Lokum Borgarvefsjánni!

Í dag var gamli MorfÍs-uppeldissonur minn Lárus Páll Birgisson (Lalli sjúkraliði) fyrst borinn yfir Laufásveginn af lögreglunni og síðan handtekinn fyrir að trítla aftur yfir götuna og setjast á ný fyrir framan bandaríska sendiráðið með spjald með slagorðum gegn stríðsrekstri. Á dögunum var Lalli dæmdur í héraðsdómi fyrir að hafa á sama hátt neitað að fara eftir fyrirmælum lögreglu og fara af sömu gangstétt síðasta vetur. Þeim dómi verður að áfrýja.

Ég sló fyrr í dag á þráðinn til sjúkraliðans sem risaveldið óttast svo mjög og spurði út í handtökuna. Þar kom fram að líkt og í málinu sem hann var dæmdur fyrir, var atvikið fest á filmu. Starfsmenn sendiráðsins urðu hinir æstustu yfir myndatökunni og kröfðust þess að filman yrði gerð upptæk. Lögreglan ætlaði að verða við þeirri bón, en hætti við þegar fjölmiðlamenn mættu á svæðið.

Og með hvaða rökum skyldu mennirnir vilja láta banna fólki að taka myndir af götumyndinni við Laufásveg og umhverfi sendiráðsins? Jú, það er gert til að tryggja öryggi borgaranna. Ef hryðjuverkamenn kæmust yfir myndir af gangstéttinni fyrir framan sendiráðið, þá gætu þeir notað þær til að koma fyrir sprengjum sem aftur kynnu að skaða fólkið í götunni…

Jahá!

Það er gott að þessar upplýsingar hafi komið fram um bráða lífshættu íbúanna við Laufásveg. Væntanlega kallar þetta á sólarhirngslögregluvörð (einkum nú yfir háferðamannatímann) til að koma í veg fyrir að Laufásvegurinn verði festur á filmu. Og ekki er síður brýnt að loka Borgarvefsjánni – eða í það minnsta passa að blörra út Laufásveginn og nágrenni. Ég sé ótal verkefni fyrir starfsmenn greiningardeildar Ríkislögreglustjóra í þessu. Spurning um að splæsa í aukastöðugildi?

Join the Conversation

3 Comments

  1. Jónas Kristjánsson vill segja upp fjölda lögreglumanna, því þeir hafi ekkert að gera !

    Þetta skrifaði Jónas eftir að fréttir bárust af handtöku Lárusar. Jónas telur vera mjög lítið að gera hjá lögreglunni , fyrst þetta er þeirra eina verk .

    Annars væri ráð að fá hjá sendiráðinu bandaríska þann hluta af ævisögu sinni sem þeir hafa skráð . Einu sinni var ungur maður í starfi hjá þessu sendiráði að skrá hluta af ævisögu undirritaðs, þessi ungi maður komst til metorða í flokknum sínum . Síðar varð þessi maður ráðherra . Björn Bjarnason hlýtur að vera hreikin af því að hafa svikið þjóð sína með svona framferði !
    Undirritaður þurfti að mæta á þriggja mánaða fresti í fimm ár í sendiráð þetta, til að hlusta á upplestur á nýjustu útgáfu af ævisögu sinni !
    Ef undirritaður hefði ekki gert þetta þá hefði hann ekki getað sinnt sinni vinnu !

  2. Ég hugsa að væri nóg að setja nálgunarbann á þennan stórhættulega mann og aðra sem halda fram þeirri firru að stríð sé glæpur. Þorri fólks áttar sig auðvitað á því að maður vegur ekki að virðingu sendiráðsins með því að gefa í skyn að það sé eitthvað glæpsamlegt við að drepa mann og annan.

Leave a comment

Skildu eftir svar við JR Hætta við svar

Netfang þitt verður ekki birt. Nauðsynlegir reitir eru merktir *