111713374622791929

Þegar ég var barn studdi ég Sjálfstæðisflokkinn í einu og öllu, því eins og öll önnur börn gerði ég ráð fyrir því að verða ríkur, og hugði ég, að þar væri auðvaldið niður komið. Var ég bráðþroska? Hreint ekki. Enda varla hægt að tala um neinn sérstakan þroska þegar Sjálfstæðisflokkurinn á í hlut.

Þetta segi ég raunar einvörðungu til að espa vissa menn upp.

Annað sem ég vildi koma á framfæri er merking orðsins „ástmögur“, en merking þess orðs mun vera ástmaður. Sem er skrýtið, því mögur þýðir sonur. Ullabjakk! Héðan af mun öll notkun orðsins „ástmögur“ túlkast sem ígildi sifjaspells í mínum huga.

111713371297123586

Óþolandi krakkahelvíti. Það þarf að hafa sig allan við til að halda þessum skrýmslum í burtu, og ekki bætir það úr skák að litli bróðir minn sendir boðskort út um allan bæ. Gott væri að verða sér út um einhvers konar gervigreint leisernet og koma því fyrir í dyrunum. Netið myndi aðgreina boðflennur og heimilismeðlimi og búta niður þá fyrrnefndu. Ef streymi krakka héldi áfram með sömu tíðni og undanfarið hefur verið myndi mig aldrei skorta grillkjöt. Leiserinn myndi sjá til þess.

Eyrbyggja saga

Íslendingar eru öðrum þjóðum verri í plebbaskap og durgslegum aðförum gegn náunga sínum. Í Eyrbyggja sögu ákveða Kjalleklingar að þeir megi míga og skíta hvar sem þeim sýnist, á helgistað eður ei. Þetta gremst Þórsnesingum og upphefst bardagi milli þeirra sem kostar sjö menn lífið.

Engu að síður fannst mér þetta fyndið. Það eru samt takmörk fyrir því hvar leyfilegt er að ganga örna sinna.

111713359515970684

Ég minnist þess þegar ég var í tíu ára bekk að við vorum beðin um að teikna mynd af mengunarvöldum. Einn strákur, hvers nafn verður ekki nefnt, teiknaði mynd af drossíu (e. Limousine) með kjarnorkuversstrompi ofan á, sem í þokkabót var að því kominn að springa (e. meltdown). Ég gerði þau mistök að spyrja hann hvers vegna hann teiknaði kjarnorkuver ofan á bílinn. Hann greip í öxlina á mér og gargaði, rauður í framan, af öllum lífs- og sálarkröftum: Þetta er ekki kjarnorkuver, þetta er eins og Hómer vinnur í!!! … ! (hér þurfti punktalínu vegna gríðarlegs fjölda upphrópunarmerkja)
Ég starði á drenginn í smástund. Svo gerði ég honum ljóst að Hómer þessi ynni svo sannarlega í kjarnorkuveri. Þá varð hann reiður og færði sig í hinn enda stofunnar. Eftir á að hyggja held ég að hann hafi haldið að Hómer ynni í strompinum á kjarnorkuveri (hvaðan ætti hann annars að fá slíka hugmynd?!) og þannig hafi misskilningurinn orðið hjá honum.

En hann var frumkvöðull. Því má ekki neita. Í þá daga keyrði enginn um á drossíum með áföstu kjarnorkuveri, en í dag keyra allir, ALLIR, á D.M.Á.K. (stytting á drossíum með áföstu kjarnorkuveri). Enda er það engin afsökun lengur að bíllinn sé rafmagnslaus. Halló! Bíllinn þinn klýfur úraníum!