Day: 24. ágúst, 2003

Að vakna illa

Ég vaknaði illa áðan, draumarnir höfðu verið undarlegir og þegar Eygló vakti mig þá var það hrikalega óþægilegt. Ég var líka ekki með minn eigin kodda. Það er fátt verra heldur en að vakna illa, það eyðileggur hvíldina. Reyndar skiptir þetta ekki öllu máli enda þarf ég ekki í vinnuna fyrr en seint og síðarmeir á morgun. Þarf að vísu að fara með grísinn til dýralæknis í fyrramálið.

Núna er ég að hlusta á Rottweiler en stefni á að horfa á eitthvað. Spurningin er hvort maður á að horfa á That 70s Show, Marxbræðramynd eða kannski Hidden Fortress (ósiður að nota ensk nöfn á erlendar myndir aðrar en þær sem eru á ensku en ég man ekki þetta nafn á japönsku) eftir Kurosawa.

Eygló bloggfræga

Eygló er orðin fræg sem bloggari, viðtal við hana og fleiri austfirska bloggara birtist í Austurglugganum núna í síðustu viku. Eygló hefur reyndar ekki ennþá látið frægðina hafa áhrif á sig og er róleg upp í rúmi að lesa.

Dagurinn í dag hefur annars farið í að pakka og að horfa á That 70s Show á meðan. Alltaf gaman. Við eigum ótrúlega mikið af drasli. Hlakka svo til að flytja.

Kláraði Harry Potter

Kláraði Harry Potter í nótt. Ég stend við það sem ég sagði um að konan þarf almennilegan ritstjóra, óþarfa lýsingar á því hvernig hinir þessir nemendur eru að undirbúa sig undir próf og fleira í þá áttina. Bókin var samt ágæt, nú er bara að bíða í svona 6 ár eftir næstu bók sem verður svona 1200-1300 blaðsíður.

Áhugaverðasti hluti bókarinnar var líklega hvernig það var kafað dýpra í persónuna Snape en einsog margt annað þá vantar herslumuninn til að þetta nái almennilega í gegn.

Grísla veik

Grísla (eða Zero einsog hún heitir formlega), naggrísinn okkar, er veik. Ég var að fara að klippa á henni klærnar, einsog maður þarf að gera reglulega, og sá þá að framfótur hennar var hálfuppblásinn. Mér brá hrikalega og eftir að hafa eytt smá tíma á netinu fann ég upplýsingar um hvers konar sýkingu er um að ræða. Þarf að fara með hana til dýralæknis, líklega þarf sýklalyfjameðferð. Held að í versta falli gæti hún misst tær, að vísu virðist þetta ekki vera orðið alvarlegt því þá ætti hún að vera hálfþunglynd og lystarlaus. Erfitt að geta ekki komið henni til dýralæknis fyrren á mánudag. Hvert skyldi fara með svona smádýr? Veit einhver?

Grísla fæddist í júní 1999 og við höfum átt hana nærri frá því hún fæddist, örlítill hnoðri, við höfum reyndar átt hana saman lengur en við höfum búið saman. Maður getur endalaust dáðst að því hve sæt hún er, indæl, forvitin, varkár og hrædd. Ég hef ægilegar áhyggjur af henni núna meðan ég heyri í henni narta í kínakálið.