Ef ég skil málið rétt fengu starfsmenn sem fengu fólk í peningamarkaðssjóði bónusa fyrir það. Það var líklega ákveðin hvatning fyrir þá að gefa ekki upp alla vankanta vörunnar sem þeir voru að selja. Ég myndi leggja eitt til sem neytendavörn. Þau fyrirtæki sem veita starfsfólki sínu bónusa eða sölulaun verða að gefa upp opinberlega hvernig það kerfi virkar. Það mætti til dæmis vera skilti, það mætti vera í bæklingum og það mætti vera á heimasíðum. Ef neytendur átta sig á því hve mikið sölumaður græðir á því að að selja vöru mun hann líka átta sig á því hve mikið eða lítið er að marka hann. Þetta ætti að gilda um allt sviðið hvort sem þú ert að kaupa áskrift að tímariti eða jeppa. Og þetta á að gilda hvort sem starfsmenn geta átt á feitum bónus fyrir að selja ákveðna vöru eða bara veglegri árshátíð fyrir almennt gott gengi fyrirtækisins. Þetta ætti líka að gilda um toppana á fyrirtækjunum. Gegnsæi eykur heiðarleika.
Day: 7. nóvember, 2008
Andlegt sjálfstæði í búðir
Ég er loksins búinn að koma bókinni í búðir Pennans/Eymundsson/MM í Kringlu, Smáralind, Laugarvegi, Austurstræti og Akureyri. Fyrir er hún í Bóksölu stúdenta. Á næstu dögum verður hún væntanlega líka seld hjá Vantrú. Þið sem viljið getið líka haft samband við mig og keypt eintak hjá mér. Hér eru upplýsingarnar af baksíðunni:
Robert G. Ingersoll (1833-1899) var á sínum tíma einhver þekktasti mælskumaður Bandaríkjanna. Það hefði án efa getað fleygt honum langt í stjórnmálum ef hann hefði ekki notað hæfileika sína til að fjalla um viðhorf sitt til trúarbragða og þá sérstaklega kristni eins og hún birtist í samtíma hans. Orðspor Ingersoll náði fljótt til Íslands og þegar hann lést var hann titlaður „vantrúarpostuli“ á forsíðu tímaritsins Þjóðólfs.
Pjetur G. Guðmundsson (1879-1947) er kunnur fyrir að hafa markað djúp spor í íslenska verkalýðsbaráttu. Því miður hefur framlag hans til trúargagnrýni á íslenskri tungu verið minna þekkt. Árin 1927 og 1931 gaf hann út þýðingar sínar á fjórum erindum Ingersoll undir titlinumAndlegt sjálfstæði. Þær þýðingar hafa, eins og gefur að skilja, verið illfáanlegar í langan tíma. Nokkru seinna, árið 1936, flutti hann síðan útvarpserindið Trú og trúleysi sem síðar var gefið út. Þessum útgáfum Pjeturs hefur nú verið safnað saman í þessa bók ásamt tveimur styttri þýðingum af skrifum Ingersoll.
„Það gefur að skilja, að sumt í þessum ritum sé orðið úrelt. Skoðanir manna á þeim efnum hafa mikið breyst á þessum tíma. Margt af því, sem áður var tekið sem gildur og góður sannleikur almennt, og Ingersoll og Pjetur ráðast harðast á, er nú skoðað í öðru ljósi, bæði af almenningi og kennimönnum kirkjunnar mörgum. Ei að síður er margt í ritunum, sem enn á erindi til almennings og er sígildur sannleikur. Siðbótarstarfi kirkjunnar miðar hægt áfram. Og það er ástæða til að ætla, að því miðaði ekkert, ef ekki væru þar að verki siðbótarmenn, sem standa fyrir utan og ofan kirkjuna, eins og Pjetur G. Guðmundsson og Robert G. Ingersoll.“
Ritstjóri bókarinnar er Óli Gneisti Sóleyjarson þjóðfræðingur sem einnig ritar inngang.Andlegt sjálfstæði er fyrsta bókin í ritröðinni Sígild trúargagnrýni frá Raun ber vitni.