Það er frétt á MBL um að einhverjir Nígeríusvindlarar hafi brotist inn í pósthólf veðurfræðings. Ég sá strax annan möguleika í stöðunni sem mér þykir líklegri. Kannski eru þeir sem eru að senda tölvupóst í nafni fræðingsins ekki raunverulega með aðgang að póstinum hans heldur eru bara að feika það. Það er lítið mál að láta tölvupósta líta út fyrir að vera úr öðru póstfangi en þeir í raun eru. Eitt form af því er hotmail spammið sem ég fæ, að því er virðist, frá sjálfum mér. Ég er ekki að fullyrða en þetta er mögulegt.
Day: 12. júní, 2008
Frostbrauð
Stóra brauðmálið kallar á athygli mína. Mér er sama þó flutt séu inn frosin brauð ef 1) ég fæ að vita af því þegar ég kaupi svoleiðis og 2) ég fæ þau á lægra verði.
Fyrra skilyrðið er ekki, eins og sumir gætu haldið, leið til að forðast algjörlega frysta brauðið heldur til þess að geta metið það hvort þetta sé eitthvað verra.
Annars verður áhugavert hvernig hækkandi flutningskostnaður hefur á verðlagið.
Kirkjuvörður með Svarthöfða
Þessi frétt úr Mogganum í dag er fyndin en þó aðallega vegna myndavalsins. Maðurinn er nefnilega ekki ferðamaður að pósa heldur kirkjuvörður að stoppa Svarthöfða. Hann sést líka í fréttum RÚV hlaupandi meðfram göngunni. Þessi maður er reyndar ástæðan fyrir því að í stað þess að ganga á undan prestunum, eins og planið var, þá endaði Svarthöfði aftast og skapaði þar með þessa dásamlegu senu í myndbandinu. Síðan var það náttúrulega Adda Steina verkefnisstjóri Biskupsstofu sem stoppaði Svarthöfða aftur.
Blogg til framtíðar
Margir virðast hissa á að Landsbókasafnið geymi bloggsíður en augljóslega er safnið einfaldlega að uppfylla lög um skylduskil.
Þó ekki kæmu til lög um skylduskil þá ætti fólk samt sem áður að gera ráð fyrir að blogg- og aðrar vefsíður verði varðveitar til framtíðar. Þeir sem hýsa bloggin eru væntanlega oft með afrit sem taka ekkert tillit til þess hvort að fólk eyði út færslum eða ekki. Þar að auki eru leitarvélar með afrit líka þó ég viti ekki hvort þeim sé eytt jafnóðum. Þetta er opinbert og verður það til framtíðar.