Dýrðardagur! Á tveim dögum hef ég eignast kaffivél, bolla, ruslafötu, þvottasnúru, kerti og bókasafnsskírteini. Mér finnst ég nánast ríkur orðinn. Þá lét ég í einhverju góðmennskukasti ginnast til að kaupa rós af sígaunakonu sem fær nú að drekka úr vatnsfylltri bjórflösku, rósin það er, ekki sígaunakonan.
Gamli skipulags- og Ikeapervertinn í mér er víst kominn á kreik. Það er loksins að komast sýstem á þetta hjá mér og það kann ég vel að meta. Enda þótt ég eigi enn eftir að heimsækja Ikea. Þá verður fjandinn sjálfsagt laus.
Mér var einmitt gefið það ráð einhvern tíma að kerti og planta/blóm væru það allra allra nauðsynlegasta þegar maður væri að koma sér fyrir (svona fyrir utan mat og svoleiðis). Sýnist þú hafa forgangsröðina vel á hreinu!
Mér finnst vanta myndir með þessum fréttum, hvernig á maður t.d. að sjá fyrir sér ruslafötuna?