16 júní 2006 Archives

Blogg um blogg og sund

Í morgun lá Kaninkan niðri og mig langaði að blogga. Ég ætlaði að segja að þegar ég fór í sund í morgun þá mundi ég hvers vegna ég hef aldrei nennt að halda út sundferðum. Það var semsagt hópur af unglingum í einhvers konar sundæfingum þarna og það tók tvær brautir. Það voru líka nokkrar gamlar konur þarna sem tóku heila braut aðallega undir spjall. Mér finnst að það hefði átt að reka konurnar út í pott. Mér finnst líka að það ætti að vara mann við að það sé ekkert pláss fyrir mann að synda þegar einhvern kennsla er í gangi. Ég náði rétt að synda hundrað metra og þá bara þegar ég var að fara.

En mig langaði reyndar líka að blogga um annað og það er hve pirrandi það er að geta ekki bloggað. Reyndar langar mig oft að blogga um að ég geti ekki bloggað þegar ég get ekki bloggað. Mér fannst þetta fyndin setning hjá mér.

Fínn maður á sýningaropnun

Jæja, ég fór á Diskó og Pönk sýninguna. Mjög skondið að vera boðinn á sýningu sem er haldin í húsi sem ég ætlaði að senda til Vopnafjarðar í síðasta mánuði. Gekk inn og hitti Halla þar sem var víst í kúrsi sem kom að gerð sýningarinnar. Síðan heilsaði ég Guðbrandi sýningarstjóra með því að tilkynna honum að ég væri kominn til að ná í húsin. Seinna spurði hann mig hvort að það væri ekki vel farið með húsin mín og ég svaraði að ég ætti nú lítið í þeim enda ekki Vopnfirðingur.

Fræbbblarnir voru á svæðinu og tóku lagið fyrir fólk sem var mishrifið af rigningunni. Áður en þeir spiluðu þá sá ég Helga Briem og ætlaði að kynna mig fyrir honum en hann varð á undan mér. Gaman að því. Hitti marga fleiri góða kunningja. Dóra úr þjóðfræðinni var þarna en virtist ekki fíla Fræbbblana alveg. Rósa af Árnastofnun kom og síðan var þarna Marvin. Bara skemmtilegt. Spjallaði aðeins við Unni og myndbloggaði hana.

Sýningin var flott en sjálfur tók ég afstöðu og fékk mér bara pönk barmmerki en ekki diskó, Marvin var meiri jafnréttissinni og tók líka diskó.

Hvorki pönk né diskó?

Á eftir fer ég á pönk og diskó. Náði reyndar ekki að raða í pönk né diskógalla með svona stuttum fyrirvara. En þetta verður áhugavert. Annars er spurning hvort að mér verði nokkuð hleypt inn á Árbæjarsafnið eftir að ég reyndi að fara með Húsin heim.