Á gær leit ég í þáttinn hjá Snorra Má á „Enska bolta“-stöðinni til að kynna spurningaspilið og horfa á drepleiðinlegan leik Man. Utd. og Tottenham. Nú hef ég farið í ótal sjónvarpsviðtöl og yfirleitt hefur förðunin falist í því að smellt er framan í mig smápúðri og jafnvel málað yfir bólu eða tvær – ef þeim er til að dreifa.
Að þessu sinni var förðunarmeistarinn í banastuði og í stað þess að púðra Snorra og okkur gestina, vorum við allir stífmálaðir, hárið spreyjað, augabrúnir snyrtar o.s.frv. Snyrtitæknirinn setti meira að segja maskara (eða hvað þetta nú annars heitir) í augnkrókana á mér. Mér voru meira að segja boðnir augndropar sem áttu á gera augun hvítari, en afþakkaði kurteislega.
Ég hef aldrei áður verið jafn málaður fyrir sjónvarp – og það þó hvorki fyrir Kastljósþátt né spurningakeppni, heldur fótboltaspjall í hálfleik í útsendingu frá enska boltanum. Merkilegt!
# # # # # # # # # # # # #
Steinunn kom heim frá Sankti Jó í hádeginu í gær. Fyrir vikið hef ég ekki verið eins mikið á landsfundi VG og ella hefði verið. Ólína var þó dregin með á föstudagskvöldið, í gærmorgun og svo aftur í dag, þar sem Steinunn mætti líka. Á þessum rituðum orðum er verið að telja atkvæðin í kosningu í fulltrúaráðið. Þar er ég í kjöri eins og annar hver maður.
# # # # # # # # # # # # #
Burley hættur störfum hjá Hearts. Hvur djöfullinn er í gangi? Eins og allt gekk vel, þá er ég smeykur um að þessar fregnir gætu orðið upphafið að endalokum ævintýris síðustu vikna.