Hringavitleysa FÍB um reiðhjólakaup

Á vef FÍB má finna reiknivél sem á að segja manni hve langt maður þurfi að hjóla til þess að hjólakaup borgi sig – miðað við bensíneyðslu bílsins manns og ekkert annað. Samkvæmt þessu er bíll núllstærð í kostnaði fyrir utan bensín. Ef FÍB myndi setja þarna inn tölur frá sjálfum sér þá væri kannski hægt að miða við 1,2 milljónir á bíl á ári. Þannig að ef þú getur sparað þér að reka bíl í mánuð þá gætirðu keypt þér hjól sem kostar 100 þúsund, ef þú sparar þér bíl í tvo mánuði geturðu keypt hjól sem kostar 200 þúsund.

Ég skil ekki hvernig FÍB fær það út að hjólakaup þurfi sérstaka réttlætingu á meðan bílakaup þurfa slíkt ekki. Maður þarf farartæki og ef þú getur sparað þér bíl með að hjóla þá geturðu í raun með góðri samvisku keypt allt nema mögulega allra dýrustu hjól vitandi að þú ert að spara formúgu.

Mitt heimili rekur einn bíl. Ég er viss um að margir í okkar sporum telja að þeir þyrftu tvo bíla (en ég gæli frekar við hugmyndina um bíllaust heimili). Í hreinskilni get ég ekki haldið því fram að hjólið mitt komi í veg fyrir að við þurfum annan bíl – það er strætókortið sem reddar því. Það kostar c. 68 þúsund á ári (sparar okkur samkvæmt FÍB allavega rúma milljón á ári). Það sparar mér þar að auki ergelsið við að keyra.

0 thoughts on “Hringavitleysa FÍB um reiðhjólakaup”

  1. Þetta er sennilega sú allélegasta reiknivél sem ég hef séð.

    Ég skil forsendurnar hreinlega alls ekki, er það ekki nokkuð gefið mál að ef þú hjólar eingöngu þá sparar þú þér akkúrat þá upphæð sem þú hefðir annars eitt í bensín + önnur gjöld?
    Miðað við 100 000 krónu hjól (svipað og mitt eigið) og bensínkostnað + önnur gjöld á litlum sparneytnum bíl þá skv. FÍB þarf ég að hjóla næstum því 9000 kílómetra til þess að „borga upp hjólið“.

    Það eru stórfurðulegar forsendur sem liggja að baki slíkum tölum.

    Til hvers er þessi reiknivél annars, er hún til þess að hvetja fólk til þess að kaupa sér ekki hjól?
    Ég er alveg lost.

Leave a Reply