Gamalt baráttumál nær fram að ganga

Færsla þessi birtist einnig á Friðarvefnum.

Þær ánægjulegu fregnir bárust í dag að borgarstjórn Reykjavíkur hefði samþykkt að gerast aðili að samtökunum Mayors for Peace, sem berjast fyrir útrýmingu kjarnorkuvopna í veröldinni.

Við í Samtökum hernaðarandstæðinga fögnum þessum fregnum sérstaklega, enda langt síðan við hvöttum Reykjavíkurborg til þess að stíga þetta skref.

Það var á árinu 2000 sem Sverrir Jakobsson og Einar Ólafsson, þá formaður og ritari SHA, gengu á fund Ingibjargar Sólrúnar Gísladóttur borgarstjóra. Með í för höfðu þeir kynningarefni um samtökin sem snarað hafði verið á íslensku ásamt leiðbeiningum um hvað í aðildinni fælist. Borgarstjóri tók ágætlega í hugmyndina, en málið sofnaði í borgarkerfinu og náði því ekki fram að ganga.

Betur gekk þó með hitt aðalerindi fundarins, þar sem SHA hvöttu til þess að Reykjavíkurborg yrði friðlýst fyrir geymslu og umferð kjarnorkuvopna. Náði það fljótlega fram að ganga og var samþykkt í borgarstjórn með öllum greiddum atkvæðum nema einu.

En nú, tíu árum síðar hefur þetta gamla baráttumál SHA náð fram að ganga. Því ber að fagna.

Join the Conversation

  1. Avatar
  2. Avatar

2 Comments

  1. Má ég spyrja hvaða sjónarmið valda því að borgarstjóri í friðarríki gangi ekki í slík samtök? Ber mikla virðingu fyrir mannréttinda-og friðarmálatilburðum Jóns Gnarr (verðandi tilfinningamálaráðherra borgarinnar) á sl vikum – en á tímum grjótharðs niðurskurðar og erfiðra peningamála, þá er nánast auðveldast í heimi að plögga mannréttinda-og friðarmál. Leyfi mér þó ekki að tala um ódýra vinsældartilburði, því mannréttinda-og friðarmál eru – að sjálfsögðu – stóru málin til langs tíma.

Leave a comment

Netfang þitt verður ekki birt. Nauðsynlegir reitir eru merktir *