Greinasafn fyrir flokkinn: Líkamsrækt

Dagarnir líða

Long time, no blog! Reyndar ekki langur tími miðað við oft áður en…

Á sunnudaginn fór ég í Vantrúarlunch. Gestrisnin og veitingarnar hjá Matta og Gyðu klikkuðu ekki frekar en fyrr daginn. Og félagsskapurinn svosem ágætur líka 😉
Eftir lunchið skellti ég mér í sund. Það var bara svo hrikalega gott veður á sunnudaginn að það var ekki hægt að vera inni. Synti 550 m og virðist bara vera í nokkuð góðu sundformi þrátt fyrir að hafa ekkert synt í 2 mánuði. Þarf að gera meira af þessu.
Fór til Rósu og Jónbjörns um kvöldið og horfði með þeim á Næturvaktina. Það eru nokkuð smellnir þættir 🙂

Á mánudagskvöldið fórum við Rósa í bíó. Sáum Heima 🙂 Mér fannst hún æði og væri alveg til í að fara aftur. Hún var falleg, hún var hljómfögur, hún var fyndin, hún vakti gæsahúð, hún fyllti mig stolti, hún fyllti mig kjánahrolli, hún vakti hjá mér löngun til að fara á ródtripp um Ísland. Ég mæli með henni.

Í gærkvöldi fór ég á kaffihús með saumaklúbbnum. Fórum á Kaffi Mílanó sem er alltaf voða næs. Plönuðum margt en kjöftuðum meira 🙂

Ég ætla að vera heima hjá mér í kvöld.

Í sveitinni og í sundi

Ég hef það bara gott hérna í sveitinni. Það er í ýmsu að snúast þessa dagana; taka á móti lömbum, gefa, brynna, hreinsa rennuna, krubba af, taka hildar, bera undir, merkja, marka, láta út, gefa pela, láta sjúga, venja undir og fleira og fleira. Það er gaman þegar vel gengur en stundum koma dagar þar sem allt gengur á afturfótunum og þá er ekki eins gaman.

Reynir afi skrapp frá Norðfirði í heimsókn til okkar í dag. Hann var að sækja sængina og koddann sem ég keypti fyrir hann um daginn og harðfisk sem mamma keypti fyrir hann (sá bakkfirski er víst sá allra besti). Það var gaman að sjá hann aðeins þó stutt væri. Við mamma skruppum með honum í sund. Ég synti 550 m sem er sennilega það mesta sem ég hef synt í einni ferð í Selárdalslaug síðan ég var þar í skólasundi. Reyndar felst sund í 12,5 m laug helst í því að spyrna sér í bakkann en ég er nokkuð góð í því 😉

Fólkið í 6til7

Mér finnst Ágústa Johnson alltaf svolítið sjarmerandi. Ég er einmitt að spá í að kaupa mér kort í Hreyfingu þegar ég klára námskeiðið sem ég er á núna. Er ekki gott að æfa í Hreyfingu, Eva?
Aftur á móti finnst mér Guðlaugur, maðurinn hennar Ágústu, ekkert sérstaklega sjarmerandi.

Mér finnst Katrín Jakobs alltaf svolítið sjarmerandi. Ég er einmitt að spá í að ganga í flokkinn sem hún er varaformaður í.
Aftur á móti finnst mér Illugi Gunnars, sem situr við hliðina á henni, ekkert sérstaklega sjarmerandi.

Það skal tekið fram að Guðlaugur og Illugi er báðir í framboði til prófkjörs Sjálfsstæðisflokksins.

Heiðmörk, Gullni hringurinn og maraþon

Grillið í Heiðmörk var gott. Komst loksins að því hvar Rauðhólar væru.

Fór Gullna hringinn með Evu í gær. Fengum mjög undarlegt veður, skiptust á skin og skúrir. Borðuðum nesti á Þingvöllum í sólskini. Borðuðum aftur nesti í bílnum við Gullfoss, ekki hægt að borða úti fyrir roki og rigningu. Ég legg til að vegurinn milli Þingvalla og Laugarvatns verði lagaður, a.m.k. að reynt að vinna aðeins á þvottabrettunum. Annars var þetta góð ferð.

Ég var að spá í að taka þátt í Reykjavíkurmaraþoninu og hlaupa heilt maraþon…eða kannski bara 3 km skemmtiskokk. Er einhver sem nennir að rölta með mér?

Sumarið hingað til…

Nú hef ég ekkert bloggað í næstum mánuð. Það er ennþá júní og komið enn meira sumar.

Við fórum til Akureyrar um hvítasunnuhelgina. Þar hittum við marga Óla-ættingja. 3 litlar frænkur (Kötlu krútt sáum við í fyrsta skipti), eina systur, 5 frændur, Siggu ömmu, Gunnþór afa og fleiri. Við förum orðið frekar sjaldan til Akureyrar, ég hafði ekki komið í rúmt ár núna (fyrir utan millilendingar á leið til Vopnafjarðar).

Ég fór á Snæfellsnes helgina 9.-12. júní. Amma, afi og Ásta Hanna voru þar í sumarbústað. Það var flennibjart og gott útsýni þegar ég kom á föstudagskvöldinu. Þoka og rigning laugardag og sunnudag. Hávaðarok á mánudeginum þegar ég fór heim aftur. Við gerðum þó ýmislegt þrátt fyrir leiðindaveður. Fórum til Ólafsvíkur og Stykkishólms og skoðuðum þar söfn og rúntuðum um bæina. Sáum rallýkrosskeppni á Hellissandi. Það fannst mér gaman. Svo fórum við í Bjarnarhöfn á Hákarlasetrið og þar voru líka sýnd töfrabrögð í kirkjunni. Hildibrandur er snillingur. Svo grillaði ég í einhverri mestu rigninu sem ég hef lent í. Það var áhugaverð reynsla. Ég verð að fara aftur á Snæfellsnesið fljótlega til að sjá meira.

17. júní helgina komu amma, afi og Ásta Hanna til okkar eftir vikudvöl á Snæfellsnesinu. Ég fékk að rúnta um með þau á stóra sjálfskipta jeppanum þeirra. Það var áhugaverð reynsla fyrir mig sem keyri alltaf um á litlum, beinskiptum bíl. Við fórum í búðir, í kaffi í Perlunni og heimsóknir. Svo grillaði ég, í aðeins betra veðri í þetta skipti. En það varð hálfgerð sviðasteik því það kviknaði í grillolíunni. En það var ekki nema ein sneið sem þurfti að henda.

Á fimmtudagskvöldið fór ég aftur í Perluna. Í þetta sinn með trúleysingum eins og Richard Dawkins, Dan Barker og Óla Gneista. Það var gaman. Það var frábært útsýni úr Perlunni þetta kvöld og gaman að sýna útlendingum borgina og nánasta nágrenni. Snæfellsnesið sást í heild sinni og alltaf finnst mér það jafn tilkomumikil sýn.

Helgin núna hefur verið frekar róleg hjá mér. Óli er á trúleysingjaráðstefnunni (og svífur um af hamingju) svo ég hef mestmegnis verið heima í rólegheitum. Sat út á palli að lesa í sólinni í gær. Það var notalegt. Náði að klára Kleifarvatn, held svei mér þá að ég hafi verið 2 mánuði að lesa hana, gat bara ekki lagt hana frá mér! Hún var svona ágæt, hefur lesið betri Arnaldarbækur. Byrjaði svo að lesa Hulduslóð eftir Lizu Marklund. Það er svona hörmungarævisaga. Hún lofar góðu, gengur allavega hraðar með hana en Kleifarvatn.
Í gærkvöldi fór ég í bíó með Hrönn vinkonu. Fórum að sjá Just my luck. Hún var hún frekar mikil froða. Alveg hægt að brosa að henni en hún skilur ekkert eftir. Svo fór ég til Sigrúnar og Viggós en þar voru Eva, Heiða og Sigga Steina. Svo fórum við í bæinn, ég, Heiða, Sigga og Hrönn en entumst nú ekki þar nema í tæpa tvo tíma. Alltaf finnst mér djammið jafnfyndið. Við stóðum í röð heillengi til að komast inn á Hressó þar sem var pakkað af fólki og eins að vera í gufubaði. Það var röð á klósettið, endaði svo á klósetti þar sem læsingin var biluð og vantaði klósettpappír (en það reddaðist með góðri hjálp frá Heiðu og Siggu). Það er annars ógeðslega fyndið hvernig svona raðir á skemmtistaði virka. Það er endalaust verið að taka fólk fram fyrir mann af því að einhver þekkir dyravörðinn eða eiganda staðarins eða eitthvað. Eins og maður væri tekin framfyrir í röðinni í Bónus. „Hey, ég þekki Jóhannes!, fariði frá!“ Undarleg menning þarna, hefur enginn stundað markvissar mannfræðirannsóknir í miðbæ Reykjavíkur um helgar?

Mamma og pabbi eru að koma á eftir. Þau fara svo til Skotlands á þriðjudaginn. Hlakka til að sjá þau. Ég er strax komin með verkefni fyrir þau. Mamma fær að hjálpa mér við að skipta á þessum tveimur blómum mínum á eftir. Svo ætla ég að fá pabba til að gefa okkur ráðleggingar varðandi grasfræ og áburð og eitur á tréð okkar. Það er nú eins gott að nýta sér það að fá þau í heimsókn 😉 Ég er svo í fríi á morgun svo ég get fundið fleiri verkefni fyrir þau…eða stjanað við þau. Sjáum til.

Annars er það helst að frétta af mér að ég er búin að skrá mig í nám í opinberri stjórnsýslu í Háskólanum. Þetta er 15 eininga diplómanám á mastersstigi. Ég tek þetta með 100% vinnu, tímarnir eru á morgnanna milli 8 og 10 svo það ætti að ganga upp. Þetta verður örugglega áhugavert, skilst að það sé mikið af fólki með mikla stjórnunarreynslu sem eru í þessu. Ég verð því væntanlega yngst og græninginn í hópnum (eins og venjulega) ;))

Annað sem er að frétta er að ég er farin að stunda sundlaugarnar, hef farið þrisvar í viku síðustu vikur og stefni að því að halda því áfram í sumar allavega. Við höfum verið að fara fyrir vinnu og það virkar bara ágætlega, nema að það er pirrandi þegar það eru sundæfingar því þá er lítið pláss til að synda. Ætlum kannski að prófa að skipta yfir í Breiðholtslaugina. Markmiðið er að synda a.m.k. kílómeter á viku.

Hafið það gott 🙂

Þjóðdansar og þorrablót

Við Óli fórum í danskennslu á fimmtudagskvöldið. Lærðum íslenska þjóðdansa hjá Helgu hjá Þjóðdansafélaginu. Það var ótrúlega skemmtilegt þó við lærðum nú kannski ekki mikið. Þetta var semsagt á vegum Þjóðbrókar (þjóðfræðinemafélaginu) og var opið fyrir þjóðfræðinema en það endaði með því að við vorum bara þrjú, við Óli og Sigrún, sem mættum. Sem betur fer komu líka einhverjir frá Þjóðdansafélaginu svo við gátum myndað hring.
Meiningin er svo að dansa á þorrablótinu á föstudaginn. Við Óli sjáum um að kenna þeim sem komu ekki í kennsluna 😉

Jóga

Best að halda ykkur uppfærðum varðandi jógamálin (talandi um að setningaskipan í íslensku sé að breytast). Nú er ég búin að vera í jóganu í 3 vikur. Ég er sem betur fer hætt að fá harðsperrur eftir tímana. Það er greinilega aðeins farið að togna á vöðvunum. Núna get ég líka farið í plóginn skammlaust. Ég á samt oft erfitt með að skella ekki upp úr í jógatímum, þarna erum við hópur af fólki á öllum aldri blásandi eins og hvalir (djúp og meðvituð öndun) í alls kyns afkáralegum stellingum. Kannski er þetta til merkis um að ég er ekki nógu innhverf í tímunum.