Ritgerðin

Það sem klárað er: Forsíða, þrír kaflar, heimildaskrá. Heildarlengd nítján blaðsíður.
Það sem vantar: Einn kafli, fimm til sex blaðsíður, niðurstaða, geri ráð fyrir tveimur blaðsíðum, inngangur, ein og hálf til tvær blaðsíður, viðauki um allt það sem ég hefði viljað ítarlegra, þrjár til fjórar blaðsíður.
Ráðgerð heildarlengd kjörsviðsritgerðar er samkvæmt því þrjátíu og hálf blaðsíða míkró, þrjátíu og þrjár blaðsíður makró. Engar tölur eru til um ráðgerðan heildarmissi geðheilsu.

Hughreysting skyggna mannsins

„O, I am fortune’s fool!“ Við vitum hvernig þér líður, Rómeó, þú táningur, þú ástarglópur og morðingi frænda unnustu þinnar. Líttu þó á björtu hliðarnar því hlutirnir gætu verið verri. Unnusta þín gæti tekið upp á því að byrla sér ólyfjan í von um að þú komir og nemir hana meðvitundarlausa á brott, í stað þess að koma sjálf til þín. En það kemur varla til nema hún fyrirfinni klerk sem talar í vafasömum ráðagerðum, og hversu margir þannig eru í Verónsborg? Það skyldi þó aldrei verða að hún rambi á einn slíkan í fyrstu tilraun til að leita sér hjálpar? Æ, örlögin! Ó, eymdin! En alltaf að líta á björtu hliðarnar, því ef svo fer og þú ferð varhuga af skilaboðum klerksins um að Júlía lifi, þá má í það minnsta drepa vonbiðil hennar á undan sjálfum sér. Það eru réttindi þín sem skáldverk. Vertu þó viðbúinn undir eitt síðasta sjokk.

Morgunbaráttan

Eiginlega er það skáldlegt óréttlæti hvað morgunkaffið mitt er vont miðað við að ég vakti til fjögur við óminn af því sem ég ætla að hafi verið Naglfar að landa í Sundahöfn með meðfylgjandi ragnarökum. Eiginlega er ég ekki í neinu standi fyrir vikið til að mæta í skólann, en geri það nú samt.