Tag: The Texas Chain Saw Massacre (1974)

X (2022) 👍
{86-66-ø-ø}

Árið er 1979. Vinnufélagar í Texas, ásamt kærustum sínum, halda út í sveit ásamt ungum kvikmyndagerðarmanni og kærustu hans til þess að búa til tilraunakennda mynd. Markmiðið er að græða peninga myndbandsspólusölu (sem er reyndar frekar góð langtímaspá á þessum tíma). Listræna mynd sumsé. Klám. Þau fá gistingu á vegum frekar undarlegs gamals fólks.

Þarna er Mia Goth í aðalhlutverki. Ég veit hver hún er en ekki mikið meira. Merkilegt nokk hef ég ekki séð Nymphomaniac myndir Lars von Trier. Ég sá Idioterne og lét það bara duga. Jenny Ortega þekki ég bara út af Beetlejuice Beetlejuice. Ég var hrifinn þeirri mynd. Og þær standa sig báðar vel hérna.

Í raun er ég ekki sérstaklega vel að mér í hryllingsmyndum. Þó hef ég yfirleitt séð fyrstu myndirnar í þessum seríum. Það sem ég sá voru vísanir í Texas Chainsaw Massacre, Psycho, The Shining og Friday the 13th (Vrijdag de 13e á spólunni sem ég fékk lánaða frá Þórarni). Síðan giskaði ég á vísun í aðra mynd sem ég hef aldrei séð en væri eiginlega höskuldur að nefna.

Myndin hefur frekar augljós þemu. Æsku, að eldast, öfund, ást og kynlíf.

Mér sýnist eins og þessi mynd hafi gengið í gegnum tímabil bæði oflofs og bakslags. Ég hafði engar óhóflegar væntingar og fannst hún bara mjög fín. Ekki horfa á hana ef þið hafið andúð á hryllingsmyndum.

Ég er ekki alveg viss um að ég horfi á framhaldsmyndirnar tvær. Það vekur samt áhuga minn að forhaldið var gefið út strax sama ár. Frekar óvenjulegt.

Draumakóngurinn, hryllingsmyndir og videogláp unglingsára

Sandman er enn á náttborðinu þó Náttborðið hér við hliðina sé ennþá bilað.

Nú er fullt af fólki sem hefur ekki lesið teiknimyndasögur og hefur fordóma, ég get bara sagt þeim að kíkja á þetta, frábært alveg.

Ég var annars að rifja upp að ég hef lesið eina nútímateiknimyndasögu á ensku, það var einhver Dark Knight saga um Batman (ef ég man rétt), Dúddi lánaða mér hana. Dúddi hafði mikil áhrif á smekk minn á þeim árum sem þau bjuggu á Akureyri þó ég hafi aldrei fallið eins mikið fyrir hryllingsmyndunum og til dæmis Aðalsteinn frændi. Spurning hvort maður hefði nokkurn tíman séð Friday the 13th eða Texas Chainsaw Massacre ef það hefði ekki verið fyrir Dúdda, meiraðsegja með hollenskum texta.

Man eftir einu skipti þar sem Aðalsteinn gisti hjá mér Hrísalundi (einsog hann gerði oft þegar hann var í bænum) og við fengum bunka af myndum frá Dúdda. Ég gafst reyndar upp frekar snemma en vaknaði og kíkti inn í stofu þar sem Aðalsteinn var að horfa á einhvern viðbjóð sem er vafamál að mamma hans hefði leyft honum að horfa á, hann hefur verið 12-14 ára líklega (reyndar er ekkert vafamál að mamma hans hefði ekki leyft honum að horfa á þetta). Mér brá bara þegar ég leit á skjáinn, reyndar var þetta bara Evil Dead 2 en það dugði samt.

Síðan stunduðum við Starri og Aðalsteinn það á þessum tíma þegar við höfðum klárað fjölskylduboð að fara á videoleigu og taka 2-3 myndir og horfa á fram á nótt. Með skemmtilegri tímum í æsku minni. Man að við vorum einu sinni að horfa á einhverja mynd (held að það hafi verið The Hunt for the Red October) og Aðalsteinn sofnaði í tveimur stólum (með fæturna á öðrum). Við Starri ákváðum að troða Aðalsteini inn á baðherbergi svo hann myndi vakna þar um morguninn en því miður vaknaði hann í dyragættinni, við vorum nálægt markinu en það tókst ekki alveg.