Á gær lagðist ég í njósnir á netinu um mann sem ég hef aldrei hitt, en vonast til að hitta innan tíðar. Leit þessi leiddi mig inn á einhverja alskemmtilegustu fasteignaauglýsingu sem ég hef lesið. Þar er lýst kostum bújarðar norður í landi, en í stað þess að fjalla bara um ástand lagna, glugga og hvort þakið sé nýuppgert – er félagslíf sveitarinnar tíundað. Þar segir:
Afleggjarinn að jörðinni er 2,4 km. Frá Hvalfjarðargöngunum að jörðinni eru 250 km, Akureyrar 105 km, áfengisverslunina á Sauðárkrók eru 31,7 km. Á ríkasta kaupfélag og ódýrustu matvælaverslun á Íslandi til jafnaðar eru 30,7 km. Svo í einungis 14 km fjarlægð eru haldnir AA fundir á Löngumýri. Til sóknarkirkju að Víðimýri eru um 7 km (kirkjulegar athafnir moldarlykt og prestlegar hugganir, ásamt fyrirgefningu synda ef vel er beðið). Til Agnars og Döllu á Miklabæ eru 20 km (mjög skemmtilegt og gott fólk) 9 km er svo í K.S. Varmahlíð er opið næstum allan sólarhringinn og þar fæst allt frá bensíni að bjór ásamt góðu viðmóti allra starfsmanna.
Svona eiga fasteignaauglýsingar að vera!