Greinasafn fyrir flokkinn: Framtíðarplön

Sumarið er tíminn…

Ég veit að ég á ennþá einhverja lesendur sem bíða í ofvæni eftir næstu færslu 😉

Ég er búin að plana ýmislegt skemmtilegt fyrir sumarið.

-Á fimmtudaginn, 17. maí fer ég til Vopnafjarðar. Tilgangur ferðarinnar er auðvitað fyrst og fremst að fara í sauðburð og hitta fjölskylduna. En ég stefni líka að því að ná að lesa svolítið, fara í sund og stuttar gönguferðir.

-Á hvítasunnudag flýg ég aftur til Reykjavíkur og um kvöldið förum við Óli á tónleika með Deep Purple og Uriah Heep. Hlakka mest til að heyra í Uriah Heep.

-Við stefnum að því að fagna þegar reykingabannið verður sett með því að fara út að borða:) og það er aldrei að vita nema maður skelli sér á skemmtistað (reyklausan að sjálfsögðu!) á eftir. Mikið hlakka ég til þegar hætt verður að spyrja reyk eða reyklaust um leið og maður kemur inn á veitingahús og ég hlakka enn meira til að geta farið út að skemmta mér án þess að fá reykingahausverk og að þurfa að þvo bæði mig og fötin mín eftirá.

Hjördís ætlar að halda uppá þrítugsafmælið sitt með pomp og prakt. Betra seint en aldrei 😉

-Sigrún Ásu vinnufélagi ætlar að halda uppá fimmtugsafmælið sitt

Rósa  útskrifast úr þjóðfræðinni og allt stefnir í gott partý 🙂

-Á 17. júní verður gott veður og eitthvað skemmtilegt brallað (ég er allavega búin að ákveða það)

-Við Óli stefnum að því að bregða okkur í Mývatnssveit í útilegu og á tónleika með Þingtak. Íris og Hrafnkell verða allavega á staðnum og e.t.v. fleiri meðlimir Nafnlausa saumaklúbbsins.

-Við Óli förum saman til Köben. Þar verð ég með Svenna bró, Hrönn og Frey frænda í viku en Óli fer til Århus í sumarskóla (en ég skrepp örugglega eitthvað í heimsókn til hans). Mamma kemur svo líka til Köben. Það fyndna er að við Óli fljúgum frá Keflavík, Svenni og co frá Egilsstöðum og mamma frá Akureyri. Þetta verður mjög gaman enda ekki svo oft sem við systkinin eyðum svona löngum tíma saman, hvað þá með mömmu með okkur, hefur líklega ekki gerst síðan jólin 1996 eða eitthvað. Ekki spillir fyrir að fá loks tækifæri til að kynnast Frey litla svolítið betur. Eftir Köben-dvölina förum við eitthvað ude på landet og heimsækjum Frú Jóhönnu og co og eitthvað fleira sniðugt. Svo er aldrei að vita nema maður kíki á Hróarskeldu. Þetta verður þá mín lengsta utanlandsferð til þess, heilir 12 dagar! Já, maður verður að venja sig við hægt og rólega.

-Svo er brúðkaup hjá Írisi og Hrafnkeli í Skíðadal (rétt hjá Dalvík). Mér skilst að þetta verði ekta sveitabrúðkaup þar sem dresskódið hljóðar uppá lopapeysu og gúmmískó. Ég hlakka mikið til og er búin að panta gott veður 🙂

-Í lok júlí verður bekkjarmót/fermingarbarnamót hjá mér á Vopnafirði. Verið að fagna því að 10 ár eru liðin síðan við fermdumst. Vonandi verður það skemmtilegt. Þessa sömu helgi er Vopnaskak á Vopnafirði, semsagt bæjarhátíð Vopnafjarðar og mikið um að vera.

-Um verslunarmannahelgina stefni ég að því að vera á Norðfirði á Neistaflugi. Það er þó ekki 100% ákveðið.

-Milli bekkjarmóts og verslunarmannahelgar ætla ég að vera á Vopnafirði og njóta sveitasælunnar.

Já, þetta er það sem er planað af sumrinu so far.

Ásamt þessu öllu ætla ég að vera dugleg í sundinu í sumar og er meira að segja búin að setja mér markmið í þeim efnum. Þori ekki að segja frá markmiðinu alveg strax, kannski þegar ég sé fram á að ná því 😉 Svo ætla ég líka að vera dugleg í fjallgöngum, er með nokkur fjöll í nágrenni Reykjavíkur í sigtinu eins og t.d. Keili, Helgafell, Akrafjall og Esjuna, hverjir vilja vera með?

Já, það stefnir í skemmtilegt sumar 🙂

Nú er sumar…

Það er kominn júní. Þá er komið sumar.

Voðalegar öfgar í veðrinu fyrir austan og norðan. Snjókoma og frost eina vikuna, þá næstu 20 stiga hiti!

Sátt við úrslitin í kosningunum á Vopnafirði. Öflugur minnihluti, vonandi. Jafnvel öflugur meirihluti, vonandi. Ósátt við minnihlutastjórnina í Reykjavík. Nema að það verði til þess að útrýma Framsóknarflokknum. Þá verð ég glöð. Sorrý, Siggi „frændi“.

Sá litla tvíbura á laugardaginn. Þær eru frænkur mínar. Helgi er langafi okkar allra og Guðrún langamma. Hef aldrei haldið á jafn litlu barni.

Fæ vonandi að sjá lítið barn um helgina. Hún er frænka hans Óla.

Ætla líklegast í nám í haust, með vinnunni (spyrjið mig bara, ef þið hafið áhuga). Komin á það stig að skólast með vinnunni í stað þess að vinna með skólanum.

Mér finnst að það ætti að hafa fleiri þætti þar sem eru bara fulltrúar frá einum stjórnmálaflokki. Sá það hjá Ingva Hrafni. Enginn ágreingingur, klisjur eða frammíköll, bara létt spjall um hvað hinir eru miklir hálfvitar.

Góða nótt!

Gleðilegt sumar!

Gleðilegt sumar!

Hvað ætla ég að gera í sumar?
Það er tvennt sem liggur fyrir en það er að klára lokaverkefnið mitt og vinna á bókasafninu mínu. Svo vonast ég til að koma fleiru skemmtilegu fyrir t.d. að komast til Vopnafjarðar, fara í stuttar ferðir út fyrir borgina og eiga skemmtilegar stundir með vinum (sem ég hef svolítið vanrækt undanfarið).

En svo er eitt enn sem liggur fyrir en það er að taka til í íbúðinni okkar. Ég hef einhvernveginn ekki haft orku og tíma til þess að þrífa hana almennilega síðustu vikur. Kannski ég fái Allt í drasli í heimsókn!

Jæja, reynið að njóta sumardagsins fyrsta! Ég ætla að nota hann vel, innandyra, við að gera verkefni…

Gönguæði

Mig langar alveg óskaplega til að fara í gönguferð. Og þá meina ég svona langa gönguferð um óbyggðir. Fékk lánaða göngubók um Hornstrandir á bókasafninu og varð alveg sjúk. Það er á planinu að fara þangað innan fimm ára. Ef ég fer ekki í gönguferð ætla ég að minnsta kosti að fara til Hesteyrar, en það er hægt að sigla þangað frá Ísafirði.
Í dag var ég svo að skoða heimasíður Útivistar og Ferðafélagsins…og varð enn meira sjúk…mig langar að svvvvooooo!
Ég ætla að byrja þetta gönguæði mitt með því að fara á Esjuna í sumar og svo langar mig líka að ganga það sem ég held að heiti Selvogsgata…og liggur frá Hafnarfirði yfir að Strandakirkju í Árnessýslu.
Hvern langar að koma með mér?

Páskaplan

Það er nánast orðið ákveðið að ég fer til Norðfjarðar um páskana. Jibbý! Ég hlakka mikið til, enda ekki farið þangað síðan í desember 2001 og þá stoppaði ég bara í einn dag. Markmiðið með ferðinni er fyrst og fremst að heimsækja afa en auðvitað líka að kíkja á aðra ættingja og fleira skemmtilegt.
Ætla svo að taka með mér lesefnið í Starfsemi og rekstri bókasafna og upplýsingamiðstöðva og reyna að vera dugleg að lesa inná milli skemmtiatriða.

Framtíðarplön

Ég er alveg að missa mig yfir kennsluskránni! …af því að hún er svo spennandi. Ég er líka að vinna í því núna að ákveða hvernig ég á að klára þetta blessaða nám mitt…og ég sem er nýbyrjuð.

Núna er planið mitt sem sagt að taka bókasafns- og upplýsingafræði til 90 eininga en hafa inní því 15 einingar af annaðhvort þjóðfræði eða safnafræði. Ég bara veit ekki hvort það á að á að vera þjóðfræði eða safnafræði.
Ef ég tek þjóðfræði þá fer ég í Inngang að þjóðfræði, Efnismenning: hlutirnir, heimilið, líkaminn og Þjóðfræði samtímans: álfar, innflytjendur og hryðjuverkamenn. Ef ég tek safnafræði þá fer ég í Inngangur að miðlun, Fornleifavernd og Sagnfræði og söfn: heimildafræði og miðlun.

Ef ég verð súperdugleg þá get ég útskrifast í júní 2005 en raunhæft plan er október 2005. Já, ég er alltaf svo mikið að flýta mér…en það er alveg óvart.

Svo er ég komin með massívt plan um hvað ég ætla að gera eftir útskrift…eða ekki.

Jæja, er farin að sofa. Góða nótt!