Frátekið borð

Gulli hárgreiðslumaður, sem starfaði í Kirkjustrætinu, er látinn. Fór nokkrum sinnum til hans þegar ég var í Menntó, enda stofan steinsnar frá MR.

Um tíma vorum við Gulli líka fastagestir á sama kaffihúsinu. Þegar ég var á öðru ári í MR sótti ég nefnilega talsvert Kaffi Ingólfsbrunn – hálfgerða búllu í kjallara Miðbæjarmarkaðarins. Þar var aldrei neinn og kaffið vont og staðið – en þeir hikuðu ekki við að selja 17 ára unglingum bjór og það kunni maður að meta.

Stundum sátum við félagarnir þarna laust fyrir hádegið og þá vildi það henda að vertinn snaraði sér framfyrir barborðið og setti spjald á eitt borðið með áletruninni „frátekið“. Þetta fannst manni alltaf jafn kyndugt á mannlausum veitingastaðnum. En skömmu síðar kom Gulli og fékk sér hádegismat. Hann klikkaði aldrei á því að láta taka frá borð.

Join the Conversation

1 Comment

  1. Leiðinlegt að heyra með Gulla, þó að hann hafi jú lifað vel og lengi.

    Á Kaffi Ingólfsbrunn fór ég stundum á svipuðum aldri og þú, nokkrum árum seinna. Svo einn daginn var staðnum lokað upp úr þurru. Ef maður kom seint um nótt á Kaffi Ingólfsbrunn þá gaf barþjónninn manni oft frían bjór… eða var of fullur til að muna það að rukka fyrir. Yfirleitt var enginn þarna inni nema vertinn eldri en sautján, og sumir talsvert mikið yngri.

Leave a comment

Netfang þitt verður ekki birt. Nauðsynlegir reitir eru merktir *