við Svenni fórum í fjallgöngu. Síðan lögðum við kapal. Fórum síðan að sofa klukkan 23:06
Bless, bless kæra dagbók

Davíð Oddsson hættir störfum

Er að skemmta mér við að skoða gamla pappíra. Fann þar m.a. blað sem við Hrönn gáfum út 24. ágúst 1994. Við vorum ansi forspáar þegar við skrifuðum greinina „Davíð Oddsson hættir störfum“

Af hverju hættirðu störfum Davíð?
Þetta er ansi erfið spurning svarar Davíð. Ég var orðin leiður á þingstörfum.

Af hverju leiðinlegt?
Nú auðvitað þingmennirnir, allavega Jón Baldvin og Jóhanna Sigurðar svarar Davíð æstur.

En er ekki einum of að hætta alveg þingstörfum?
Nei, ég ræð því sjálfur svarar hann enn æstari.

Nú ljúkum við þessu viðtali við Davíð Oddsson.

Með greininni er þessi fína mynd af Davíð þar sem hann segir Ég hætti störfum og fólkið í kring klappar.

Í litlum ramma á síðunni er svo mynd af Loka sem segir En Dabbi minn er óþarfi að vera svona æstur.

Skaupið

Skaupið var gott. Það er eins gott að segja það bara af því annars er maður að viðurkenna að maður sé bæði vitlaus og húmorslaus 😉 Ég er reyndar svo vitlaus að ég hló mest að Ólífur Ragnar Grímsson 🙂 I went to a paperschool in Hollywood var líka fyndið. Fannst gott hjá þeim að senda Álgerði á lónsbotn með birgðir af dósakóki. En sennilega hafa þeir sem ekki þekkja til sjónvarpsstöðvarinnar Sirkus misst af 1/3 af bröndurunum.

Gleðilegt ár!