Fyrir aðalfund VGR tók ég eftir að Facebook vinur minn Hjalti Sigurðsson boðaði komu sína þangað. Ég hélt satt best að segja að þetta væri brandari þar sem Hjalti er stjórnarmaður í Frjálshyggjufélaginu. En það var fyrir fundinn. Svona var greinilega smalað. Hjalti kom væntanlega á fundinn til að styðja félaga sína úr Ísafold, félagi ungra ESB andstæðinga, í kosningunum.
Svo heldur fólk því fram að það hafi verið einhver “grasrót” sem mætti þarna á fundinn. Skítabrögð og ekkert annað. Á í alvörunni að fara að stunda SUS aðferðir í VG (og fá SUSara í flokkinn til að kenna þær almennilega)? Ég get bara ekki trúað því að meðlimir VG samþykki að þessar aðfarir.
Ég var reyndar á þessum fundi og sá engan þarna sem átti ekki heima þarna. Fundurinn var mjög fjölsóttur. Eina manneskjan sem ég hafði aldrei séð áður á fundum eða á annan hátt í tengslum við VG var móðir Brynju.
Þetta sýnir náttúrlega grunnveikleika flokkakerfisins. Fólk sem er einróma sammála á einu sviði getur verið svörnustu andstæðingar á öðru sviði. Að lokum verður fólk að ákveða sig, hvort það sé meira sem heldur þeim saman eða stíar þeim í sundur.
Það vill þannig til að Hjalti er frændi minn og ég veit því að hann er ekkert nýr í VG né er hann að taka þátt í starfi VG í fyrsta skipti. Hann setur ESB málið á oddinn og styður þær hreyfingar sem eru gegn aðild að sambandinu.
Það eru margir félagar VG sem eru i fleiri flokkum þrátt fyrir bann í flokkssamþykktum og meira að segja fleiri frambjóðendur flokksins hafa verið meðlimir í fleiri flokkum þar sem ekki er gert neitt í því að fylgja þeim eftir. Þannig veit ég að margir eru eins og ég í bæði VG og Samfylkingunni, þar sem að maður fær ekki að raða á lista nema að vera meðlimur og velur milli þessara flokka þegar kemur að því að kjósa. Þetta er því ekki nýtt né óalgengt.
Þegar við ætlum að skoða hverjir það eru sem tóku yfir VGR að þá finnst mér nærtækara að skoða hverjir voru kosnir. Þetta eru nú ekki beinlínis neinir frjálhyggjupostular.
Héðinn, svona smölun eins og fór fram í gær er fullkomlega óeðlileg og siðlaus og ég get ekki séð neina ástæðu til annars en að fordæma hana. Mér finnst óeðlilegt að stunda svona flokkahopp og mér hefur aldrei dottið í hug að taka þátt í slíku.
Mig langar ekki að vera í stjórnmálaflokki þar sem svona aðferðir eru taldar eðlilegar. Ég vona að fólkið sem tók þátt í þessu í gær átti sig á því, skammist sín og láti svona aðferðir vera í framtíðinni.
Kannski ekki skrítið að það komi fáir ef það er ráðist á þá sem mæta. Ég var ekki beðin um að mæta nema með sama tölvupósti og aðrir félagsmenn fengu. Ég tek þátt í 2 stjórnmálaflokkum og 2 þverpólitískum samtökum og er Sigurðarson. Síðast þegar ég vissi þá eru 2 flokkar í ríkisstjórn ef ekki fleiri og ég hef fullann rétt til að hafa áhrif á 2 flokka, því þegar kemur að kjördegi er aðeins boðið uppá krosspróf 4 flokka og aldrei kaus ég Framsókn og heldur ekki Samfó. Ég er sammála stefnu VG varðandi aukið lýðræði, valdið frá valdastéttinni til fólksins, náttúruvernd, réttlæti handa þeim sem minna mega sín og forgangsröðun velferðar og jafnrétti kynjanna. Ég get ekki séð afhverju ég má ekki taka þátt í VG eins og allir aðrir, ég á ekki að þurfa að gera grein fyrir máli mínu en kýs engu að síðu að gera það þegar að mér er vegið með gagnrýni.
Hjalti, þú hefur engan samhljóm með þeim grundvallargildum sem VG byggir á og því er fullkomlega óeðlilegt að þú sért að taka þátt í starfi flokksins.
Óli: Hvaða grundvallargildi eru það?
Femínismi til dæmis. Forsendur Hjalta fyrir að vera á móti ESB eru líka allt aðrar en þeirra VG meðlima sem eru á móti aðild.
Tja, nú eru VG-istar á móti ESB á ýmsum forsendum, sumir teljast nú bara þjóðernissinnar. Svo get ég ekki séð að öllum innan VG finnist femínismi mikilvægt sjónarmið – því miður.
Ég held að VG hafi afar fá traust „grundvallargildi“.
kv.
lommi
En telurðu að stjórnarmaður í Frjálshyggjufélaginu sé nálægt því að aðhyllast gildi sem eru almenn í VG?
Jájá, „Alheimskapítalisminn er slæmur, en við erum við“ – eða hvernig sem þetta kvót var nú. Er ekki VG einmitt flokkur fyrir svona góða og ljúfa kapítalista eins og ég efa ekki að Hjalti sé?
kv.
lommi
Ég verð að játa að ég veit ekkert hvað þú ert að tala um þarna. Ég veit bara að ég hef engan áhuga á því að notaðar séu svona SUS aðferðir í VG og ég ætla að vona að þeir meðlimir VG sem notuðu þessar aðferðir muni átta sig á því að svona gerir maður ekki.
Þannig að þú ert ósáttur við að fólk sem er ekki tengt þér félagslega (hefur ekki farið hefðbundnaleið innan VG) sé þarna frekar en þú sért hugmyndafræðilega ósammála?
Ekki láta svo eins og þetta hafi verið í fyrsta sinn sem einhver smalaði í VG.
Uhh, nei. Hvaða rugl er þetta? Ég vissi ekki einu sinni fyrirfram hverjir voru þarna í framboði og þekki til dæmis Andrés Inga nær ekkert (bætti honum samt við sem vini á Facebook áðan). Það sem ég er ósáttur við er að hér eru utanaðkomandi félög (Heimsýn og Ísafold) að taka yfir aðildarfélag VG.
Ég hef aldrei verið beðinn um að mæta á fund í VG til að kjósa einn eða neinn. Einu sinni hefur verið hringt í mig fyrir forval og ég beðinn um að kjósa einhvern og þá var það manneskja sem ég hafði þegar lýst yfir stuðningi við.
Ég tel það ekki vera rétt hjá þér. Hefur þú lesið þetta, og þetta er grunnstefna VG, ekkert til sem heitir grundvallargildi.
http://www.vg.is/stefna/
“fyrst af öllu með því að leiðrétta þá fjárhagslegu mismunun sem landsbyggðarfólk býr við í námskostnaði, húshitun og vöruverði.”
Tel að fasteignverð rétti þessa stöðu og tel þetta því ekki brýnt vandamál að öllu jöfnu.
“Slíku verður ekki náð fram með einkavæðingu og einkarekstri í undirstöðuþáttum velferðarkerfisins, sem bitnar harðast á dreifðum byggðum.”
Sé bara ekki alveg hvernig það bitnar harðar á dreifðum byggðum en öðrum. Það má vel einkavæða án þess að nám eða spítalar tak hærra gjald af viðskiptavinum en nú er.
“Til þess að ná fram þessum markmiðum þarf að setja valdi fjármagns og markaðsafla skorður”
Mjög loðið orðalag og þarfnast útskýringa.
Er kannski ekki sammála þessu þrennu, en get auðveldlega verið það fái ég möguleika á að starfa í VG að lausnum fyrir samfélagið. Það er eflaust fullt af samyrkjumönnum í VG sem kæra sig ekkert um öfgafemínisma og náttúruvernd. Og fullt af öfganáttúruverndarfólki sem kærir sig lítið um samyrkju líka. Held að skortur þinn á umburðarlyndi sé ekki í stefnu VG.
Ef þú vilt ganga í ESB ert það þá ekki þú sem ert að vinna gegn stefnu VG?
Ertu að reyna að halda því fram að þú sért í VG af einhverri annarri ástæðu en að berjast gegn ESB aðild?
Á síðasta landsfundi VG var samþykkt ályktun þar sem gefið var grænt ljós á þá leið sem þessi ríkisstjórn fór í ESB málum. Við munum bara kjósa um þetta.
Óli hvaða kröfur þurfa menn að uppfylla að þínu mati til að teljast fullgildir meðlimir í VG? Er ekki nóg að aðhyllast stefnu flokksins og vilja vinna að henni. Svo er það nú fátæklegt að fara að óskapast út af smölun á meðal félagsmanna VG, var það ekki einmitt stundað fyrir prófkjörið til borgarstjórnar nú í vor á meðal VG fólks í borginni ekki man ég betur, þar voru kannski öfl á ferðinni sem þér hugnaðist og telur því ekki ástæðu til að nefna það. Stefna VG í þessari ríkisstjórn hefur sætt gagnrýni af grasrótinni allt frá því hún var stofnuð og er eftirgiftin í ESB málinu stór þáttur í þeirri gagnrýni og hefur svo verið alla tíð síðan stjórnin var sett á laggirnar, það þurfti því ekki að koma neinum á óvart að grasrótin léti til sín taka þegar forustan hefur trekk í trekk hunsað áköll hennar í því máli sem og öðrum og nánast gefið henni puttann og það ítrekað.
Aðhyllist þessi Hjalti stefnu VG?
@Rafn: Ríkisstjórnin fer leið sem var samþykkt af landsfundi VG og landsfundur VG er æðsta vald flokksins.
Sérðu engan mun á því að utanaðkomandi félög séu að taka yfir aðildarfélag VG og að frambjóðendur í prófkjörsbaráttu reyni að fá fólk til að kjósa sig?
Þannig að þetta snýst ekkert um hugmyndafræði eða málefni?
Af minni hálfu snýst þetta fyrst og fremst um að koma í veg fyrir að svona aðferðir verði reglan. Ég einfaldlega myndi ekki nenna að þátt í starfi flokks þar sem svona aðferðir eru notaðar. Ekki ætla ég í aðdraganda næsta aðalfunds VGR að smala fólki sem kemur flokknum ekkert við inn til þess að koma einhverju öðrum hópi frá. Það er bara skelfileg tilhugsun.
Það er rétt að taka fram að ég geri mjög einfalda kröfu um að fólk gefi upp rétt nafn og gilt tölvupóstfang. Það er ekki flókið (og já, ég veit að Lommi er kannski ekki “rétt” nafn en ég veit alveg hver hann er).
Ég er er í VG og vill hafa áhrif á alla stefnu flokksins, ekki bara í ESB málum. Þetta var aðalfundur og auðvitað eru það mistök að óska ekki eftir framboðum og kjósa ekki um þau. Ég held að ástæðan fyrir því að uppstillingin var feld sé að fólk vill ekki uppstillingar lengur og eða ekki formannsefnið og að fara að halda því fram að þetta snúist bara um ESB er langsótt. Ég hef kannski ekki sömu skoðanir og þú en ég á jafn mikinn rétt á að láta í ljós skoðun mína eins og þú og taka þátt í aðalfundum og forvali. Það eru einu leiðirnar sem kjósandi hefur til að koma skoðunum sínum að og fólki sem hann vill á þing. Á kjördag eru svo sárafáir valmöguleika eftir. Ef VG á ekki að vera 10% heldur 25-35% flokkur, verða menn að fara að hugsa öðruvísi, leyfa allar skoðanir og þora að taka þá slagi sem koma upp í stjórnmálum.
Ég held að þú farir langt með að sannfæra þá sem tóku þátt í þessum verknaði að þeir séu á rangri leið. Stjórnarmaður í Frjálshyggjufélaginu hefur augljóslega ekkert að gera í VG. Ef VG þarf að fórna því sem gerir hann að flokknum sem er og hefur verið til þess að verða 25%-35% flokkur þá tel ég betra að hafa hann bara 10% flokk.
Annars er spamvörnin mín í einhverri yfirvinnu núna. Hún gerir það stundum þegar athugasemdaþræðir verða langir.
Fyrst náðu þeir SUS, svo Heimdalli, svo VGR.
Lýðræðið lætur ekki að sér hæða í höndum frjálshyggjumanna.
Mér finnst þetta mjög svo hæpin málsvörn hjá þér Óli Gneisti.
Hjalti hefur bent á nokkrar, að því er ég myndi segja, vel gildar ástæður fyrir því að hann ætti að fá að taka þátt í starfi VG. Ég, frekar en margur annar, er sammála öllu því sem kemur fram í stefnu flokksins tel mig þó eiga rétt á að taka þátt í innra starfi flokksins ef ég kýs að gera það.
Þar fyrir utan ertu búinn að nefna einn mann sem kemur utanaðkomandi, að þínu mati. Elías og reyndar aðrir sem ég hef talað við könnuðust við flest ef ekki öll andlitin á þessum fundi.
Síðan var það hún Brynja sem komst inn, hún er nú kannski ein sú harðasta á móti ESB en voru það einhverjir fleiri þarna sem munu leynt og ljóst ætla þröngva því að þingflokknum að draga til baka umsóknina. Það vita nú vel flestir að sú aðferð er aljgörlega út í hött.
Komdu sæll Óli
Ekki ætla ég að blanda mér inn í umræðu um það hvort títtnefndur Hjalti sé þess “verðugur” að fá að kjósa á fundum VG. Ég þekki hann ekki og veit ekkert um hans skoðanir annað en það sem hann segir hér í athugasemdum.
Ég er hinsvegar sammála þér í því að almennt má gera ráð fyrir því að fólk sem situr í frjálshyggjufélaginu sé ekki líklegt til að vera í megindráttum sammála stefnu VG.
En jafnvel þótt við gefum okkur að Hjalta hafi verið smalað eins og þú segir þá dregur þú af því ansi hæpnar ályktanir. Það að þú vitir af einum einstaklingi sem var á þessum fundi sem þér finnst ekki hæfur til að taka í starfi VG þýðir það ekki að flokkurinn hafi verið tekinn yfir af utanaðkomandi aðilum.
Ég var á þessum fundi ásamt tæplega tvö hundruð öðrum. Ég segi eins og Elías að ég kannaðist við nánast alla þarna inni. Ég hef séð þessi sömu andlit á allskonar VG fundum í gegnum árin.
Ég get þessvegna alls ekki kvittað undir það að utanaðkomandi aðilar hafi tekið VGR yfir. Því jafnvel þótt að við gefum okkur að Hjalta hafi verið smalað eftir aðferðum sem þér hugnast ekki. Þá sigraði Sólveig með miklum yfirburðum.
Ég efast um að það hafi verið 56 frjálshyggjuplebbar þarna. Ég hugsa að ég hefði tekið eftir því.
Kveðja
Halli
Það mættu alltof margir inn á þennan fund til þess að ég trúi því að þetta hafi farið heiðarlega fram. Það væri vissulega áhugavert að sjá hverjir nákvæmlega mættu en ef fólk er ekki að tilkynna það opinberlega eins og Hjalti þá er vafasamt að birta slíkan lista.
En það sem ég óttast er fyrst og fremst hvort að þetta haldi áfram. Verða aðrir að standa í því að safna jafn mörgum á næsta aðalfund og nú var smalað? Munum við enda eins og helvítis SUSararnir?
Sæll Óli
Ég skil ekki alveg hvað þú meinar með að það hafi allt of margir mætt. Það mættu um 1100 manns í forval síðastliðinn febrúar. Það eru að ég held um 3000 manns skráðir í félagið. Það kusu 170 á þessum fundi.
Þ.e. um 5% af skráðum félögum kusu og um 15% af þeim sem kusu í forvalinu. Ég man það ekki nákvæmlega en ég held að það hafi eitthvað um 10000 manns kosið flokkinn í síðustu alþingiskosningum ef það er rétt munað þýðir það að 1.7% þeirra hafi kosið á mánudaginn.
Ekkert af þessum hlutföllum segir mér að það hafi allt of margir mætt á þennan fund. Reyndar finnast mér þau vera skammarlega lág.
Það sem þú ert væntanlega að vísa til er að hingað til hefur það almennt verið gífurlega fámennur hópur sem hefur ráðið félaginu.
Ég hefði haldið að það væri markmið í svona félagi að hafa öflugt félagsstarf og fjölmenna fundi. Þar sem jafnvel væri tekist á um menn og málefni.
—
Ef ég ætti að gagnrýna þennan fund þá er það fyrst og fremst fyrir það hvernig átti að standa að kjörinu. Það var valin uppstillingarnefnd af sitjandi stjórn. Sú nefnd bjó til stjórn sem var í megindráttum áframhald á sitjandi stjórn. Þ.e. annaðhvort sama fólk eða nánir vinir og félagar sitjandi stjórnar. Þar að auki þá var ekki einu sinni tilkynnt fyrir fundinn hverja uppstillingarnefndin hafði valið til að leiða félagið.
Þetta finnst mér eiginlega frekar augljóslega meingallað fyrirkomulag. Það tryggir að fámennur hópur stjórnar félaginu enda hefur að ég held nánast aldrei verið hvikað frá tillögum uppstillingarnefnda í fortíðinni.
—
Ég sá fjölmargar myndavélar á lofti þarna sem má vafalítið ná í. Þú getur eflaust farið í að skoða þessar myndir og valið úr þá sem þú telur ekki hafa átt þarna erindi ef þú vilt.
En ég ítreka bara það sem hefur verið sagt af fleirum en mér hér í þessum athugasemdum. Það voru lang flest andlitin þarna mjög kunnugleg.
Ég vona að það muni verða regla frekar en undantekning í framtíðinni að það verði góð mæting á fundi sem þessa. Og að aðrir en fáir útvaldir hafi áhrif á stefnu þess og forystufólk.
Ég held nefnilega að það sé frekar hæpið að hafa miklar áhyggjur af því að það verði mikið smalað á 3-4 klukkutíma fundi. Mig grunar að ef þú myndir prófa að sannfæra fólk sem hefði engan áhuga á flokkstarfi VG um að sitja á fundum í fleiri tíma bara til að kjósa þá myndi það reynast þrautinni þyngra.
Þannig að líklegast er að þeir sem tekst að sannfæra um að sitja slíka fundi sé fólk sem hefur raunverulegan áhuga á flokkstarfinu. Og það er einmitt fólk sem á að mæta á þessa fundi.
Kv
Halli
En hvað smalaðir þú mörgum á fundinn?
Ég hefði nú viljað heyra af þessar óánægju fyrir fundinn. Af hverju sá ég engar greinar eða bloggfærslur um þessa óánægju? Var það af því að þið voruð hrædd um að þá myndi fólk átta sig á því að það ætti að fjölmenna á þennan fund?
Komdu sæll Óli
Að smala er merkingarþrungið hugtak. Það þýðir eiginlega að fólki sé hrúgað inn eins og heilalausum kindum. Ég þekki sem betur fer ekki mikið af fólki sem er hægt að draga þannig í dilka.
Ég hvatti þá sem ég þekkti – og ég vissi að væru skráðir í flokkinn – til að mæta. Ég sagði þeim sem vildu hlusta hvaða fólk ég ætlaði að kjósa. Ég skráði engan í flokkinn fyrir fundinn eða lét neinn skrá sig í flokkinn ef þú ert að meina það.
Það voru hinsvegar ýmsir sem ekki komust eins og gengur. Þú hefur t.d. greinilega ekki séð þér fært að mæta. Ég legg til að ef þú vilt hafa áhrif á flokkstarfið í framtíðinni þá mætirðu á fundi sem þessa og nýtir þér lýðræðislegan rétt þinn.
—
En þú ætlar nú varla að halda því fram að það hafi ekki opinberlega verið talað um óánægju í VG? Er það ekki almennt samþykkt að flokkurinn er klofinn í mörgum stórum málum?
Þegar kemur að VGR þá held ég að það sé nú ekki hægt að segja annað en að það félag var gagnrýnt mjög harkalega og opinberlega á síðasta starfsári. Það kemur varla neinum á óvart að það var ekki ánægja með störf félagsins – hvort sem mönnum finnist gagnrýnin verðskulduð eða ekki.
Félagið stóð fyrir mjög umdeildu prófkjöri þar sem ýmislegt fór úrskeiðis að margra mati. Félagið stóð síðan fyrir kosningaherferð þar sem flokkurinn fékk algjöra útreið. Þar sem 16.6 milljónum var eytt til að ná í 3500 atkvæði. Eða tæplega fimm þúsund kalli á hvert einasta atkvæði!
Ég held að eftir slíkt starfsár sé ekkert óeðlilegt að búast við því að félagsmenn séu sumir hverjir óánægðir. Eða hvað?
—
En má ég samt spyrja að því hvað það er við þessa stjórn sem var kosin sem þér hugnast ekki?
Sólveig er mjög öflug kona. Hún er femínisti og róttæklingur. Hún sagði reyndar sjálf á fundinum að hún sé nánast í einu og öllu sammála stefnu flokksins eins og hún er skrifuð. Það er meira en ég get sagt þótt ég hafi stutt þennan flokk frá upphafi.
Hún er formaður Attac samtakana sem eru í grunninn mjög vinstrisinnuð samtök. Hún er þar að auki ein af níumenningunum sem sitja nú í fáránlegum skrípaleik reglulega í héraðsdómi. Hún er leikskólakennari. Tveggja barna móðir. Skarpgreind og með hjartað á réttum stað. Ég veit ekki eftir hverju meiru er að slægjast fyrir félagsskap eins og VGR. Ég kaus hana mjög stoltur.
Garðar Mýrdal og Friðrik Dagur hafa starfað mjög lengi í flokknum og eru að því ég best veit almennt taldir vera miklir sómamenn. Sama má segja um Hermann Valsson, hann er fyrrverandi stjórnarmaður og varaborgarfulltrúi. Brynja Björg hefur verið virk síðan hún var 15 ára að ég held og hefur verið mjög öflug í ungliðahreyfingunni, m.a. sem formaður.
Ellen Kristjáns þekki ég lítið til annað en af söng. Hún hefur hinsvegar alltaf virkað vel á mig og ég fagna því ef hún ætlar að taka til hendinni í VG og vona að hún eigi eftir að standa sig vel. Birna Magnúsdóttir er frekar nýkomin í félagið. Hún tók þátt í forvalinu í febrúar og hefur síðan þá verið mjög virk. Hún fékk enda afbragðskosningu á mánudaginn – fékk flest atkvæði.
Er eitthvað af þessu fólki þér ekki að skapi? Stendur eitthvað af þessu fólki fyrir annað en það sem kemur fram í stefnu flokksins?
kveðja
Halli
Ég komst einfaldlega ekki af því að ég var heima hjá veikum syni mínum. Ef ég hefði búist við einhverjum átökum hefði ég mögulega reynt að redda pössun.
Ég hef einmitt ekkert á móti fólkinu sem hér um ræðir, það er örugglega ágætt en ég vil að það hugsi aðeins um aðferðir sínar og hvort það vilji í alvörunni að þetta verði reglan. Ég þekki álíka marga af þeim sem voru boðnir fram á móti lista stjórnar og á voru á lista stjórnar (held ég, ég veit reyndar varla hverjir voru í framboði).
Takk fyrir svarið Óli
Núna verð ég að biðja um að þú útskýrir betur þitt mál. Hvaða aðferðir ertu að tala um? Að félagsmenn fjölmenni á fundi? Að það sé kosið um stjórnir en ekki bara fylgt uppstillingu?
Ég segi fyrir mitt leyti að ég vona einmitt að það verði reglan.
Eða ertu ennþá að tala um þennan eina mann sem mætti og þér er ekki að skapi?
—
Nú veit ég ekki hversu virkur þú ert í félaginu en miðað við áhuga á þessu kjöri ætla ég að gefa mér að þú sért frekar virkur.
Þú segir að þú hafir ekki vitað hverjir voru í framboði. Finnst þér það ekki frekar undarlegt? Finnst þér eðlilegt að vita nánast ekkert um það hverjir eru í framboði í stjórn félags þar sem þú ert virkur félagi?
Finnst þér eðlilegt að uppstillingarnefnd sé skipuð af sitjandi stjórn. Hún skipi síðan nánast eins stjórn aftur. Og láti engan vita hvernig sú uppstilling er fyrr en kemur að kjöri? Eru það mjög góð vinnubrögð?
—
Þú segir í bloggpistli þínum að utanaðkomandi aðilar hafi tekið yfir VGR. Ég taldi í síðasta svari upp þá aðila sem voru kosnir. Er eitthvað sem bendir til þess að þetta fólk sé ekki fylgjandi stefnu VG? Er eitthvað sem bendir til þess að það sé ekki að fara að vinna eftir þeirri stefnu?
Ef svarið við báðum þessum spurningum er neitandi þá finnst mér mjög hæpið að tala um að það hafi orðið þarna einhverskonar innrás utanfrá eins og þú leiðr líkum að.
Reyndar felur þetta orðalag hjá þér í sér að það eigi einhver VGR. Að það hafi verið tekið af einhverjum. Af hverjum var það tekið?
Kveðja
Halli
Þegar ég spyr “hverjir tóku yfir VGR” þá er ég að vísa í tal um að hér hafi verið einhver sjálfsprottin grasrótarhreyfing. Svo var ekki. Þú getur alveg gert tilraun til að snúa út úr orðum mínum en ég tel ekki einn né neinn eiga félagið.
Ég er ekkert sérstaklega virkur í VG. Ég baðst undan því að fara á lista núna í vor og hef ekkert tekið þátt í starfinu frá því að ég datt út úr hverfisráði (sem var ekki staða sem ég hafði óskað eftir þó það hafa verið áhugavert verkefni).
Mér er satt best að segja í grunnatriðum alveg sama hverjir eru í stjórn VGR. Ég vissi varla hverjir voru í stjórn fyrir nema að Davíð væri formaður.
Ef vinnubrögð fyrri stjórnar voru eitthvað vafasöm þá hefði mátt skrifa um það greinar og vekja athygli á því. Ég hefði þá jafnvel tekið undir gagnrýnina ef hún hefði verið vel rökstudd. Það er leiðin til að sannfæra mig. Mér hugnast hins vegar ekki þegar fólk leynist til að smala á fund með því að nota liðstyrk úr félögum eins og Heimsýn og Ísafold.
Var lögð fram tillaga á fundinum um að breyta fyrirkomulag við stjórnarkjör? Hefði það ekki verið góð leið til breytinga? Það hefði líka verið frábært að koma með þá hugmynd fyrirfram. Það hefði gefið fólki tækifæri til að taka afstöðu til þessara mála.