Genginn í það heilaga

Aldrei fór það ekki svo að ég gifti mig í bríaríi. Það var Kristján Ketill, skipstjóri, sem gaf okkur saman á barnum Barnum við mikinn fögnuð viðstaddra. Hringar voru fengnir af nærliggjandi lyklakippum, svaramenn voru til halds og trausts, og nálægt 60 vottar. Mér skilst að athöfnin hefði verið lögleg um borð í skipi.

Eftir það man ég ekki mikið eftir kvöldinu. En fyrr um daginn var ég meðal gesta í kokteilboði forsætisráðuneytisins, og þrátt fyrir ítrekuð loforð náði ég ekki að mana mig upp í að pota í bumbuna á Geir Haarde. En með því veitingar af næringarlega toganum voru af takmarkaðra magni en áfengið fór sem fór.

Hvað ætli spúsu minni Þórunni Ólafsdóttur finnist um það? Manneskja sem væri meira en líkleg ekki aðeins til að pota í bumbur, heldur fara í sleik við sjálfan forsætisráðherrann. Í þeim skilningi verður ekki annað sagt en ég hafi gifst upp fyrir mig. Það væri ólíkt skemmtilegra að konan mín héldi framhjá með honum en þess háttar rustum sem hún eyddi kvöldinu í að kyssa.

8 thoughts on "Genginn í það heilaga"

  1. Elías Halldór skrifar:

    Þú verður að fara að þjálfa þig í að drekka minna í einu. Mikið minna. Þetta kemur reyndar úr hörðustu átt, en gerðu eins og ég segi, ekki eins og ég geri!

  2. Harpa J skrifar:

    Verst að brullaupið hafi ekki verið ekta. Mér finnst nefnilega ofursvalt að þegar hjón eru gefin saman af skipstjóra. Mitt brúðkaup varð því miður ekki svoleiðis og ekki stjúpdótturinnar heldur – en ég lifi í voninni – ég á tvö börn sem gætu uppfyllt drauminn…

  3. Elías Halldór skrifar:

    Nú eru skipstjórar ekki löglegir vígslumenn á Íslandi, nema þeir séu þá líka annaðhvort sýslumenn, sýslufulltrúar eða prestar eða sambærilegt hjá viðurkenndum trúsöfnuði, en veit einhver hér hvernig lögin eru á alþjóðlegu hafsvæði?

  4. Skipstjórar mega gefa saman fólk fyrir utan lögsöguna. Þá sjá þeir líka um pappírsvinnuna.

  5. Elías Halldór skrifar:

    Hvaða heimild hefurðu fyrir því?
    Ef maður er á alþjóðlegu hafsvæði en um borð í skipi sem skráð er á Íslandi, innan hvaða lögsögu er maður? Ef lögsagan er íslensk, þá gilda íslensk lög.

  6. Þetta sagði mér héraðsdómari. Væntanlega hefur skipstjórinn þessa heimild vegna þess að það er ekki sjálfgefið að nokkrir embættismenn séu um borð.

  7. baun skrifar:

    innilega til hamingju!
    (skil ekkert í lesendum þessarar síðu, bara einhverjar lagaflækjur reifaðar við svona gleðilega færslu)

  8. Þakkir, svo langt sem það nær …

Skildu eftir svar

Netfang þitt verður ekki birt. Nauðsynlegir reitir eru merktir *