Þegar ég mætti í skólann beið mín eintak af Ást á grimmum vetri frá honum Sigtryggi. Ég er ekki frá því að mér þyki meira í hana spunnið núna en þegar ég las hana síðast fyrir rúmi ári. Hver veit nema sama verði uppi á teningnum hjá Steinunni Sigurðardóttur, sem Kistudómur dagsins er tileinkaður. Það er einhver einkennilegur hörgull á kápumyndum á netinu nú um mundir, að því er virðist, og því þurfa lesendur að horfast í augu við höfund – eða spegilsjálf hennar – við lestur dómsins. Skárra væri það nú en ef höfundar ginu yfir ritdómurum að störfum.
Nú hefur einn kennari líkt norrænum miðaldasögum við ástandið í Ráðhúsinu. Annar kennari líkti því svo við harmleikinn Antígónu eftir Sófókles. Þriðji kennarinn talaði svo um misbeitingu valdhafa gegnum tungutak. Þá er eftir að sjá hvað hann segir um meirihlutamyndanir, orðmyndunarfræðikennarinn.