Af daglegu stöffi

Ég fór með tölvuna í viðgerð í gær og fékk hana aftur samdægurs. Hún hafði verið að ofhitna einsog Ödipus og bræða utanaf sér húðina að neðan. Um miðjan dag fékk ég símtal frá EJS: Áttu kött? Það er heilt teppi hérna inni.

Á dauða mínum átti ég von. En tölvan er einsog ný núna.

Á morgun fer ég í rannsókn á „áhrifum oflipurðar á stoðkerfiseinkenni hjá íslenskum ungmennum með sérstöku tilliti til íþróttaiðkunar og meiðsla.“ Um rannsóknina segir í bréfi sem ég fékk:

Við undirrituð stöndum fyrir rannsókn á því hvort slök liðbönd og mikill hreyfanleiki í liðum (oflipurð) geti orsakað stoðkerfisverki eða aukið hættu á íþróttameiðslum hjá ungu fólki.

Verandi náungi með oflipur liðamót vona ég að þetta svari einhverjum spurningum, t.d. um krampaköst í liðum og önnur eymsl sem ég hef fundið fyrir óreglulega undanfarin ár.

Á morgun má ég einnig eiga von á sekt í pósti fyrir að trassa að láta skoða bílinn minn. Það gerði ég vegna þess að ég hef einfaldlega ekki haft efni á að láta lagfæra þetta smáræði sem er að honum. Auðvitað lendir þetta meira á láglaunafólki en öðrum, og þeim sem áttu enga peninga til að byrja með. Það er til staður og stund til að kreista peninga útúr fólki, en ekki núna.

2 thoughts on "Af daglegu stöffi"

  1. Avatar Elías skrifar:

    Einhvers staðar las ég að vísindamenn væru að rannsaka fylgni oflipurðar við asperger. Gaman þætti mér að sjá niðurstöður þess.
    En fyrst þú ert oflipur, getur þú beygt olnbogann í 200° horn eins og ég og dætur mínar? (þessi eiginleiki virðist erfast eftir X-litningi).

  2. Nei, ég get það ekki.
    Mér að óvörum mældist ég svo ekki með oflipurð eftir allt saman.

Skildu eftir svar

Netfang þitt verður ekki birt. Nauðsynlegir reitir eru merktir *