Eldur

Eftir prófið í dag fór ég til föðurhúsa minna til að gefa fiskum þess gamla að éta. Á leiðinni til baka úr Grafarholtinu varð ég var við mikinn reykjarmökk við Ingvar Helgason. Ég dreif mig þangað hið snarasta til að sjá hinar miklu eldglæringar sem fengu sjálfan Surt til að skammast sín, en varð fyrir vonbrigðum. Var þetta þá, þegar allt kom til alls, einhver bévítans strompur.
Svona getur maður verið sjúkur stundum; verður vonsvikinn vegna skorts á eldsvoðum.

Líkamshreingerning (ekki ber að taka bókstaflega)

Ah! Þetta var hressandi. Hvað var svona hressandi? Jú, það var líkamshreingerningin. Skal ég nú lýsa henni í grófum smáatriðum.

1. Ég klippti neglurnar á fingrum mér og hreinsaði burt bjakkið sem þar hafði undir sest.

2. Ég klippti tuttugu metra langar inngrónu táneglurnar á mér (já, ég er ógeðslegur), og naut vel.

3. Ég rakaði mig, og þvílík himnasæla! Mér fannst ég nakinn eftir á. Nú kynnu sumir að hæðast að skeggvexti mínum. Eru þeir vinsamlegast beðnir um að sleppa því.

4. Ég fór í sturtu. Í sturtunni tók ég eftir því að ég var kominn með karlmennskubletti. Fyrir þá sem ekki vita eru karlmennskublettir mar sem myndast á innanverðu lærinu, oftast vegna óhóflegrar eistnastærðar, en þau eiga þá til að skella þar utan í þegar gengið er.

5. Ég hreinsaði úr eyrunum á mér og át. Var það mjög gott.

6. Ég hreinsaði tjöruna úr nefinu á mér. Já, það eru víst einhverjir ókostir við reykingar!

Mér finnst ég vera nýr maður, tilbúinn að sigra heiminn!

Í útvarpinu

Í dag sem svo oft áður hlustaði ég á útvarpið í bílnum. Tvennt stóð þar upp úr. Annars vegar var sagt frá sálfræðitilraun þar sem úrtakinu var skipað í tveggja manna hópa. Þeim fyrri var boðin tiltekin peningaupphæð og gert að ráðstafa þeirri upphæð milli sín og hins mannsins í hópnum. Mátti hann skipta peningunum eins og hann vildi. Hinn aðilinn mátti taka boðinu eða hafna því. Ef sá síðari hafnaði boðinu urðu báðir af peningunum, en ef hann samþykkti fengu þeir peningana greidda eins og fyrri aðilinn hafði ráðstafað þeim. Það væri því rökrétt að samþykkja alltaf upphæðina, því skárra er að fá einhvern pening en engan. Niðurstöðurnar urðu þær að flestir voru sanngjarnir og skiptu til helminga, en flestir þeir sem fannst skipting fjárins ósanngjörn höfnuðu peningunum. Magnað.

Hins vegar var rætt um fjölmiðlafrumvarpið. Davíð sagði að sér þætti það sæta tíðindum ef stjórnarandstaðan tæki afstöðu með Baugi í því máli. Gerir hann sér ekki grein fyrir því að andstaða við frumvarpið þarf ekkert að tengjast Baugi á nokkurn hátt? Hvað um þá staðreynd að til að geta rekið fjölmiðil þarf maður að vera nokkuð fjáður, og svo þá staðreynd að flestir fjáðir íslendingar eiga í einhvers konar rekstri? Það segir sig sjálft að algjör ríkiseinokun verður á fjölmiðlum ef þetta frumvarp nær fram að ganga. Enginn óháður aðili hefur bolmagn til að reka miðil.