Niðurstöður skoðanakannanna eru ekki alltaf rökréttar.
Könnunin sem Helgi í Góu birtir á opnuauglýsingu í Fréttablaðinu í morgun slær þó öll met.
Samkvæmt henni er mikill meirihluti þjóðarinnar hlynntur því að lífeyrissjóðirnir ráðist í byggingu á leiguhúsnæði fyrir eldri borgara. Allnokkrir eru þó andsnúnir þessu og talsverður hópur er óákveðinn.
Þvínæst er spurt hvort það hefði áhrif á afstöðu fólks ef þessar framkvæmdir yrðu til að rýra afkomu sjóðanna.
Þá gerist það furðulega – að stuðningurinn eykst!
Það verður varla skilið öðru vísi en að það sé stór hópur fólks sem vilji hreinlega verri afkomu lífeyrissjóðanna og fagni hreinlega hverri þeirri ráðstöfun sem grafið geti undan þeim. Það hlýtur að vera einstakt dæmi um sjálfseyðingarhvöt…
Önnur skýring er sú að visst hlutfall fólks svari svona spurningum bara út í bláinn og sé ófært um að muna hvernig það svaraði spurningunni tíu sekúndum fyrr…