Meira um holdarfar, en íþróttakennarafélag Íslands vill þröngva daglegri íþróttaiðkun upp á íslenskt skólafólk, því forsvarsmenn þess hafa áhyggjur af holdafari íslenskra ungmenna. Þá spyr ég: Á skólinn ekki að snúast um menntun fremur en líkamlegt atgervi? Hvað koma íþróttir menntun við? Ef fólk hleypur í spik, þá er það agavandamál sem það sjálft þarf að stríða við. Það, eða að það ræður engu um það. Hefur einhver einhvern tíma grennst vegna íþróttatíma í skóla? Held ekki. Þeir stunda sport sem það vilja og hinir fengu að vera í friði ef ég fengi einhverju um það ráðið. Eflaust munu flestir vera mér ósammála um þetta.
Enn einu sinni hafa hjaðningaél Heimdellinga ratað inn á síður Morgunblaðsins, þrátt fyrir að öllum sé raunverulega sama um þeirra innan„flokks“mál, nema frá séu dregnir Heimdellingarnir sjálfir. Ekki fæ ég séð að það varði hinn almenna lesanda Moggans neinu hvað gjörst hefur á síðasta stjórnarfundi Heimdallar, eða að hinn almenni lesandi bíði með öndina í hálsinum eftir nýjustu fregnum af blaktandi gunnfána Bolla Thoroddsen gegn félögum sínum, og orðaskaki því, sem þeirra fer í millum.